- 2019-08-05 02:03:47
- សេដ្ឋកិច្ច
សហគ្រិនវ័យក្មេងមួយរូប បង្ហើបតិចនិកចូលហ៊ុនគ្នារកស៊ីឱ្យទទួលបានជោគជ័យ
- 2019-08-05 02:03:47
- ចំនួនមតិ 0 | ចំនួនចែករំលែក 0
សហគ្រិនវ័យក្មេងមួយរូប បង្ហើបតិចនិកចូលហ៊ុនគ្នារកស៊ីឱ្យទទួលបានជោគជ័យ
ចន្លោះមិនឃើញ
មានអតីតកាលជាពលករបម្រើការងារនៅប្រទេសកូរ៉េខាងត្បូង និងក្រោយមកបានចូលហ៊ុនគ្នាបីនាក់ រកផ្នែកអចលនៈទ្រព្យនៅខេត្តកំពង់ធំ លោក ផុន សាមាន ម្ចាស់បុរីលំនៅឋានបែបទំនើប សុកគា ស៊ីធី បានចែករំលែកនូវ គន្លឹះ មួយចំនួន ដល់ប្រិយមិត្តអ្នកអាន ដែលមានបំណងដាក់ទុករកស៊ីជាមួយគ្នា។ បើតាមលោក ផុន សាមាន មានចំណុចសំខាន់ៗចំនួន៣ ចំណុច ដូចខាងក្រោម៖
ទី១ភាពស្មោះត្រង់៖ ការរកស៊ីអាចទទួលជោគជ័យទៅបានអាស្រ័យ ដោយមានការទំនុកចិត្ត និងស្គាល់ចិត្ត ស្គាល់ថ្លើមគ្នាច្បាស់ ទើបអាចរកស៊ីជាមួយគ្នាបាន។ ភាពស្មោះត្រង់ នឹងបំបាត់អស់នូវភាពភ័យខ្លាច ការងាររលូនទៅមុខ ពេលជួបបញ្ហានឹងអាចរកដំណោះស្រាយទាំងអស់គ្នា។ ភាពស្មោះត្រង់ជាឫសគល់នៃភាពជោគជ័យ។ ការរកស៊ី មិនថា រកស៊ីតូច ឬធំនោះទេ នឹងមិនអាចគង់វង្សយូរអង្វែងបានឡើយបើគ្មានភាពស្មោះត្រង់។
ទី២ ផលប្រយោជន៍រួម៖ ក្រុមលោក មិនដែលស្គាល់ពីមុនមកទេ តែបានស្វែងយល់ពីគ្នាទៅវិញទៅមក និងផ្ដោតលើផលប្រយោជន៍រួម ជាជាងប្រយោជន៍ផ្ទាល់ខ្លួន។ ក្រុមខ្លួនសុទ្ធសឹងកូនអ្នកក្រ តាំងចិត្ត សហការគ្នាធ្វើយ៉ាងណាឱ្យទទួលជោគជ័យដើម្បីខ្លួនឯង កូនចៅជំនាន់ក្រោយ និងយុវជនដទៃទៀតឱ្យចេះរកស៊ី កុំគិតតែផលប្រយោជន៍ផ្ទាល់ខ្លួន។
ទី៣ មហិច្ឆតាធំ៖ ការរកស៊ីចូលគ្នា បើគ្មានមហិច្ឆតា និងក្ដីសុបិនធំក៏មិនអាចដំណើរការទៅបានវែងឆ្ងាយនោះដែរ។ មហិច្ឆតា ក្នុងការជួយខ្លួនឯង និងសង្គមតាមរយៈការផ្ដល់ការងារ និងសម្ភារៈផ្សេងៗ។ ទស្សនៈមួយបានលើកឡើងថា បើចង់ដើរលឿនត្រូវដើរម្នាក់ឯង តែបើចង់ដើរឆ្ងាយត្រូវដើរជាក្រុម។ ត្រលប់មកវិញបើរកស៊ីម្នាក់ឯងមានខួរក្បាលតែមួយនោះទេ តែបើរកស៊ីចូលគ្នាប្រើខួរក្បាលច្រើន ដើម្បីត្រិះរិះពិចារណា ហើយក៏មិនខុសគ្នានឹងថ្មពិលនោះដែរ ថ្មពិលបើគេប្រើមួយគ្រាប់ថាមពលមានកំណត់ តែបើគេប្រើថ្មពិល១០ គ្រាប់ ថាមពលនឹងមានចំនួនច្រើន។ ដូច្នេះនៅពេលមានបញ្ហាគឺយើងអាចរកដំណោះស្រាយបានយ៉ាងល្អ និងទទួលបានផលច្រើន។
លោកបានបន្ថែមថា ក្រុមហ៊ុនធំៗជាច្រើនលើពិភពលោកដូចជាហ្វេសបុកជាដើមរកស៊ីជោគជ័យទៅបានមិនអាចចាប់ផ្ដើម ដោយម្ចាស់ក្រុមហ៊ុនតែម្នាក់ឯងនោះទេ ពោលគឺត្រូវមានការសហការគ្នាច្រើន។ ចំពោះលោកក៏មិនខុសគ្នាប៉ុន្មានដែរ ខណៈដើមឡើយ ជាកូនអ្នកក្រ រកព្រឹកខ្វះល្ងាច និងធ្លាប់បានបម្រើការងារនៅប្រទេសកូរ៉េខាងត្បូង។ ចុងក្រោយលោកបានលើកទឹកចិត្តឱ្យយុវជនចេះសហការគ្នារកស៊ី ដើម្បីខ្លួនឯង និងសង្គមទាំងមូលមានភាពរីកចម្រើន។ កុំចាំដល់ចាស់ ឬមានលុយច្រើនចាំរកស៊ី។ បើយើងចាប់ផ្ដើមនៅក្មេង បើបរាជ័យគឺ យើងនៅមានពេលវេលា កម្លាំងកាយ ហើយអ្វីដែលទទួលបានច្រើន គឺចំណេះ ដឹង និងបទពិសោធន៍ ដើម្បីបន្តដំណើរទៅមុខទៀត ។ផ្ទុយមកវិញបើយើងចាំចាស់ ឬចាំមានលុយ ច្រើនចាំរកស៊ី ករណីបរាជ័យគឺយើងមានពេលវេលាតិចតួចណាស់ដើម្បីបន្តដំណើរទៅមុខទៀត ហើយអ្វីដែលសំខាន់គឺត្រូវរែកពន្ធបំណុលគ្រួសារជាច្រើន ។ ពេលវេលាក៏តិច កម្លាំងកាយក៏ចុះខ្សោយ៕
