- 2019-05-17 04:12:46
- សេដ្ឋកិច្ច
អស្ចារ្យ ! អគារភ្លោះខ្ពស់កប់ពពកនឹងរំលេចខ្លួននៅក្នុងទឹកដីខេត្តកំពង់ស្ពឺ
- 2019-05-17 04:12:46
- ចំនួនមតិ 0 | ចំនួនចែករំលែក 0
អស្ចារ្យ ! អគារភ្លោះខ្ពស់កប់ពពកនឹងរំលេចខ្លួននៅក្នុងទឹកដីខេត្តកំពង់ស្ពឺ
ចន្លោះមិនឃើញ
ខណៈវិស័យសំណង់ក្នុងប្រទេសកម្ពុជាកំពុងមានការរីកចម្រើន គម្រោងវិនិយោគសាងសង់អគារភ្លោះ ខ្ពស់កប់ពពកមួយទៀតនឹងរំលេចខ្លួននៅក្នុងខេត្តកំពង់ស្ពឺ នាពេលខាងមុខ។ នេះបើតាមប្រសាសន៍ លោក វី សំណាង អភិបាលខេត្តកំពង់ស្ពឺ បានថ្លែងប្រាប់ Sabay កាលពីពេលថ្មីៗនេះ។
លោកបានបន្ថែមថា អគារភ្លោះនឹងត្រូវសាងសង់នៅកណ្តាលក្រុងច្បារមនខេត្តកំពង់ស្ពឺផ្ទាល់តែម្តងដោយវិនិយោគគិនខ្មែរ ខណៈការសិក្សា ពីគម្រោង និងប្លង់បានបញ្ចប់រួចរាល់ហើយ ដោយរង់ចាំតែការសម្រេច ពីប្រមុខរាជរដ្ឋាភិបាលកម្ពុជាតែប៉ុណ្ណោះ។ លោកបាន ការសាងសង់អគារភ្លោះខ្ពស់កប់ពពកនេះ ក៏ជាការទាក់ទាញវិយោគគិនកាន់តែច្រើនឡើងមកបណ្តាក់ទុនក្នុងខេត្តកំពង់ស្ពឺផងដែរ ខណៈកំពង់ស្ពឺ គឺជាតំបន់តភ្ជាប់រវាងប៉ូលសេដ្ឋកិច្ចសំខាន់ពីររបស់កម្ពុជា គឺរាជធានីភ្នំពេញ និងខេត្តព្រះសីហនុ។
“ឥឡូវនេះវាពាក់ព័ន្ធនឹងបញ្ហាដីធ្លី ដែលយើងត្រូវយកកន្លែងរបស់រដ្ឋពីរកន្លែង ដើម្បីធ្វើការសាងសង់។ អញ្ចឹងការសាងសង់នេះគឺជាការទាក់ទាញមួយឱ្យអ្នកវិនិយោគសម្លឹងមើលឃើញសក្តានុពលសេដ្ឋកិច្ចកម្ពុជាថា ពិតជាខ្លាំង ដែលមិនធ្លាប់មានអស់រយៈពេលជាង ៥០០ឆ្នាំកន្លងមកហើយ”។
ដោយមិនបានបញ្ជាក់ឈ្មោះក្រុមហ៊ុនបោះទុកវិនិយោគ និងទំហំទឹកប្រាក់ លោកអភិបាលខេត្តបានឱ្យដឹងថា អគារភ្លោះនេះទី១ មានកម្ពស់ ៣២ ជាន់ និងទី២ មាន៦៤ ជាន់ ដោយមាននូវផ្សារទំនើប អគារការិយាល័យ និងកន្លែងកម្សាន្តជាដើម។
ក្រៅពីអគារពាណិជ្ជកម្មខាងលើ កំពង់ស្ពឺក៏ជាខេត្តដែលកំពុងតែមានសក្តានុពលផ្នែករោងចក្រឧស្សាហកម្មនិងកសិឧស្សាហកម្មខ្ពស់ជាងខេត្តនានាផងដែរ ជាក់ស្តែងកាលពីថ្ងៃទី ០៩-១០ ខែមេសា ឆ្នាំ២០១៩ នេះ លោក វ៉ី សំណាង អភិបាលខេត្តកំពង់ស្ពឺ ដែលបានបំពេញទស្សនកិច្ចនៅខេត្តក្វាងទុង សាធារណៈរដ្ឋប្រជាមានិតចិន បានអះអាងថា ប្រតិភូកម្ពុជាបានទទួលលទ្ធផលជាវិជ្ជមាន ដោយទទួលការវិនិយោគបន្ថែម និងធ្វើឲ្យប្រជាពលរដ្ឋមានការងារធ្វើច្រើន ព្រមទាំងការអភិវឌ្ឍរោងចក្រយីហោល្បីៗចំនួន ៩ក្រុមហ៊ុន ក្នុងនោះរាប់បញ្ចូលទាំងក្រុមហ៊ុនទូរសព្ទចំនួន ២គឺ OPPO និង VIVO ដែលសរុបទុនវិនិយោគខ្ទង់ពាន់លានដុល្លារអាម៉េរិក សម្រាប់មកវិនិយោគក្នុងទឹកដីខេត្តកំពង់ស្ពឺឆ្នាំ ២០១៩ នេះ៕
