ទីកម្សាន្តមួយនៅសៀមរាប មានម្ហូបឆ្ងាញ់ បន្លែស្រស់ ទីតាំងធម្មជាតិ កំពុងទាក់ទាញភ្ញៀវទេសចរ

2019-07-25 08:30:24
សេដ្ឋកិច្ច

2019-07-25 08:30:24
ចំនួនមតិ 0 | ចំនួនចែករំលែក 0

ចន្លោះមិនឃើញ

គ្មានមីនុយ គ្មានតារាងតម្លៃ ប៉ុន្ដែម្ហូបកុម្ម៉ង់ភ្លាមចម្អិនភ្លាម បែបម្ហូបអ្នកស្រុកស្រែចម្ការពិតៗ គឺមាននៅផ្ទះម៉ែឡន។ ផ្ទះម៉ែឡន មានទីតាំងនៅភូមិជ័យ ឃុំទឹកវិល ក្រុងសៀមរាប ខេត្តសៀមរាប ដែលមានចម្ងាយប្រមាណជាជាង ៦គីឡូម៉ែត្រ ពីព្រះអង្គចេក ព្រះអង្គចម។

ភ្ញៀវទេសចរទាំងជាតិ និងអន្ដរជាតិ ដែលចូលចិត្តម្ហូបបែបអ្នកស្រុកស្រែចម្ការ ផ្ទះម៉ែឡន មានម៉ាន់ស្រែ ត្រីស្រែ និងបន្លែស្រស់ បែបធម្មជាតិតាមរដូវកាល។ ទន្ទឹមនឹងនេះ នៅទីនេះមានខ្យុះ ចំនួន១៨ និងទិដ្ឋភាបវាលស្រែ និងដើមឈើដ៏ត្រជាក់ ជាទីទាក់ចិត្តអ្នកមកកម្សាន្តជាហូរហែ។

លោក ចាន់ សុភា ស្ថាបនិកសមាគមចុងភៅកម្ពុជា និងជាបង្កើតកន្លែងលក់ដូរ ផ្ទះម៉ែឡន បានប្រាប់ Sabay ថា នៅទីនេះបង្កើតឡើងប្រមាណជាជាង៦ឆ្នាំមកហើយ លើផ្ទៃដីទំហំ ១ហិកតា ដោយលក់ដូរបែបធម្មជាតិ។ ភ្ញៀវទេសចរដែលចង់មកញុំាអាហារនៅទីនេះមានខ្យុះសម្រាប់អង្គុយលេង ដោយឥតគិតថ្លៃ ឯម្ហូបអាហារតម្លៃសមរម្យ ទៅតាមទីផ្សារអ្នកលក់ក្នុងភូមិ។

"ខ្ញុំអត់មានមីនុយទេ ហើយមាន់ ត្រីអីហ្នឹងគឺទិញភ្លាមៗពីអ្នកភូមិ មាន់ស្រែធម្មជាតិ ចឹងបើគាត់លក់ប៉ុន្មានគឺតាមហ្នឹង ប៉ុន្ដែខ្ញុំសូមបញ្ជាក់ថា តម្លៃ គឺសមរម្យទទួលយកបាន មិនកាប់ថ្លៃដូចនៅតំបន់មួយចំនួនទេ"។ លោក ចាន់ សុភា និយាយ។

ដោយសារតែកន្លែងធម្មជាតិ និងម្ហូបធ្វើភ្លាមៗ បែបអ្នកស្រុកភូមិ (ម្ហូបខ្មែរពិតៗ) ទើបភ្ញៀវទេសចរទាំងជាតិ និងអន្ដរជាតិបានមកហូបជាហូរហែនៅទីនេះ។ "ក្នុង១ថ្ងៃ ខ្ញុំអាចរកចំណូលបានចន្លោះពី ៣០០ ទៅ ៤០០ ដុល្លារ ដោយមិនទាន់ផាត់ដើម ឥលូវមានភ្ញៀវបរទេសច្រើនមកទីនេះ ព្រោះពួកគេចង់ស្គាល់មុខម្ហូបរបស់ខ្មែរ"។

លោក ចាន់ សុភា បានលើកឡើងថា "ម៉ែឡន គឺជាម្ដាយរបស់ខ្ញុំ ដោយសារតែអ្នកភូមិនិយមហៅគាត់ម៉ែឡន ហើយខ្ញុំស្រឡាញ់ម្ដាយ ទើបខ្ញុំបើកហាងនេះ ដាក់ឈ្មោះរបស់គាត់ ហើយម្ហូបគាត់ធ្វើគឺគេពេញចិត្តគ្រប់គ្នា"។

លោក បានឲ្យដឹងទៀតថា "ការបង្កើតហាងនេះឡើង ដោយសារតែកើតឡើងនៅក្នុងត្រូកូលកសិករ និងចង់ឲ្យគ្រប់គ្នាទទួលបានរសជាតិម្ហូបខ្មែរពិតៗ ទើបលោកសម្រេចចិត្តរៀបចំកន្លែងកម្សាន្តបែបធម្មជាតិ និងម្ហូបខ្មែរនេះឡើង"៕