- 2019-09-12 03:40:29
- ព័ត៌មាន
ក្រោយផ្ទុះការតវ៉ាពីម្សិលមិញ ក្រសួងអប់រំស្នើឲ្យបេក្ខជនចងចាំរឿងសំខាន់បីយ៉ាង
- 2019-09-12 03:40:29
- ចំនួនមតិ 0 | ចំនួនចែករំលែក 0
ក្រោយផ្ទុះការតវ៉ាពីម្សិលមិញ ក្រសួងអប់រំស្នើឲ្យបេក្ខជនចងចាំរឿងសំខាន់បីយ៉ាង
ចន្លោះមិនឃើញ
ក្រោយពីមានការផ្ទុះការតវ៉ាពីបេក្ខជនប្រឡងសញ្ញាបត្រមធ្យមសិក្សាទុតិយភូមិកាលពីថ្ងៃម្សិលមិញ ក្រសួងបានសម្រេចបង្កើតគណៈកម្មការដោះស្រាយករណីនេះ និងក៏បានស្នើឲ្យបេក្ខជនប្រឡងចាំរឿងសំខាន់បីយ៉ាងទាក់ទងនឹងលទ្ធផលប្រឡងនេះ។
កាលពីម្សិលមិញបេក្ខជនប្រឡងបាក់ឌុបមួយចំនួនមានទាំងអ្នកធ្លាក់ និងអ្នកជាប់បានមកតវ៉ាឲ្យក្រសួងអប់រំជួយពិនិត្យឡើងវិញលើកំណែវិញ្ញាសារបស់ពួកគេមួយចំនួន ដោយអះអាងថាលទ្ធផលចេញមកខុសពីអ្វីដែលពួកគេបានរំពឹងទុក។
ក្នុងសេចក្ដីប្រកាសព័ត៌មានមួយចេញផ្សាយនៅថ្ងៃនេះ ក្រសួងអប់រំបានសម្រេចបង្កើតគណៈកម្មការមួយដើម្បីពិនិត្យ និងដោះស្រាយការតវ៉ារបស់បេក្ខជន ដោយថាក្នុងបំណងឲ្យបេក្ខជន និងអាណាព្យាបាលមានសេចក្តីទុកចិត្ត និងទទួលយកលទ្ធផលការប្រឡង។
ក្រសួងឲ្យដឹងថាអ្នកតវ៉ាកាលពីម្សិលមិញមានបេក្ខជនខ្លះពុំសុខចិត្តនឹងលទ្ធផលដែលបានប្រឡងធ្លាក់ និងមានបេក្ខជនខ្លះពុំសុខចិត្តដែលប្រឡងបាននិទ្ទេស B និងC ក៏មកតវ៉ាដែរ ដោយថាដើម្បីចង់បាននិទ្ទេសA។
ក្រៅពីលើកឡើងពីចំណុចទាំងនេះ ក្រសួងក៏បានបញ្ជាក់នូវចំណុចសំខាន់បីដែលបេក្ខជនប្រឡងគួរចងចាំ។ ក្រសួងបញ្ជាក់ថា៖ «សូមបេក្ខជនទាំងអស់ចងចាំ លទ្ធផលប្រឡងឆ្លុះបញ្ចាំងសារៈសំខាន់បីយ៉ាង ទី១អ្នកចេះគឺជាប់ ទី២ ការប្រឡងប្រព្រឹត្តទៅដោយយុត្តិធម៌ តម្លាភាព គោលការណ៍ច្បាប់ និងទទួលយកបាន និងទី៣ លទ្ធផលប្រឡងមិនមែនជាការកំណត់វាសនារបស់បេក្ខជនទេ ប៉ុន្តែវាជាការវាស់សមត្ថភាព និងជំរុញឲ្យមានការខិតខំបន្តទៅមុខទៀត»៕
