- 2020-02-17 13:25:16
- សេដ្ឋកិច្ច
គម្រោងលំនៅឋានតម្លៃជាង២ម៉ឺនដុល្លារ សម្រាប់គ្រួសារមានចំណូលទាបនឹងប្រគល់ផ្ទះជូនមុនចូលឆ្នាំខ្មែរ
- 2020-02-17 13:25:16
- ចំនួនមតិ 0 | ចំនួនចែករំលែក 0
គម្រោងលំនៅឋានតម្លៃជាង២ម៉ឺនដុល្លារ សម្រាប់គ្រួសារមានចំណូលទាបនឹងប្រគល់ផ្ទះជូនមុនចូលឆ្នាំខ្មែរ
ចន្លោះមិនឃើញ
គម្រោងផ្ទះតម្លៃសមរម្យ ដែលគាំទ្រ និងផ្ដួចផ្ដើម ដោយរាជរដ្ឋាភិបាលកម្ពុជា គ្រោងនឹងប្រគល់ផ្ទះដល់ពលរដ្ឋជាមន្ត្រីរាជការ កម្មករ-កម្មការិនី នៅមុនបុណ្យចូលឆ្នាំថ្មីប្រពៃណីជាតិ។ នេះបើតាមប្រសាសន៍លោក ជា សុផារ៉ា ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ ក្នុងឱកាសអញ្ជើញចុះពិនិត្យវឌ្ឍនភាពគម្រោងអភិវឌ្ឍន៍លំនៅឋាន តម្លៃសមរម្យសាងសង់ដោយក្រុមហ៊ុនវើលដ៏ប្រ៊ីហូម នៅរសៀលថ្ងៃទី១៧ ខែកុម្ភៈ ឆ្នាំ២០២០នេះ។
គម្រោងអភិវឌ្ឍលំនៅឋាន តម្លៃសមរម្យរបស់ក្រុមហ៊ុន វើលដ៍ប្រ៊ីដ ហូម ជាគម្រោងមួយក្នុងចំណោមគម្រោងទាំង៥ ស្ថិតនៅក្នុងភូមិកោះគរ ឃុំរការខ្ពស់ ស្រុកស្អាង ខេត្តកណ្តាលមានចម្ងាយប្រមាណ៨គីឡូម៉ែត្រពីក្រុងតាខ្មៅ សាងសង់លើផ្ទៃដីសរុបប្រមាណ២៣ហិកតា មានចំនួន២៤៥៧ផ្ទះមានទុនវិនិយោគប្រមាណ៧៨លានដុល្លារអាមេរិក។
មកដល់ពេលនេះ ក្រុមហ៊ុនបានលក់ផ្ទះចំនួន១០៨៨ ផ្ទះ ស្មើ៤៤ % នៃចំនួនសរុប ក្នុងនោះអតិថិជនជាមន្ត្រីរាជការមានចំនួនជាង២៣ % ។ ក្រុមហ៊ុនបានបញ្ចប់ការសាងសង់ផ្ទះជាស្ថាពរចំនួន២០៣ផ្ទះ គ្រោងប្រគល់ផ្ទះជូនអតិថិជននៅមុនបុណ្យចូលឆ្នាំថ្មីប្រពៃណីជាតិខ្មែរ និងគ្រោងបញ្ចប់ការសាងសង់គម្រោងទាំងមូលនៅមុនបំណាច់ឆ្នាំ ២០២០។
គម្រោងលំនៅឋានតម្លៃសមរម្យសម្រាប់មន្ត្រីរាជការ កងកម្លាំងប្រដាប់អាវុធ មន្ត្រីចូលនិវត្តន៍ និងជនពិការមានចំណូលទាប និងមធ្យម អាចបង់រំលោះត្រឹម១ខែ៨០ដុល្លារ ក្នុងឆ្នាំ២០២០គឺទទួលបានការគាំទ្រយ៉ាងខ្លាំងក្លាពីប្រមុខរាជរដ្ឋាភិបាលកម្ពុជា ពិសេសបងប្អូនមន្ត្រីរាជការតែម្ដង។
“លំនៅឋាន គម្រោងដំបូងគេនេះអាចចាត់ថា សាកសម មានស្តង់ដាល្អអាចឱ្យបងប្អូនរស់នៅមានផាសុខភាព សុវត្ថិភាព សេចក្ដីថ្លៃថ្នូរ និងជាគំរូ សម្រាប់គម្រោងផ្សេងៗទៀត។អញ្ចឹងខ្ញុំនឹងមកម្តងទៀត និងសន្យាជួបបងប្អូននៅចុងសប្ដាហ៍ទី១ ខែមេសា មានន័យថា ឆេងម៉េងហើយយើងមកជុំគ្នា និងចូលរស់នៅតែម្តង”។ លោក ជា សុផារ៉ា បន្ថែម។
គិតត្រឹមដើមឆ្នាំ២០២០ នេះគម្រោងលំនៅឋានសាធារណៈ និងតម្លៃទាប សម្រាប់គ្រួសារមន្ត្រីរាជការការមានចំនួន ៥ គម្រោង។ គម្រោងអភិវឌ្ឍ"លំនៅឋានទីក្រុងរណបសិរីមង្គល” របស់ក្រុម worldbridge Home Co,Ltd មានទីតាំងនៅភូមិកោះគរ ឃុំរកាខ្ពស់ ស្រុកស្អាត ខេត្តកណ្ដាលគឺជាគម្រោងដំបូងគេ ដែលបានបើកការដ្ឋានសាងសង់កាលពីថ្ងៃទី ៧ ខែមករា ឆ្នាំ២០១៧ ក្រោមអធិបតីភាពលោកឧបនាយករដ្ឋមន្រ្តីរដ្ឋមន្រ្តីក្រសួងរៀបចំដែនដីនគររូបនីយកម្ម និងសំណង់ ជា សុផារ៉ា និងលោកឧកញ៉ា សៀ រិទ្ធី អគ្គនាយកក្រុមហ៊ុន៕
