- 2019-09-25 04:33:16
- ព័ត៌មាន
ទស្សនា កូឡាឡាំពួរ នាពេលរាត្រី និងឈ្វេងយល់ពីទីក្រុងរហស្សនាម "ទីក្រុងសួននៃពន្លឺ" ទាំងអស់គ្នា
- 2019-09-25 04:33:16
- ចំនួនមតិ 0 | ចំនួនចែករំលែក 0
ទស្សនា កូឡាឡាំពួរ នាពេលរាត្រី និងឈ្វេងយល់ពីទីក្រុងរហស្សនាម "ទីក្រុងសួននៃពន្លឺ" ទាំងអស់គ្នា
ចន្លោះមិនឃើញ
កូឡាឡាំពួរ គឺជាទីក្រុងពាណិជ្ជកម្ម និងជាបេះដូងរបស់ប្រទេសម៉ាឡេស៊ី ហើយនេះគឺជាទីក្រុងដ៏មានមន្តស្នេហ៍បំផុតមួយក្នុងតំបន់អាស៊ី និងជាប់ចំណាត់ថ្នាក់ទី ១១ លើពិភពលោក នាមជាទីក្រុងដែលមានសន្ទុះសេដ្ឋកិច្ចខ្លាំងបំផុត។ ក្នុងហេតុផលនេះ មានក្រុមហ៊ុនចំនួន ៨ ក្នុងចំណោមក្រុមហ៊ុនធំៗលំដាប់ពិភពលោកទាំងជាង ៥០០ បានយកកូឡាឡាំពួរ ធ្វើជាកន្លែងបោះទីតាំងការិយាល័យកណ្ដាលរបស់ពួកគេ ហើយ១ក្នុងចំណោមនោះ គឺក្រុមហ៊ុនចម្រាញ់ប្រេង Petronas ដ៏ល្បីល្បាញ។
ដោយដាក់រហស្សនាមថា“ KL” និងនាមជា “ទីក្រុងសួននៃពន្លឺ” ទីក្រុងកូឡាឡាំពួរក៏ស្ថិតនៅលេខ ៥៥ ក្នុងចំណោមមជ្ឈមណ្ឌលហិរញ្ញវត្ថុកំពូលៗ នៅលើពិភពលោកផងដែរ។ ដូច្នេះហើយ គេឃើញមានអគារពាណិជ្ជកម្មខ្ពស់កប់ពពកឈរបង្អួតរាងច្រូងច្រាងរាប់រយ ក្លាយជាទិដ្ឋភាពទីក្រុងពេញដោយទំនើបកម្ម និងជារូបភាពសិល្បៈយ៉ាងល្អប្រណិត។
របាយការណ៍ឆ្នាំ ២០១៩ កូឡាឡាំពួរ មានដង់ស៊ីតេប្រជាជនជាង ១,៨លាននាក់ ទីក្រុងនេះ មានច្របាច់បញ្ចូលគ្នាបន្ថែមជាមួយសំណង់ស្ថាបត្យកម្មអាណានិគម និងទីកន្លែងធម្មជាតិ ព្រៃភ្នំមួយចំនួនទៀត បូករួមផ្លូវថ្នល់ស្អាតមើលស្ទើរមិនឃើញធូលី ធ្វើឲ្យកូឡាឡាំពួរ មិនត្រឹមជាទីកន្លែងពាណិជ្ជកម្ម តែក៏ជាទីក្រុងមានខ្យល់អាកាសល្អបរិសុទ្ធ និងស្រស់ស្រាយ ដែលអំណោយផលដល់ទេសចរណ៍ថែមទៀត។
ដូច្នេះហើយ គ្មានអ្វីចម្លែកទេ ដែលទីក្រុងនេះ គឺជាទីតាំងទាក់ទងទេសចរណ៍ដ៏សំខាន់របស់ម៉ាឡេស៊ី ក៏ដូចជាក្នុងតំបន់ទាំងមូល។ នេះនិយាយជារួម ប៉ុន្តែនិយាយដោយឡែក កូឡាឡាំពួរ មានតំបន់ទាក់ទាញសំខាន់ៗចំនួន៣ធំៗ ដែលត្រូវបានគេឲ្យនាមថាជាតំបន់ត្រីកោណមាសរបស់ក្រុង ក្នុងនោះមាន Bukit Bintang, KLCC និង Chinatown។ Petronas Twin Towers ដែលជាអគារភ្លោះកម្ពស់ខ្ពស់ជាងគេបំផុតក្នុងពិភពលោក(the world’s tallest twin skyscrapers) ស្ថិតក្នុងតំបន់ KLCC គឺជាកន្លែងទាក់ទាញទេសចរណ៍ខ្លាំងបំផុតរបស់ក្រុង។
ក្រៅពីនេះ ផ្សារទំនើបៗដែលមានដូចជា Pavilion KL និង Suria KLCC ជាដើម ដែលរមែងមានព្រឹត្តិការណ៍លក់ជាពិសេសញឹកញាប់ក្នុង១មួយឆ្នាំៗ ក៏ជាចំណុចទាក់ទាញភ្ញៀវទេសចរ ដ៏សំខាន់របស់ទីក្រុងបន្ថែមទៀតដែរ។ ដូច្នេះអាចថា គ្រប់គ្រាន់សម្រាប់ប្រិយមិត្តដែលមានបំណងធ្វើទេសចរណ៍ឆ្លងប្រទេសនាដំណាច់ឆ្នាំ អាចពិចារណា កូឡាឡាំពួរ របស់ម៉ាឡេស៊ីបាន។
ប៉ុន្តែមុនដល់ពេលនោះ តោះ...ទៅធ្វើទស្សនាចរនាពេលរាត្រី ក្នុងទីក្រុង "សួននៃពន្លឺ" ជាមួយក្រុមការងារយើងទាំងអស់គ្នាសិន!