- 2020-03-17 05:37:41
- ចរាចរណ៍
គម្រោងស្ពានមួយខ្សែត្រង់ចំណុចក្បាលថ្នល់នឹងដាក់ឱ្យដំណើរមុនបុណ្យចូលឆ្នាំខ្មែរ
- 2020-03-17 05:37:41
- ចំនួនមតិ 0 | ចំនួនចែករំលែក 0
គម្រោងស្ពានមួយខ្សែត្រង់ចំណុចក្បាលថ្នល់នឹងដាក់ឱ្យដំណើរមុនបុណ្យចូលឆ្នាំខ្មែរ
ចន្លោះមិនឃើញ
ស្ពានមួយខ្សែពីមហាវិថីព្រះមុនីវង្ស បត់ឆ្វេងឆ្ពោះទៅមហាវិថីព្រះនរោត្តម នឹងត្រូវដាក់ឱ្យបងប្អូនចរាចរណ៍នៅចុងខែមីនា ពោលគឺមុនបុណ្យចូលឆ្នាំថ្មីប្រពៃណី ជាតិខាងមុខ។ នេះបើតាមប្រសាសន៍របស់លោក សាំ ពិសិដ្ឋ ប្រធានមន្ទីរសាធារណៈការ និងដឹកជញ្ជូនបានថ្លែងប្រាប់ Sabay។
លោកបានបន្ថែមថា ការដ្ឋានស្ថាបនាស្ពានអាកាសបត់ឆ្វេងមួយខ្សែថ្មីនៅជាប់នឹងស្ពានអាកាសក្បាលថ្នល់ចាស់មកដល់ពេលនេះក្រុមការងារបាននិងកំពុងធ្វើសកម្មភាពអ៊ុតកៅស៊ូ ស្ពានកំណោងចរាចរណ៍ភ្ជាប់ពីមហាវិថី ព្រះមុនីវង្ស បត់មកមហាវិថី ព្រះនរោត្តម ហើយការដ្ឋានស្ថាបនាស្ពានអាកាសបត់ឆ្វេងមួយខ្សែថ្មីនេះនឹងបានរួចរាល់នៅចុងខែមីនា ២០២០ខាងមុខនេះ។ ការដ្ឋានបានចាប់ផ្តើមខួងគ្រឹះស្ពានកាលពីដើមខែមិថុនាឆ្នាំ២០១៩ ដោយត្រូវចំណាយពេលសាងសង់រយៈពេល៧ខែ។
ដោយមើលឃើញ បញ្ហាកកស្ទះចរាចរនៅតែកើតមាន នៅតំបន់ស្ពានអាកាសក្បាលថ្នល់នោះ អាជ្ញាធររាជធានីភ្នំពេញ បានសម្រេច ស្ថាបនាស្ពានអាកាសក្បាលថ្នល់ បន្ថែមទៀត ដើម្បីកែលំអ និងដោះស្រាយបញ្ហាចរាចរឲ្យកាន់តែមានភាពរលូន។ គម្រោងនេះ ទទួលស្ថាបនាដោយក្រុមហ៊ុនOCIC កោះពេជ្រ។
ស្ពានអាកាសក្បាលថ្នល់ពីមហាវិថីព្រះមុនីវង្សទៅវិថីព្រះនរោត្តមមានប្រវែង ៧៧ម៉ែត្រ ពីផ្លូវដីដល់គល់ស្ពានក្បាលថ្នល់ និងពីគល់ស្ពានដល់ស្ពាន អាកាសចាស់ ១២៣ម៉ែត្រ សរុប២០០ម៉ែត្រ។ ស្ពាននេះមានទទឹង ៧,៥ម៉ែត្រពីមហាវិថីព្រះមុនីវង្ស បត់ឆ្វេងឡើងស្ពានឆ្ពោះ ទៅមហាវិថី ព្រះនរោត្តម។
លោក សាំ ពិសិដ្ឋ ធ្លាប់បានអះអាងដែរថា គម្រោងសាងសង់ស្ពានអាកាសបត់ឆ្វេង១ខ្សែនេះ នឹងត្រូវបញ្ចប់នៅចុង ឆ្នាំ២០១៩នេះ ដោយក្តាពុម្ពដែកកម្រាលតួស្ពានដែលមានកំពស់ពីកម្រាលកៅស៊ូថ្នល់ +៤.០០ម៉ែត្រនេះនឹងដកក្តាពុម្ពដែកចេញនៅចុងខែតុលា ឆ្នាំ២០១៩នេះ ហើយនឹងដាក់ដំណើរការឲ្យប្រជាពលរដ្ឋឆ្លងកាត់នៅចុងឆ្នាំ២០១៩កន្លងមក។ យ៉ាងណាមិញកាលពីថ្ងៃទី ២២ ខែកុម្ភៈកន្លងមកការដ្ឋានបានចាប់ផ្ដើមសកម្មភាពអ៊ុតកៅស៊ូស្ពានកំណោងចរាចរភ្ជាប់ពីមហាវិថី ព្រះមុនីវង្ស បត់មកមហាវិថី ព្រះនរោត្តម នៅស្ពានអាកាសក្បាលថ្នល់។
គួរបញ្ជាក់ថា បច្ចុប្បន្ននេះនៅក្នុងរាជធានីភ្នំពេញមានស្ពានអាកាសចំនួន៦ កន្លែងហើយ គឺ ស្ពានអាកាសក្បាលថ្នល់ ស្ពានអាកាសស្ទឹងមានជ័យ ស្ពានអាកាស៧មករា ស្ពានអាកាស៥មករា ស្ពានអាកាសស្តុបផ្សារដីហុយ និងស្ពានអាកាសចោមចៅ ដែលស្ពាននេះក្រុមការងារបាននឹងកំពុងដំណើរការដ្ឋានស្ថាបនាយ៉ាងញាប់ដៃញាប់ជើង ដូចស្ពានអាកកាសក្បាលថ្នល់នេះដែរ៕
