សួនថ្មដ៏អស្ចារ្យ តាមពិតកើតចេញពីមន្ត្រីរដ្ឋម្នាក់លួចធ្វើដោយសម្ងាត់ កាលពីជាង ៦០ឆ្នាំមុន

2017-04-10 01:29:17
សេដ្ឋកិច្ច

2017-04-10 01:29:17
ចំនួនមតិ 0 | ចំនួនចែករំលែក 0

ចន្លោះមិនឃើញ

សួនថ្ម Rock Garden នៅទីក្រុង Chandigarh រដ្ឋ Punjab ប្រទេសឥណ្ឌា កំពុងទាក់ទាញមនុស្សជាច្រើនចូលទស្សនាកម្សាន្តរាល់ថ្ងៃ ព្រោះទិដ្ឋភាពប្លែកភ្នែកដូចក្នុងរឿងនិទាន។ តាមពិត សួនថ្មដ៏ធំនេះ ចាប់ផ្ដើមលេចចេញរូបរាងបន្តិចម្ដងៗ តាំងពីជាង ៦០ឆ្នាំមុន ដោយសារស្នាដៃមន្ត្រីរដ្ឋម្នាក់ ដែលឆ្លៀតពេលទំនេរ លួចធ្វើវាឡើងដោយសម្ងាត់។

Rock Garden ត្រូវបានគេហៅឈ្មោះមួយទៀតថា Nek Chand's Rock Garden ដោយសារវាកើតឡើងចេញពីស្នាដៃរបស់លោក Nek Chand ដែលជាមន្ត្រីនៅនាយកដ្ឋានវិស្វកម្ម នៃទីក្រុង Chandigarh។ ក្នុងឆ្នាំ១៩៥៧ លោក Nek Chand បានបែកគំនិត ឆ្លៀតយកពេលទំនេរ លួចធ្វើសួននេះឡើងពីវត្ថុដែលគេបោះបង់ចោលជាច្រើន បូករួមទាំងថ្មគ្រប់ម៉ូដ គ្រប់ម៉ាក ឆ្លាក់ចេញជារូបចម្លាក់ យ៉ាងប្លែកភ្នែក។

លោក Nek Chand បានបន្តធ្វើបែបនេះ អស់រយៈពេល ១៨ឆ្នាំ រហូតសួនថ្មលេចចេញរូបរាងលើផ្ទៃដី១២រ៉ៃ (ជិត ៥ហិកតារ)។ ក្នុងឆ្នាំ១៩៧៥ អាជ្ញាធរក្រុង Chandigarh បានប្រទះឃើញសួនថ្ម និងមានគម្រោងបំផ្លាញចោលវិញ ព្រោះជារឿងខុសច្បាប់ ប៉ុន្តែត្រូវបានមតិសាធារណជនប្រឆាំង និងការពារគំនិតរបស់លោក Nek Chand។

ដោយទទួលបានគាំទ្រយ៉ាងច្រើនលើសលុប អាជ្ញាធរក្រុងបានបើកភ្លើងខៀវឲ្យលោក Nek Chand គ្រប់គ្រងសួនដោយស្របច្បាប់ និងបន្ថែមបុគ្គលិក ៥០នាក់ ដើម្បីបន្តគម្រោង។ នៅឆ្នាំ១៩៧៦ សួនថ្ម Rock Garden ត្រូវបានបើកឲ្យទស្សនាកម្សាន្តជាសាធារណៈ ហើយមកដល់បច្ចុប្បន្នមានមនុស្សរាប់ពាន់នាក់គ្រប់ទិសទីទស្សនាជាប្រចាំ។ ចំណែកស្ថាបនិកគឺលោក Nek Chand បានស្លាប់ក្នុងឆ្នាំ២០១៥ នៅអាយុ ៩០ឆ្នាំ។

ពេលនេះ Rock Garden បានពង្រីកវិសាលភាពលើផ្ទៃដីជាង ៤០រ៉ៃ(ជាង ១៦ហិកតារ) ហើយសំណង់ទាំងអស់ ធ្វើឡើងពីវត្ថុដែលគេបោះបង់ចោល ដូចជាអំបែងចាន អំបែងកែវ អំពូលភ្លើង ដប គ្រឿងអគ្គិសនី ដុំថ្ម។ ក្រៅពីរូបចម្លាក់ប្លែកៗ ក៏នៅមានទឹកធ្លាក់សិប្បនិម្មិតពីស្នាដៃមនុស្សយ៉ាងស្រស់ត្រកាល និងជាទីថតរូបយ៉ាងទាក់ទាញ។

សំបុត្រចូលទស្សនាសួនថ្មដ៏ធំនេះ មានតម្លៃ ២០រូពី(ប្រហែល ១២០០រៀល) សម្រាប់មនុស្សពេញវ័យ និង ១០រូពី (ប្រហែល ៦០០រៀល) សម្រាប់កុមារ។ អ្នកចូលទៅទស្សនាភាគច្រើន សុទ្ធតែលាន់មាត់ស្រដៀងគ្នាថា ហេតុអ្វីបានជាមិនគិតយករបស់គ្មានតម្លៃមកច្នៃជាកន្លែងទេសចរណ៍ដ៏ទាក់ទាញដូចលោក Nek Chand?

ទស្សនារូបភាពដោយក្រុមការងារ Sabay៖