១០កន្លែងពេញនិយមបំផុតនៅទីក្រុងកូឡាឡាំពួរ ឃើញហើយចង់ទៅលេង

2017-01-12 23:15:00
សេដ្ឋកិច្ច

2017-01-12 23:15:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ទីក្រុងកូឡាឡាំពួរ ប្រទេសម៉ាឡេស៊ី ត្រូវបានគេចាត់ទុកជាទីក្រុងដ៏ពេញនិយមមួយនៅអាស៊ី ដែលអ្នកទេសចរខ្មែរ និងបរទេសប្រាថ្នាចង់ទៅមើលអគារភ្លោះខ្ពស់ជាងគេបំផុតក្នុងលោក។

ទីក្រុងមួយនេះ បានផ្ដល់ឱកាសឲ្យអ្នកទេសចរស្គាល់ពីវប្បធម៌ចម្រុះគ្នា អាហាររបស់ជនជាតិភាគតិច និងសំណង់ស្ថាបត្យកម្មជឿនលឿនតាមបែបប្រទេសលោកខាងកើត និងខាងលិច។ សារព័ត៌មាន CNN ធ្លាប់ចាត់ថ្នាក់កូឡាឡាំពួរ ជាទីក្រុងល្អបំផុតមួយក្នុងលោកសម្រាប់ដើរទិញឥវ៉ាន់។ អាកាសធាតុទីក្រុងនេះអំណោយផលស្ទើរគ្រប់រដូវ ពិសេសខ្យល់ត្រូពិក។ តោះ ទស្សនាកន្លែងលំហែល្បីៗដែលទទួលភ្ញៀវទេសចរបានច្រើនជាងគេបំផុតប្រចាំទីក្រុង។

១០. ស្ថានីយរថភ្លើងកូឡាឡាំពួរ

ស្ថានីយនេះ ត្រូវបានរចនាឡើងតាមបែបអគារអាណានិគមលាយបញ្ចូលវប្បធម៌លោកខាងកើត និងខាងលិច រួមទាំងបែបឥស្លាម និងឥណ្ឌា។ វាត្រូវបានសាងសង់ឡើងនៅឆ្នាំ ១៩១០ ក្នុងតម្លៃកាលនោះ ២៣ ០០០ដុល្លារ សម្រាប់ដឹកអ្នកដំណើរទៅកាន់សិង្ហបុរី និងប្រទេសអាស៊ីអាគ្នេយ៍ផ្សេងទៀត។

៩. វិហារ Thean Hou

Thean Hou ជាវិហារពុទ្ធសាសនាធំជាងគេបំផុតមួយបែបប្រពៃណីចិននៅអាស៊ីអាគ្នេយ៍។ វិហារនេះបានបើកដំណើរការនៅឆ្នាំ ១៩៨៩ ដោយសហគមន៍ចិននៅម៉ាឡេស៊ី។ លើសពីនេះ Thean Hou ជាកន្លែងដ៏ពេញនិយមសម្រាប់ថតអាពាហ៍ពិពាហ៍ដោយមួយឆ្នាំមានប្រមាណ ៥ ០០០គូមករៀបការ។

៨. ទីលាន Berjaya Times Square

វាគឺជាបរិវេណដ៏ធំមួយមានផ្សារទំនើប និងសណ្ឋាគារផ្កាយប្រាំចំនួនពីរ។ ស្ថិតនៅលើផ្ទៃដី ៧០ម៉ឺនម៉ែត្រការ៉េ វាជាសំណង់អគារធំបំផុតលំដាប់ទី៥លើលោក។ ក្នុងផ្សារទំនើបមានតូបលក់បន្តជាង ១០០០កន្លែង ហាងលក់ម្ហូបអាហារ ៦៥កន្លែង និងកន្លែងបែបកម្សាន្តជាច្រើនផ្សេងទៀត។

