- 2018-08-31 05:50:00
- សេដ្ឋកិច្ច
ប្លែក! មកដឹង ៤ចំណុច ពីផ្សាររាត្រីថ្មី១ទៀត សង់យ៉ាងប្រណិត តាមរចនាបថខ្មែរ ក្រោមជំនួយជប៉ុន
- 2018-08-31 05:50:00
- ចំនួនមតិ 0 | ចំនួនចែករំលែក 0
ប្លែក! មកដឹង ៤ចំណុច ពីផ្សាររាត្រីថ្មី១ទៀត សង់យ៉ាងប្រណិត តាមរចនាបថខ្មែរ ក្រោមជំនួយជប៉ុន
ចន្លោះមិនឃើញ
ថ្មីៗនេះ ផ្សាររាត្រីថ្មី១ទៀត របស់កម្ពុជាទើបបានដាក់ឲ្យប្រើប្រាស់ជាផ្លូវការហើយ ដែលមានទីតាំងក្នុងក្រុងបាត់ដំបង នៃខេត្តបាត់ដំបង។
ផ្សារកម្សាន្តពេលយប់១នេះ បានសាងសង់យ៉ាងស្អាត តាមរចនាបថប្រណិតបែបខ្មែរ ក្រោមហិរញ្ញប្បទានឥតសំណង ពីរដ្ឋាភិបាល នៃប្រទេសជប៉ុន។
ឯកឧត្ដម ងួន រតនៈ អភិបាល នៃគណៈអភិបាលខេត្តបាត់ដំបង និងថ្នាក់ដឹកនាំសំខាន់ផ្សេងទៀត បានចូលរួមសម្ពោធ និងដាក់ឲ្យប្រើប្រាស់ជាផ្លូវការផ្សាររាត្រីនេះ។ នេះបើតាមការចុះផ្សាយ របស់ទំព័រហ្វេសប៊ុក រដ្ឋបាលខេត្តបាត់ដំបង។
តាមទំព័រហ្វេសប៊ុក ដដែល បានសរសេរបន្ត ពីចំណុចសំខាន់ៗ អាចបញ្ជាក់ថា នេះមិនមែនគ្រាន់តែជាផ្សារលក់ដូរពេលយប់ធម្មតា ប៉ុន្តែផ្សាររាត្រី នៃខេត្តទេសចរណ៍ធំមួយនេះ ត្រូវបានសាងសង់ឡើងយ៉ាងប្រណិត ក្រោមលក្ខណៈពិសេស ៤ចំណុចនេះ។
១. ទីតាំងពិសេស
ផ្សាររាត្រីថ្មីនេះ មានទីតាំងអំណោយផលល្អសម្រាប់អាជីវករ និងអ្នកទេសចរណ៍ ទីតាំងស្ថិតនៅក្នុងសង្កាត់ស្វាយប៉ោ និងនៅចំកណ្ដាល ក្រុងបាត់ដំបង នៅចន្លោះរវាងសាលាខេត្ត និងដងស្ទឹងសង្កែ ។
២. លក្ខណៈពិសេសជួយអាជីវករក្រីក្រ
គម្រោងនេះមាន គោលបំណងសាកល្បង ក្នុងការអភិវឌ្ឍទីផ្សារ ដែលជាវិធីសាស្ត្រមួយ ដើម្បីលើកស្ទួយជីវភាពរស់នៅ របស់ប្រជាជនតាមទន្លេមេគង្គ។ ក្រុមអាជីវករ ផ្សារក្រីក្រ មានចំនួន ១៥២នាក់ ស្រីមាន ១៣៧នាក់ បានចងក្រងជាសមាគមអាជីវករ ដោយទទួលការបណ្ដុះបណ្ដាល និងថវិកាសម្រាប់អាជីវកម្មក្រោមការគ្រប់គ្រង ដោយគណៈកម្មការគ្រប់គ្រងផ្សាររាត្រី។
៣. ការសាងសង់ និងថវិកាចំណាយ
ការសាងសង់ដឹកនាំ ដោយអភិបាលក្រុង និងគណៈកម្មាធិការគ្រប់គ្រងផ្សារ ក្រោមការចំណាយថវិកាអស់ ជាង ៣០០,០០០ ដុល្លារ (៣០ម៉ឺនដុល្លារ) នៅលើទំហំផ្ទៃដី ៣,០៦៤ ម៉ែត្រក្រឡា។
៤. ស្ថិតក្នុងគម្រោងអភិវឌ្ឍន៍សំខាន់១
ផ្សាររាត្រីថ្មី នៃក្រុងបាត់ដំបង គឺស្ថិតនៅក្នុងមហាអនុតំបន់ទន្លេមេគង្គ ដែលជាគម្រោងអភិវឌ្ឍន៍ក្រុងរបៀង សម្រាប់លើកស្ទួយជីវភាពរស់នៅរបស់ប្រជាពលរដ្ឋ នៅតាមអនុតំបន់ទន្លេមេគង្គ ខេត្តបាត់ដំបង ដែលត្រូវបានផ្ដល់ហិរញ្ញប្បទានឥតសំណង ដោយមូលនិធិជប៉ុន ដើម្បីកាត់បន្ថយភាពក្រីក្រ។
សូមបញ្ជាក់ថា ផ្សាររាត្រីក្នុងក្រុងបាត់ដំបងនេះ បានសម្ពោធ និងដាក់ឲ្យប្រើប្រាស់ជាផ្លូវការ នៅថ្ងៃទី ៣០ ខែសីហា ឆ្នាំ២០១៨។
ក្រៅពីក្រុងបាត់ដំបង ប្រទេសកម្ពុជាក៏មានផ្សារលក់រាត្រីដ៏សកម្ម នៅតាមទីតាំងតំបន់ទេសចរណ៍ធំៗ ៤ទៀត មានដូចជា ខេត្តសៀមរាប ក្រុងភ្នំពេញ ក្រុងព្រះសីហនុ និងខេត្តកំពត។
