កម្ពុជា-ថៃ ចាប់ដៃគ្នាបើកទំព័រប្រវត្តិសាស្ត្រថ្មីមួយទៀត តាមរយៈស្ពាន ស្ទឹងបត់-បានណងអៀន

2019-04-22 05:12:02
ចរាចរណ៍

2019-04-22 05:12:02
ចំនួនមតិ 0 | ចំនួនចែករំលែក 0

ចន្លោះមិនឃើញ

កម្ពុជា និងថៃ បានបើកទំព័រប្រវត្តិសាស្ត្រថ្មីមួយទៀត តាមរយៈនៃការធ្វើឲ្យប្រសើរឡើងការធ្វើពាណិជ្ជកម្មឆ្លងកាត់ព្រំដែនរវាងប្រទេសទាំងពីរ ក្រោយសម្ដេចនាយករដ្ឋមន្ត្រីសម្ដេច ហ៊ុន សែន នាយករដ្ឋមន្រ្តីកម្ពុជា និងលោក ប្រាយុទ្ធ ចាន់អូចា នាយករដ្ឋមន្ត្រីថៃ បានអញ្ជើញចាក់បេតុង តភ្ជាប់មុខតំណស្ពានស្ទឹងបត់-បានណងអៀន កាលពីព្រឹកថ្ងៃទី២២ ខែមេសា ឆ្នាំ២០១៩នេះ។

សម្តេច ហ៊ុន សែន នាយករដ្ឋមន្រ្តីកម្ពុជា និងលោក ប្រាយុទ្ធ ចាន់អូចា នាយករដ្ឋមន្រ្តីថៃ បានអញ្ជើញចាក់បេតុងតភ្ជាប់មុខតំណស្ពានស្ទឹងបត់-បានណងអៀន កាលព្រឹកមិញ

ស្ពានខាងលើនេះត្រូវបានកសាងឡើងកងវិស្វកម្មនៃកងទ័ពភូមិន្ទនៃព្រះរាជាណាចក្រថៃ ហើយសិក្សា និងត្រួតពិនិត្យបច្ចេកទេសដោយនាយកដ្ឋានហាវ៉េ (DOH) ក្រសួងដឹកជញ្ជូនថៃ ក្រោមជំនួយឥតសំណងពី រាជរដ្ឋាភិបាលថៃប្រមាណជា ៦៧០លានបាត (ស្មើនឹងប្រមាណជាង ១៩លានដុល្លារអាមេរិក)។ ក្រៅពីជំនួយឥតសំណងពីរាជរដ្ឋាភិបាលថៃ លើគម្រោងសាងសង់ស្ពានខាងលើ រាជរដ្ឋាភិបាលកម្ពុជាបានចូលរួមថវិកាបដិភាគសម្រាប់ការដោះស្រាយផលប៉ះពាល់ការបោសសម្អាតមីន យុទ្ធភណ្ឌមិនទាន់ផ្ទុះ និងពន្ធអាករផ្សេងៗ។

គម្រោងសាងសង់ស្ពាននេះត្រូវបានរាជរដ្ឋាភិបាលប្រទេសទាំងពីរបានផ្ដួចផ្ដើមគំនិតរៀបចំតាំងពីឆ្នាំ ២០០៧ មកម៉្លេះ ដោយភ្ជាប់ជាមួយគម្រោងបើកច្រកទ្វារព្រំដែនអន្តរជាតិស្ទឹងបត់-បាន ណងអៀន។ ដ្បិតតែគម្រោងនេះប្រើប្រាស់រយៈពេលយូរក៏ពិតមែន សម្ដេចតេជោ ហ៊ុនសែន បានថ្លែងក្នុងសន្ទរកថាឲ្យដឹងថា យើងប្រើរយៈពេលយូរក្នុងការរៀបចំគម្រោង យ៉ាងណាក៏ពេលនេះសុបិនបានក្លាយជាការពិត វាជាផលវិជ្ជមាននៃកិច្ចសហប្រតិបត្តិការដ៏ស្អិតរមួតរវាងប្រទេសទាំងពីរ។

សម្ដេចតេជោ ហ៊ុន សែន បន្ថែមថា ស្ពាននេះអាចនិយាយបានថាជាស្ពានភ្ជាប់និស្ស័យរវាងប្រជាជនខេត្តបន្ទាយមានជ័យ និងប្រជាជនខេត្តស្រះកែវ។ និយាយជារួមស្ពាននេះគឺភ្ជាប់និស្ស័យរវាងប្រជាជនកម្ពុជា និងប្រជាជនថៃ ទាំងមូលដែលត្រូវបានកត់ត្រាក្នុងប្រវត្តិសាស្ត្រនៃប្រទេសទាំងពីរ។

ស្ពានខាងលើនេះមានប្រវែង ៦២០ម៉ែត្រ ទទឹង១៧ម៉ែត្រ ដោយនៅផ្នែកកម្ពុជាមានប្រវែង ២១៥ម៉ែត្រ នៅផ្នែកខាងថៃមានប្រវែង ៤០៥ម៉ែត្រ ហើយនៅចំណុចដែលសាងសង់ស្ពាន ស្ទឹងមានទទឹងប្រមាណ ៣០ម៉ែត្រ តែអ្នកបច្ចេកទេសបានសាងសង់ប្រឡោះស្ពានដល់ទៅ ៦០ម៉ែត្រ ដោយសសរស្ពានទាំងសងខាងស្ទឹង ឈរផុតមាត់ស្ទឹងប្រមាណ ១៥ម៉ែត្រ សំដៅការពារប្រែប្រួលបរិស្ថានព្រំដែន ទៅតាមអនុសាសន៍របស់គណៈកម្មការចម្រុះព្រំដែនកម្ពុជា (JBC)។