បើ​អ្នកជា​ហ្វេន Avengers និង​ Iron Man អ្នក​ច្បាស់ជាស្គាល់មហាសេដ្ឋីរូបសង្ហារ Tony Stark ដែល​មានឈ្មោះពិតថា Robert Downey Jr។ គិត​ត្រឹមឆ្នាំ២០១៩ នេះ​ លោក​បាន​ឈានចូល​វ័យ​ ៥៤ឆ្នាំហើយ  និង​ជាតារាហូលីវូ​ជួរមុខគេ​មួយដ៏មានប្រជាប្រិយភាព ​ដែល​ត្រូវ​បាន​អ្នកគាំទ្រស្រលាញ់ និង​ស្ញប់ស្ញែង​ជាទីបំផុត។ មិនមែនព្រោះតែលោក​សម្តែង​ជា​តួអង្គ Superhero បានសមល្អឥតខ្ចោះតែមួយ​មុខទេ តែព្រោះ​លោកជាបុគ្គលគំរូ​ម្នាក់ក្នុង​សង្គម ​ដែល​ធ្លាប់​ធ្លាក់ដល់ចំណុចទាបបំផុតក្នុង​ជីវិត​ ហើយ​អាចងើបឈរឡើងកសាង​ជីវិត​ថ្មី​ដោយ​​ជោគជ័យ។

រំលឹកដល់ឆាកជីវិតដែលខ្មៅងងឹតក្នុង​អតិតកាល Robert Downey Jr ​បាននិយាយ​​ថា​ «ត្រូវចងចាំ ទោះ​អ្នក​បាន​ធ្លាក់​ដល់បាត មិនមែនមានន័យថា​អ្នកត្រូវ​តែនៅទីនោះរៀងរហូត​ទេ​»។

តើមានអ្វីខ្លះកើតឡើងខ្លះ​ក្នុង​ជីវិត​លោក​?

​កើតក្នុងឆ្នាំ ១៩៦៥ នៅ​សង្កាត់ ម៉ាហាតាន ក្នុងទីក្រុង​ New York  ក្នុងត្រកូល​អ្នកសិល្បៈដែល​មានឪពុក​ជា​​ផលិតករកុន​ ម្តាយ​ជាតារាភាពយន្ត លោកត្រូ​វបានឪពុកដែលជា​អ្នក​ប្រើគ្រឿងញៀនស្រាប់ នាំ​ប្រើ​គ្រឿងញៀនតាំងពីអាយុ ៦ឆ្នាំមកម្ល៉េះ។

ចន្លោះឆ្នាំ​ ១៩៩៦ ដល់​ ២០០១ Robert Downey Jr ត្រូវ​បាន​ចាប់​ខ្លួន​ជាច្រើនដង​ពាក់ព័ន្ធ​នឹង​បទ​ឧក្រិដ​ប្រើប្រាស់​គ្រឿងញៀន។ លោក​ធ្លាប់​ឆ្លងកាត់​កម្មវិធីស្តារនិតិសប្បទា​រ និង​ព្យាយាមផ្តាច់គ្រឿងញៀន​ជាច្រើន​លើកច្រើនសារតែមិនជោគជ័យសោះ ដោយកត្តានេះ​ហើយ​​ថែមទាំង​បានបំផ្លាញ​ជីវិតអាពាហ៍ពិពាហ៍លើកទី១របស់លោកទៀត ​។ ដោយ​សារ​តែការ​ប្រើប្រាស់គ្រឿង​ញៀនយ៉ាង​ជោកជាំ កាន់កាំភ្លើង​ ធ្វើឲ្យលោកត្រូវជាប់គុកជាច្រើនដង ហើយ​ចុងក្រោយ​លោកក៏ត្រូវ​បាន​​កាត់ទោសឲ្យជាប់​គុក ១ឆ្នាំ។

អ្វីដែលធ្វើឲ្យជីវិតលោកផ្លាស់ប្តូរ​ពីខ្មៅមកសនោះ គឺនៅឆ្នាំ ២០០៣ ពេល​ដែលលោក​​បាន​ជួបស្នេហ៍ពិត​ គឺ​​ ​ Susan Levin ដែលជា​ប្រពន្ធបច្ចុប្បន្នរបស់លោក​។ នាង​បានទទូច​ឲ្យលោកត្រូវ​តែ​​ផ្តាច់​គ្រឿងញៀន​ឲ្យ​បានជារៀង​រហូត​ ទើបនាងព្រមរៀបការជាមួយ។ គឺ​គ្រានោះហើយ លោកបានសម្រេច​ចិត្ត​​​បោះចោល​គ្រឿងញៀន​ទាំងអស់​ ហើយ​ចាប់ផ្តើមតាំងចិត្ត​ ធ្វើ​សម្មាធិ យូហ្គា​ និង​ហាត់​ក្បាច់គុនជាច្រើនស្ទើរតែរៀងរាល់ថ្ងៃ និង​ចូលរួម​វគ្គ ១២ជំហានជាដើម ដើម្បី​ជម្នះភាពញៀន​រហូត​ដល់​បានសម្រេច​។

លោក​បាន​សរសើរ​ប្រពន្ធទី២របស់លោក​ថា​ ជាចំណែកដ៏ធំមួយ​ ជួយ​ឲ្យលោក​យកឈ្នះគ្រឿងញៀន និង​ទម្លាប់​ស្រវឹងខួប ហើយបានត្រួសត្រាយផ្លូវ​ឲ្យ​លោក​រកឃើញភាពជោគជ័យជាថ្មីក្នុងអាជីព ដោយ​លោក​បាន​លើកឡើងដោយ​មានមោទនភាពថា «នៅក្រោយខ្នង​បុរសល្អម្នាក់​ តែងមាន​ស្ត្រីដ៏អស្ចារ្យមួយរូប​»។

