- 2018-09-01 04:00:11
- ព័ត៌មាន
ផ្អើលអ្នកភូមិ គ្រួសារមួយរកឃើញរូបសំណាកបុរាណមួយកប់ក្នុងដីអាយុខ្ទង់ពាន់ឆ្នាំ
- 2018-09-01 04:00:11
- ចំនួនមតិ 0 | ចំនួនចែករំលែក 0
ផ្អើលអ្នកភូមិ គ្រួសារមួយរកឃើញរូបសំណាកបុរាណមួយកប់ក្នុងដីអាយុខ្ទង់ពាន់ឆ្នាំ
ចន្លោះមិនឃើញ
កាលពីរសៀលម្សិលមិញគ្រួសារមួយនៅក្នុងស្រុក ទ្រាំងខេត្តតាកែវ បានប្រទះឃើញរូបសំណាកបុរាណមួយនៅពេលឈូសឆាយដីក្រោយផ្ទះរបស់ខ្លួនសម្រាប់ដាំដំណាំ។
ម្ចាស់ដីលោកង៉ែត អូន និង អ្នកស្រី ចែម សាវេត ដែលរស់នៅក្នុងភូមិអូពោធិ ឃុំសំបួរ ស្រុកទ្រាំងប្រាប់ Sabay ថាពួកគាត់មានដីមួយកន្លែងនៅក្រោយផ្ទះដែលកាលពីមុនជាទីទួល ដែលអ្នកខ្លះថាជាទួលបុរាណ និងធ្លាប់មានជនមួយចំនួនមកជីករកវត្ថុបុរាណផង។ អ្នកស្រីចែម សាវេតថា ដីនេះអ្នកស្រីឈូសឆាយកាប់គាស់ក្នុងបំណងដាំដំណាំ ដោយមិនដឹងទេថាមានរូបសំណាកបុរាណនៅក្នុងដីនោះ បើទោះបីជាធ្លាប់មានអ្នកខ្លះមកជីករកកាលយូរឆ្នាំមកហើយក៏ដោយ។
អ្នកស្រី និងស្វាមីថាខ្លួនមិនដឹងថារូបសំណាកនេះមានអាយុកាលប៉ុន្មាន ឬនៅសម័យកាលណានោះទេ តែអ្នកភូមិខ្លះប្រាប់អ្នកស្រីថាជារូបសំណាកព្រះនាង លីវយី នៅសតវត្សត៍ទី១។
«ខ្ញុំនឹងស្វាមីមានចិត្តរំភើបណាស់ បានឃើញរូបសំណាកនេះ ខ្ញុំមិននឹងស្មានថាខ្ញុំបាន ជួបរូបសំណាកបុរាណបែបនេះ...ហើយដំណឹងនេះបានធ្វើឲ្យអ្នកភូមិភ្ញាក់ផ្អើល និងបានមកចោមរោមមើលជាច្រើន...ខ្ញុំបានប្រគល់ឲ្យអាជ្ញាធរមូលដ្ឋានដើម្បីរក្សាទុក»។ អ្នកស្រី ចែម សាវេត បន្ថែម។
ចំណែកលោក នង ប៊ុនរី មេភូមិអូពោធិ មានប្រសាសន៍ថាដើម្បីរក្សាសុវត្ថិភាពដល់ម្ចាស់ផ្ទះខាងប៉ូលិសរដ្ឋបាលឃុំបានយករូបសំណាកមករក្សាទុកសិន ទម្រាំដល់ពេលបញ្ជូនទៅសារមន្ទីខេត្ត។ ទោះយ៉ាងណាលោកថារូបនេះមិនទាន់មានការអះអាងពីមន្ត្រីជំនាញថាជារូបអ្វីនៅឡើយទេគ្រាន់តែជាការអះអាងតៗគ្នាប៉ុណ្ណោះថារូបព្រះនាង លីវយី៕