- 2019-01-28 09:39:55
- ព័ត៌មាន
បង្កើតភាពរីកចម្រើនឲ្យខ្លួនរាល់ថ្ងៃដោយទម្លាប់សាមញ្ញ ៦នេះ ធ្វើបានអាចឃើញលទ្ធផលភ្លាមៗ
- 2019-01-28 09:39:55
- ចំនួនមតិ 0 | ចំនួនចែករំលែក 0
បង្កើតភាពរីកចម្រើនឲ្យខ្លួនរាល់ថ្ងៃដោយទម្លាប់សាមញ្ញ ៦នេះ ធ្វើបានអាចឃើញលទ្ធផលភ្លាមៗ
ចន្លោះមិនឃើញ
ចង់បានជីវិតពោរពេញដោយភាពវិជ្ជមាន និងជោគជ័យមិនអាចខ្វះទម្លាប់ល្អបានឡើយ។ ដើម្បីឲ្យខ្លួនឯងមានទម្លាប់ល្អ ដែលអាចជួយជំរុញភាពរីកចម្រើនទាំងប្រាជ្ញា ស្មារតី និងរបៀបរស់នៅនោះ មានរឿង ៦ យ៉ាងសាមញ្ញបំផុត ដែលអ្នកគួរចាប់ផ្តើមធ្វើឥលូវ រៀងរាល់ថ្ងៃ នឹងអាចឃើញលទ្ធផលលេចចេញភ្លាមៗ ដូចជា ៖
១. សង្កេតឲ្យបានច្រើន ៖ ទៅណាក៏ដោយ អ្នកគួរចំណាយពេលខ្លះមើលជុំវិញខ្លួនឯងដោយយកចិត្តទុកដាក់ មិនចំពោះតែមនុស្សដែលអ្នកកំពុងទំនាក់ទំនងនោះទេ។ ពិភពលោកពោរពេញដោយរឿងរ៉ាវជាច្រើន មានទាំង សកម្មភាព រូបភាព មេរៀន គំនិត កំហុស និងបទពិសោធន៍ដែលអ្នកអាចរៀនសូត្រពីវា។
២. ប្រមូលគំនិតថ្មី ៖ បើអ្នកប្រទះឃើញអ្វីមួយគួរឲ្យចាប់អារម្មណ៍ ត្រូវកត់ត្រាវាទុកក្នុងកូនសៀវភៅ ឬថតវាទុកភ្លាម ទើបមិនភ្លេច។ រៀបចំវាជា Collection ហើយពេលទំនេរគួរយកមកមើល ធានាថាអ្នកនឹងទទួលបានអ្វីម្យ៉ាងដែលថ្មីពីការកត់ត្រានេះ។
៣. អានឲ្យច្រើន ៖ ការអាន គឺជាការវិនិយោគដ៏ល្អបំផុតនៃពេលវេលារបស់អ្នក។ គួរអានឲ្យបានយ៉ាងហោចណាស់ ៣០ នាទីក្នុងមួយថ្ងៃ។ តិចនិកជួយឲ្យអ្នកបន្តអានបានដោយមិនបោះបង់ គឺត្រូវដាក់សំនួរខ្លួនឯងថា អ្នកចង់ដឹងអ្វីខ្លះពីសៀវភៅនេះ ហើយប្រឹងប្រែងស្វែងរកចម្លើយពីក្នុងសៀវភៅ។ បើទើបចាប់ទម្លាប់អាន គួរជ្រើសរើសសៀវភៅស្តើងល្មម ហើយដាក់កំហិតខ្លួនឯងឲ្យច្បាស់ថាត្រូវតែអានឲ្យចប់យ៉ាងហោចណាស់១ក្បាលនោះ។
៤. វិភាគថ្ងៃរបស់អ្នកជាប្រចាំ ៖ រាល់យប់មុនពេលចូលគេង គួរចំណាយពេលយ៉ាងហោចណាស់ ១០នាទីវិភាគថ្ងៃរបស់អ្នក មើលថាថ្ងៃនេះមានអីគួរឲ្យចាប់អារម្មណ៍ខ្លះ ហើយអ្នករៀនសូត្របានអ្វីខ្លះ ពិចារណាឡើងវិញពីអ្វីដែលអ្នកធ្វើបានល្អ និងកំហុសដែលអ្នកបានបង្កើត។
៥. ចាប់កាន់ប៊ិចសរសេរ ៖ គុណតម្លៃធំបំផុតនៃការសរសេរ គឺវានឹងរៀបចំគំនិតរញ៉េរញ៉ៃរបស់អ្នកឲ្យមានរៀបរបៀបរៀបរយ ហើយបណ្តុះឲ្យអ្នកនូវស្មារតី ហ្មត់ចត់ និង ប្រិតប្រៀង។ ពេលអ្នកសរសេរ អ្នកនឹងត្រូវគិតដើម្បីរៀបចំឃ្លាឃ្លោងឲ្យបានល្លូនល្អ និងគិតដល់ជម្រើសនៃពាក្យ។ ដូច្នេះហើយបើអ្នកចាប់ផ្តើមសរសេរបានល្អ របៀបនិយាយស្តីរបស់អ្នកក៏រីកច្រើនទៅតាមនោះដែរ។
៦. ចូលគេងលឿន និងភ្ញាក់ពីព្រលឹម៖ កំណត់ម៉ោងដែលខ្លួនត្រូវចូលគេង និងភ្ញាក់ឲ្យទៀងទាត់បានមានន័យថាអ្នកមានសមត្ថភាព រៀបចំជីវិតខ្លួនឯងឲ្យមានររបៀបរៀបរយបានមួយផ្នែកហើយ។ ដំណេកគ្រប់គ្រាន់ជួយឲ្យខួរក្បាលធ្វើការបានល្អ ហើយអារម្មណ៍ក៏ស្រស់ស្រាយរាល់ថ្ងៃដែរ។
ក្រៅពីនេះដាច់ខាតកុំមើលរំលងទទម្លាប់ញ៉ុំាអាហារ ៣ពេលឲ្យទៀងទាត់ និងហាត់ប្រាណផង ដើម្បីជួយឲ្យមានសុខភាពរឹងមាំ ព្រោះថាបើសុខភាពធ្លាក់ចុះហើយមិនងាយបកក្រោយបានឡើយ ហើយអ្នកក៏មិនអាចធ្វើកិច្ចការដែលរៀបរាប់ទាំងអស់ខាងលើនេះបានដែរ៕
