អ្នកនាំពាក្យ​ក្រសួងបរិស្ថានឲ្យ​ដឹងថា​ក្រសួង​បាន​ជូនដំណឹង​ដល់​ម្ចាស់​អាជីវកម្ម​​លក់វត្ថុអនុស្សាវរីយ៍​ដែលសង្ស័យ​ថាអាច​មាន​ការលក់​ដូរគ្រឿងចម្លាក់​ធ្វើពីភ្លុកដំរី​ និងកុយរមាស ឬធ្វើពាណិជ្ជកម្ម​ក្នុងរូប​ភាពផ្សេងទៀតពាក់ព័ន្ធនឹងសត្វព្រៃត្រូវបញ្ឈប់​ជាបន្ទាន់ ព្រោះថា​ខុសនឹងច្បាប់ព្រៃឈើ​និងច្បាប់ស្តីពីតំបន់ការពារធម្មជាតិ។

អ្នកនាំ​ពាក្យ​ក្រ​សួង​បរិស្ថាន​ឯកឧត្តម នេត្រ ភក្រ្តា​ ថ្លែង​នៅ​ថ្ងៃនេះ​ចំពោះវិធានការអនុវត្តច្បាប់ប្រឆាំងនឹងការជួញដូរវត្ថុអនុស្សាវរីយ៍ជាគ្រឿងចម្លាក់ពីភ្លុកដំរី និងកុយរមាសថា​ វិធានការណែនាំនេះ​ជាជំហានដំបូង ក្រសួងបរិស្ថានបានជូនដំណឹងរួចហើយដល់ម្ចាស់អាជីវកម្មដ្ឋានលក់វត្ថុអនុស្សាវរីយ៍ចំនួន ៣២ កន្លែងនៅក្នុងខេត្តសៀមរាបនិងខេត្តព្រះសីហនុ ដោយថាការធ្វើពាណិជ្ជកម្មគ្រប់រូបភាពលើភ្លុកដំរី និងកុយរមាសគឺជាអំពើខុសច្បាប់។ នេះ​បើតាម​ការ​ផ្សាយ​នៅ​លើទំព័រ​ហ្វេស​ប៊ុកក្រ​សួង​បរិស្ថាន​នាព្រឹក​នេះ​។​

ឯកឧត្តម​បន្ត​ថាជំហានបន្ទាប់ ក្រសួងបរិស្ថាននឹងជូនដំណឹងដល់ម្ចាស់អាជីវកម្មដ្ឋានពាក់ព័ន្ធនឹងការលក់វត្ថុអនុស្សាវរីយ៍ជាគ្រឿងចម្លាក់ពីភ្លុកដំរី និងកុយរមាសឬធ្វើពាណិជ្ជកម្មក្នុងរូបភាពផ្សេងទៀតពាក់ព័ន្ធសត្វព្រៃនៅក្នុងរាជធានីភ្នំពេញ និងនៅខេត្តមួយចំនួនទៀត។

បើ​តាម​ឯកឧត្តម​ នេត្រ ភក្រា វិធានការ​នេះ​ធ្វើឡើងបន្ទាប់ពីតាមរបាយការណ៍អង្កេតស្រាវជ្រាវយ៉ាងដិតដ​ល់របស់កម្លាំងមានសមត្ថកិច្ចនាពេលថ្មីៗនេះ ដែល​បានបង្ហាញថា ហាងលក់វត្ថុអនុស្សាវរីយ៍មួយចំនួនមានលក់គ្រឿងចម្លាក់ពីភ្លុកដំរី និងកុយរមាសដែលច្បាប់ហាមឃាត់។ ការធ្វើពាណិជ្ជ​កម្មដូចជាការលក់ នាំចូលនិងនាំចេញនូវទំនិញដូចបានបញ្ជាក់ជូនខាងលើគឺជាបទល្មើសព្រហ្មទណ្ឌដោយអ្នកប្រព្រឹត្ត និងអ្នកជាប់ពាក់ព័ន្ធត្រូវផ្តន្ទាទោសជាប់ពន្ធនាគារ និងត្រូវបានចាត់ចូលជាឧក្រិដ្ឋកម្មដូចមានចែងនៅក្នុង ច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម៕