ចំណុចត្រូវដឹង បើចង់ទៅលេងរដូវផ្ការីកនៅជប៉ុនឲ្យចំពេល និង ចំកន្លែងស្អាតបំផុត

2019-02-09 08:15:16
សេដ្ឋកិច្ច

2019-02-09 08:15:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ជារៀងរាល់ឆ្នាំ ស្ថាប័នឧតុនិយមជប៉ុន (Japan Meteorological Corporation ឬ JMC) តែងតែព្យាករណ៍ថាសាគូរ៉ានឹងរីកពេលណា ហើយរីកខ្លាំងបំផុតនៅពេលណា។ ការព្យាករណ៍បានគ្របដណ្តប់ប្រមាណ ១ ០០០ ទីតាំងនៅទូទាំងប្រទេស ហើយតែងធ្វើបច្ចុប្បន្នភាពជាប្រចាំមុនពេលនិទាឃៈរដូវមកដល់។

ផ្ការីកនៅ Kitakami Park

ឆ្នាំ ២០១៩ នេះ JMC បានព្យាករណ៍ថា សាគូរ៉ា នឹងឆាប់ចេញផ្កាស្គុះស្គាយលឿនជាងរាល់ឆ្នាំ។ តើហេតុអ្វី? ហើយកន្លែងណា និង ពេលណាដើម្បីអាចទស្សនាទិដ្ឋភាពដ៏ស្រស់ស្អាតបំផុតនេះបាន?

ទីក្រុងគូជិ (Kochi) នៃកោះ Shikoku ដែលជាកោះតូចបំផុតក្នុងចំណោមកោះសំខាន់ទាំង៤របស់ជប៉ុន នឹងក្លាយជាកន្លែងដែលមានផ្កាសាគូរ៉ារីកដំបូងគេនៅថ្ងៃ ១៨ ខែមិនា ហើយ មកកោះ Kyushu នឹងជាកន្លែងមានផ្ការីកបន្ទាប់។

ទីក្រុងតូក្យូ ផ្កានឹងចាប់ផ្តើមរីកនៅថ្ងៃទី ២២ មីនា លឿនជាងសព្វដង៤ថ្ងៃ ហើយរំពឹងថានឹងរីកពេញទំហឹងនៅថ្ងៃទី ២៩ ខែមីនា។

ភ្នំយ៉ូស៊ីណូ (Mount Yoshino) នៅក្រុងណារ៉ា (Nara) គឺជាកន្លែងដែលមានផ្ការីកស្អាតបំផុត

គោលដៅទេសចរណ៍សំខាន់ៗផ្សេងទៀតដូចជា ហ៊ីរ៉ូស៊ីម៉ា ចាប់ផ្តើមរីកនៅថ្ងៃទី ២៣ ខែមីនា និង ពេញផ្កានៅថ្ងៃទី ១ ខែមេសា និង អូសាការីកថ្ងៃទី ២៧ មីនា និង ពេញផ្កានៅថ្ងៃទី ៣ ខែមេសា។ ក្រុង Sapporo នៅហុកកៃដូ ភាគខាងជើងប្រទេសជប៉ុន នឹងរីកក្រោយគេ ចេញផ្កានៅថ្ងៃទី ៤ ខែឧសភាឯណោះ។

ហេតុអ្វីបានជារដូវផ្ការីកឆ្នាំនេះនៅជប៉ុនលឿនជាងសព្វដង?

ជាគោលការណ៍ ផ្ការីកនៅជប៉ុនត្រូវការកត្តា២ ទី១ភាពត្រជាក់នៅរដូវរងា និង ភាពកក់ក្ដៅនៅនិទាឃៈរដូវ។ សាគូរ៉ាចាប់ផ្តើមមានផ្កានៅរដូវរងា ប៉ុន្តែប្រសិនបើនិទាឃៈរដូវឆាប់មានអាកាសធាតុក្តៅ នោះផ្កានឹងឆាប់រីក។

ទិដ្ឋភាពភ្លើងគោមនានិទាឃៈរដូវនៅតាមដងទន្លេ Meguro ក្នុងទីក្រុងតូក្យូ

ដោយសារអំណោយផលធម្មជាតិនេះហើយទើបបានជាប្រទេសក្តៅដែលសឹងមិនស្គាល់ភាពត្រជាក់ពេញ១ឆ្នាំ ឬ ប្រទេសត្រជាក់ដែលស្ទើរតែមិនស្គាល់ភាពក្តៅពេញ១ឆ្នាំ កម្រនឹងទទួលបទពិសោធន៍និទាឃៈរដូវដ៏ស្រស់បំព្រងគ្មានគូប្រៀបដូចនៅជប៉ុននេះណាស់។

Kanazawa ជាក្រុងប្រវត្ដិសាស្ដ្រត្រូវបានថែរក្សាយ៉ាងស្រស់ស្អាត ហើយត្រូវចាត់ទុកថាជាកន្លែងមួយក្នុងចំណោមកន្លែងទាំង៣នៃប្រទេសជប៉ុនដែលមានផ្ការីកស្រស់ស្អាតបំផុត

តើអ្នកគួរធ្វើអ្វីនៅពេលទៅដើរមើលផ្កាសាគូរ៉ាដែលបញ្ចេញសម្រស់មិនចេះរីងស្ងួត?

ធ្វើដូចជនជាតិជប៉ុន។ មានភេសជ្ជៈ ម្ហូបអាហារ និង កម្រាលសម្រាប់អង្គុយមើលសាគូរ៉ា ដែលជនជាតិជប៉ុនហៅថា hanami មានន័យថា "គយគន់ផ្កា" គឺជាពិចនិចលក្ខណៈគ្រួសារ លើកម្រាល ក្រោមដើមផ្កាពណ៌ផ្កាឈូកស្រូបខ្យល់និទាឃៈរដូវ ជារដូវល្អបំផុតក្នុងចំណោមរដូវទាំង៤ប្រចាំឆ្នាំ។

តើកន្លែងណាដែលគេនិយម hanami ច្រើនបំផុត?

ផ្ការីកនៅ ក្យូតូ

ក្រៅពីទីក្រុងតូក្យូ ទីក្រុង ក្យូតូ ជាកន្លែងគយគន់ផ្កាដ៏ពេញនិយមមួយទៀត។ មានឧទ្យាន ម៉ារុយ៉ាម៉ា (Maruyama Park) និង ទស្សនីយភាពដ៏អ៊ូអរនៅមាត់ទឹក Heian Shrine ប៉ុន្តែបើអ្នកចង់ទៅទីនោះ ត្រូវត្រៀមចិត្តទទួលយកហ្វូងមនុស្សឲ្យហើយ៕

ប្រភព៖ Independent ប្រែសម្រួល៖ សុខ លាងហ៊ត