៧. សារមន្ទីរ Islamic Arts Museum Malaysia

ជាសារមន្ទីរបែបសិល្បៈឥស្លាមធំជាងគេបំផុតនៅអាស៊ីអាគ្នេយ៍ និងបើកដំណើរការនៅឆ្នាំ ១៩៩៨ ដែលមានស្នាដៃសិល្បៈជាង ៧០០០ផ្ទាំង រាប់ចាប់តាំងពីគ្រឿងអលង្ការ រហូតដល់វិហារឥស្លាមចម្លងពីប្រទេសអារ៉ាប៊ីសាអ៊ូឌីត។ មិនត្រឹមតែមានស្នាដៃសិល្បៈពីមជ្ឈិមបូព៌ា និងម៉ាឡេស៊ីទេ តែថែមទាំងពីវប្បធម៌ចិន និងឥណ្ឌាទៀតផងជាមួយសាល១២បន្ទប់។

៦. ប៉ម Menara KL Tower

ប៉មនេះមានកម្ពស់ ៣៣៥ម៉ែត្រ សម្រាប់បម្រើគោលបំណងពីរ ទីមួយគឺជាប៉មទំនាក់ទំនង និងទីពីរសម្រាប់ទាក់ទាញភ្ញៀវទេសចរ ដោយមានភោជនីយដ្ឋាន និងសម្រាប់ឡើងមើលសម្រស់ទីក្រុងកូឡាឡាំពួរ។

៥. ឧទ្យាន KL Bird Park

វាជាកន្លែងកម្សាន្តបែបអេកូទេសចរណ៍ដែលមានសត្វបក្សីជាង ៣០០០ក្បាលចំនួន ២០០ប្រភេទ។ បក្សីទាំងនោះទៀតសោត ត្រូវបានបែងចែកជា៤ប្រភេទ ដោយ៣ប្រភេទអាចហោះហើរបានដោយសេរី និងមួយទៀតបក្សីក្នុងទ្រុង។ ចំណែកប្រតិបត្តិករឧទ្យាន និយាយថាបក្សីនៅទីនេះមានសត្វហោះហើរបានដោយសេរីធំជាងគេក្នុងលោក។

៤. សង្កាត់ Bukit Bintang

ជាកន្លែងទាក់ទាញភ្ញៀវទេសចរខ្លាំងបំផុតមួយនៅកូឡាឡាំពួរ ព្រោះវាមានហាងលក់ដូរ តូបលក់អាហារតាមចិញ្ចើមផ្លូវបែបជនជាតិចិន និងមជ្ឈមណ្ឌលកម្សាន្តជាច្រើន។

៣. ទីលាន Merdeka Square

ទីលាននេះជាបេះដូងនៃទីក្រុងកូឡាឡាំពួរ ឬជួនកាលគេហៅទីលានឯករាជ្យ ព្រោះទង់ជាតិម៉ាឡេស៊ីបង្ហូតនៅទីនេះលើកដំបូងនៅឆ្នាំ ១៩៥៧។ វាលស្មៅដ៏ខៀវខ្ចីស្ទើរគ្រប់រដូវ និងហ៊ុមព័ទ្ធដោយសំណង់អគារជុំវិញ ក៏ដូចជាសារមន្ទីរប្រវត្តិសាស្ត្រ ធ្វើឲ្យមនុស្សជាច្រើនទៅលេងឥតដាច់។

២. រូងទីសក្ការ Batu Caves

Batu Caves ជាកន្លែងគោរពបូជា បួងសួងបែបសាសនាហិណ្ឌូដ៏ពេញនិយមបំផុតនៅម៉ាឡេស៊ី។ អ្នកប្រតិបត្តិសាសនាហិណ្ឌូរាប់ម៉ឺននាក់ បានជួបប្រជុំគ្នារាល់ឆ្នាំដើម្បីប្រារព្ធពិធី Thaipusam ដោយអ្នកសម្ដែងលីសែងរបស់ធំៗដូចជា ថូ និងយកដែក ឬម្ជុលមុតស្រួចចាក់លើមុខមាត់ ដងខ្លួន គួរឲ្យស្រៀវសាច់។ ជណ្ដើរឡើងមានចំនួន ២៧២កាំ។

១. អគារភ្លោះ Petronas Twin Towers

អ្នកទេសចរជាច្រើន ចង់ទៅមើលអគារភ្លោះកម្ពស់ ៤៩១ម៉ែត្រ ជាមួយទេសភាពជុំវិញដ៏ស្រស់ស្អាត និងឡើងស្ពានឆ្លងអគារកម្ពស់ ១៧០ម៉ែត្រ។ អគារនេះបានចំណាយពេលសាងសង់៧ឆ្នាំប៉ុណ្ណោះ៕