សមរភូមដ៏ធំមួយ​ទៀត​ក្នុង​ជីវិត​របស់​ Robert Downey Jr គឺ នៅ​ឆ្នាំ ២០១៨ ពេល​លោក​​ត្រូវ​បាន​អញ្ចើ​ញ​ឲ្យ​​សម្តែង​ជាតួអង្គ  Iron Man របស់​ Mavel ដែលតួអង្គនេះ​ហើយ​ ​ធ្វើ​ឲ្យ​ប្រជាប្រិយភាពរបស់លោក​ឡើងដល់ចំណុចកំពូល។ លោក​បន្ត​ឡើង​កូដជាលំដាប់​ក្នុង​រយៈពេល​ជាង​ ១០ឆ្នាំ ជាតួ Iron Man ២ និង ៣  និង​ ការសម្តែង​ក្នុង​រឿង Avengers, Age of Ultron, Captain America: Civil War, Spider-Man: Homecoming, Avengers: Infinity War ​ហើយ​ក្នុងឆ្នាំ ២០១៩នេះ លោក​បាន​ធ្វើ​អ្នក​គាំទ្រទប់ទឹកភ្នែកមិនបាន​ តាមរយៈការ​សម្តែង​របស់លោកក្នុងរឿង​ខ្នាតធំដែល​រកចំណូល​បានច្រើនជាងគេ​ក្នុងប្រវត្តិសាស្ត្រភាពយន្ត​ហូលីវូដ​ គឺ Avengers End Game។ បច្ចុប្បន្ន​លោកបានក្លាយជា​តារាហូលីវូដដែល​ស៊ីថ្លៃជាងគេ ជាមួយទ្រព្យសម្បត្តិ​សរុប ៣០០លានដុល្លារ។

មេរៀន​ជីវិត​របស់​ Robert Downey Jr បានបង្ហាញឲ្យឃើញថា គ្រប់គ្នា​អាច​ធ្វើ​បាន​ដរាបណា​គេ​មានការតាំងចិត្តមោះមុត និង​ដឹង​ច្បាស់ពីគោលដៅដែលខ្លួនចង់ទៅដល់​។ លោកបាន​ផ្តាំផ្ញើរទៅ​មនុស្សគ្រប់គ្នា ថា​គ្មានអ្នក​ណាម្នាក់ដែលមិនធ្លាប់ធ្វើ​ខុសនោះទេ សំខាន់គឺត្រូវ​ប្រឹង​ងាកមកដើរលើផ្លូវត្រូវវិញ​ ហើយសូម​ចងចាំថា៖

១. ផ្តោត​បោះជំហាន​ទៅមុខម្តង​មួយ​ជំហាន ម្តងមួយ​ជំហាន​ដោយ​យកចិត្តទុកដាក់បំផុត កុំ​តក់ក្រហល កុំ​ទន្ទះសារ និងស្គាល់ពីអ្វីដែលខ្លួនឯងចង់បាន​ឲ្យច្បាស់​។

២. បើពិបាក​ខ្លាំង អ្នកអា​ច​សុំ​ជំនួយ កុំ​ខ្មាសអៀន​ក្នុងការ​សុំ​ឲ្យអ្នកជុំវិញខ្លួន​ជួយ ព្រោះអ្នក​មិនអាច​ធ្វើ​រឿង​គ្រប់យ៉ាង​តែម្នាក់ឯង​ឡើយ​។

៣. គ្មានពាក្យ​ថា​យឺតពេកទេ​ ក្នុង​ការ​ផ្លាស់ប្តូរ​ខ្លួនឯងឲ្យកាន់តែប្រសើរឡើង ហើយការ​ហាត់​ពត់លត់ដុំខ្លួន គឺគន្លឹះសំខាន់​ ​“It's never too late to change yourself. Self-discipline is the key” ។ ដំបូង​អ្នក​ត្រូវ​បង្កើត​វិន័យក្នុង​ការ​រស់​នៅជា​​ប្រចាំថ្ងៃ  ហើយ​ធ្វើ​វា​ឲ្យ​ក្លាយជាទម្លាប់​។ ពេលដែល​វា​ក្លាយជាទម្លាប់ អ្នកមិនចាំបាច់ត្រូវ​បង្ខំ​ចិត្ត​ធ្វើ​វា​ទៀតឡើយ។ ត្រូវចាំថា​ អ្នកគឺ​ជាម្ចាស់​នៃ​វាសនា​ខ្លួនឯង​ និង​ជា​អ្នកបង្កើតអនាគតផ្ទាល់ខ្លួន។ បើ​អ្នក​ចង់​រស់នៅដូចអ្វីដែលអ្នកស្រមៃចង់បាន អ្នកត្រូ​វតែចាប់ផ្តើមធ្វើ​អ្វីម្យ៉ាង​ពី​ឥលូវ​នេះ​។​

៤. ត្រូ​វជឿជាក់ថា ទេពកោសល្យ​ និង​ការ​ប្រឹងប្រែង​ពិតប្រាកដ នឹង​ធ្វើ​ឲ្យគ្រប់​គ្នាមើលរំលង​កំហុស​ឆ្គងកាលពីមុនរបស់អ្នក៕