អ្នកឆ្លងកូរ៉ូណានៅថៃ កើន១២២នាក់ថែមទៀត ក្រោយពលរដ្ឋសម្រុកចេញពីទីក្រុងបាងកក

2020-03-23 09:16:14
ព័ត៌មាន

2020-03-23 09:16:14
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកនាំពាក្យក្រសួងសុខាភិបាលថៃបានប្រកាសកាលពីថ្ងៃចន្ទទី២៣មីនាថា ថៃរកឃើញអ្នកឆ្លងវីរុសកូរ៉ូណាថ្មីចំនួន១២២នាក់បន្ថែមទៀត នាំអោយចំនួនអ្នកឆ្លងកូវីដ១៩នៅក្នុងប្រទេសនេះកើនដល់៧២១នាក់។

ករណីឆ្លងថ្មីនេះរួមមាន អ្នកជម្ងឺ២០នាក់ពាក់ព័ន្ធនឹងករណីឆ្លងមុនៗ ១០ករណីជាអ្នកឆ្លងចូលមកពីក្រៅប្រទេស និង៩២ករណីទៀតកំពុងរង់ចាំការស៊ើបអង្កេតអំពីថាតើពួកគេឆ្លងដោយវិធីណា។ ទោះជាមានអ្នកឆ្លងច្រើន ថៃមានអ្នកស្លាប់ដោយជម្ងឺឆ្លងនេះតែម្នាក់ ហើយ៥២នាក់បានជាចេញពីមន្ទីរពេទ្យនិង៦៦៨នាក់កំពុងសម្រាកព្យាបាលនៅក្នុងមន្ទីរពេទ្យ។ តាមពិតថៃជួបកំណើនអ្នកឆ្លងកូវីដ១៩នេះទើបតែបីបួនថ្ងៃនេះតែប៉ុណ្ណោះដោយកាលពីថ្ងៃអាទិត្យអាជ្ញាធរក៏បានរាយការណ៍អ្នកឆ្លងជិត២០០នាក់(១៨៨នាក់) នៅពេលអ្នកជំនាញព្រមានថា ចំនួនអ្នកឆ្លងអាចឡើងហួស១.០០០នាក់នៅ៧ថ្ងៃខាងមុខ។

ចំពេលមានកំណើននៃការឆ្លងនិងការបិទខ្ទប់ទីក្រុងបាងកក មនុស្សរាប់ម៉ឺននាក់បានសំរុកចេញពីទីក្រុងនិងចេញពីប្រទសថៃ។ សូមបញ្ជាក់ថា បន្ទាប់ពីអភិបាលក្រុងបាងកកបញ្ជាអោយបិទផ្សារបីសប្តាហ៍ ខេត្តជុំវិញចំនួន៥បានធ្វើតាម នាំអោយមនុស្សនាំគ្នាចេញពីទីក្រុងនិងបណ្តាខេត្ត។មនុស្សប្រមាណ៨ពាន់នាក់បានជិះរថយន្តក្រុងចេញពីបាងកកកាលពីថ្ងៃអាទិត្យ។កម្មករ ពលករអន្តោប្រវេសន៍ក៏ប្រញាប់ប្រញាល់នាំគ្នាចេញទៅតាមបណ្តាខេត្តជាប់ព្រំដែនមុនព្រំដែនបិទ។

ក្នុងពេលជាមួយគ្នា ក្រសួងមហាផ្ទៃបានណែនាំអោយអភិបាលខេត្តអោយតាមឃ្លាំមើលមនុស្សទៅពីក្រុងបាងកកចំពេលមានការព្រួយបារម្ភខ្លាចពួកគេនាំជម្ងឺទៅចម្លងនៅតាមខេត្ត៕

ប្រភព ៖ rasmeinews