- 2018-06-11 04:37:22
- ចរាចរណ៍
នេះលេខ Hotline ខលមិនគិតថ្លៃ បើពលរដ្ឋឃើញប៉ូលិសធ្វើខុសច្បាប់
- 2018-06-11 04:37:22
- ចំនួនមតិ 0 | ចំនួនចែករំលែក 0
នេះលេខ Hotline ខលមិនគិតថ្លៃ បើពលរដ្ឋឃើញប៉ូលិសធ្វើខុសច្បាប់
ចន្លោះមិនឃើញ
ឯកឧត្តម កែវ សារុន អធិការងទទួលបន្ទុកការងារសណ្ដាប់ធ្នាប់ចរាចរណ៍ខណ្ឌ បានបញ្ជាក់ប្រាប់ Sabay ថា បើប៉ូលីសធ្វើខុសច្បាប់ ផាកពិន័យគ្មានចេញវិក្កយបត្រ ប្រើពាក្យសំឡុតយកម៉ូតូឬ រថយន្ដទៅស្នងការដ្ឋាន ដើម្បីជាការទារប្រាក់បន្ថែម ប្រជាពលរដ្ឋមានសិទ្ធិប្ដឹង ឬផ្ដល់ដំណឹងដល់ស្នងការដ្ឋានរាជធានីភ្នំពេញ តាមរយៈលេខ Hotline ០១២ ៩៩៩ ៩៩៩ និងលេខ ០៩៧ ៩៧៩៧ ៣៣៩ លេខនេះ ខលមិនគិតថ្លៃនោះឡើយ។
ជាមួយគ្នានោះ ប្រជាពលរដ្ឋក៏ត្រូវកត់ចំណាំឈ្មោះនៅលើហោប៉ៅអាវខាងស្ដាំ និងទីតាំងរបស់ប៉ូលីសឈរជើងឲ្យបានច្បាស់លាស់ផងដែរ។
ដោយឡែកសម្រាប់ប្រជាពលរដ្ឋធ្វើល្មើសច្បាប់ចរាចរណ៍ផ្លូវគោក នឹងត្រូវប្រឈមការផាកពិន័យ។ យោងតាមអនុក្រឹត្រ ស្ដីពីការពិន័យអំពើល្មើសនឹងច្បាប់ស្ដីពីចរាចរណ៍ផ្លូវគោក នៅមាត្រាទី៦ អំពើចំនួនទឹកប្រាក់ត្រូវពិន័យ ក្នុងនោះចំពោះអ្នកបើកបរទោចក្រយានយន្ត ឬទោចក្រយានយន្ត សណ្ដោងរ៉ឺម៉ក ឬត្រីចក្រយានយន្តចំនួនទឹកប្រាក់ ១ម៉ឺន ៥ពាន់រៀល អ្នកបើកបរយានយន្តធុនស្រាលចំនួនទឹកប្រាក់ ២ម៉ឺន៥ពាន់រៀល និងអ្នកបើកបរយានយន្តធុនធ្ងន់ចំនួនទឹកប្រាក់ ៥ម៉ឺនរៀល។
ដោយឡែកអំពើល្មើសវិញមានដូចជា៖
ក. អ្នកបើកបរទោចក្រយានយន្ត និងអ្នករួមដំណើរព្រមទាំងកុមារដែលមានអាយុ០៣ឆ្នាំឡើង ទៅមិនពាក មួកសុវត្ថិភាព ឬពាក់មួកមិនត្រឹមត្រូវតាមស្ដង់ដារជាតិ ឬពាក់មួកសុវត្ថិភាព មិនដាក់គន្លឹះខ្សែសុវត្ថិភាព។ ការពិន័យលើ្មសនេះ ត្រូវគិតតាមចំនួនអ្នកប្រព្រឹត្ត លើកលែងកុមារ។
អ្នកបើកបរត្រីចក្រយានយន្ត អ្នកបើកបរទោចក្រយានយន្តសណ្ដោងរ៉ឺម៉កសណ្ដោងមិនពាក់មួកសុវត្ថិភាព ឬពាក់មួកសុវត្ថិភាពមិនត្រឹមត្រូវតាមស្ដង់ដារជាតិ ឬពាក់មួកសុវត្ថិភាព មិនដាក់គន្លឹះខ្សែសុវត្ថិភាព។
ខ. អ្នកបើកបរយានយន្តដែលមិនបានយកភ្ជាប់តាមខ្លួននូវឯកសារដើមរួមមាន បណ្ណបើកបរ វិញ្ញាបនបត្រត្រួតពិនិត្យលក្ខណៈបច្ចេកទេសយានយន្ត និងលិខិតអនុញ្ញាតធ្វើអាជីវកម្មចំពោះរថយន្តដែលប្រអាជីវកម្មដឹកជញ្ជូន។
គ. អ្នកបើកបររថយន្តគ្រប់ប្រភេទ និងអ្នករួមដំណើរជិះកៅអីមុខនៃរថយន្តមិនពាក់ខ្សែក្រវ៉ាត់សុវត្ថិភាព។
ឃ. អ្នកបើកបរយានយន្តឈប់ ឬចតល្មើសនឹងមាត្រា២៣ នៃច្បាប់ចរាចរណ៍ផ្លូវគោក។
ង. អ្នកបើកយានយន្តបើកបរដោយកុងទ័រល្បឿនមិនដំណើរការ។
ច. អ្នកយានយន្តហួសល្បឿនកំណត់ចាប់ពី ០១ ទៅ ១៩គីឡូម៉ែត្រក្នុង១ម៉ោង។
ឆ. អ្នកបើកបរយានយន្តប្រើប្រាស់ទូរសព្ទដៃគ្មានឧបករណ៍សម្លេងភ្ជាប់ទំនាក់ទំនងពេលកំពុងបើកបរ។
ជ. អ្នកបើកបរយានយន្តប្រើសញ្ញាសូរស័ព្ទមិនត្រឹមត្រូវតាមបទប្បញ្ញតិ្ដច្បាប់។
ឈ. អ្នកបើកបរយានយន្តដឹកអ្នកដំណើរលើសចំណុះ។ ច្បាប់ចរាចរណ៍ផ្លូវគោកអាចលើកលែងបានក្នុងករណីដឹកអ្នកជម្ងឺ។
សូមរង់ចាំអានបន្ត ទាក់ទិននឹងច្បាប់ចរាចរណ៍ផ្លូវគោក Sabay នឹងចែករំលែកដំណឹងជូនប្រិយមិត្តបន្ទាប់ទៀត។