- 2021-08-25 04:15:16
- ព័ត៌មាន
សិង្ហបុរី កំពុងវិលទៅរកស្ថានភាពធម្មតាវិញ ក្រោយពីរងគ្រោះដោយកូវីដ ១៩ អស់រយៈពេលជាង១ឆ្នាំ
- 2021-08-25 04:15:16
- ចំនួនមតិ 0 | ចំនួនចែករំលែក 0
សិង្ហបុរី កំពុងវិលទៅរកស្ថានភាពធម្មតាវិញ ក្រោយពីរងគ្រោះដោយកូវីដ ១៩ អស់រយៈពេលជាង១ឆ្នាំ
ចន្លោះមិនឃើញ
ពិតណាស់ មនុស្សភាគច្រើនប្រហែលជាទើបតែជួបស្ថានភាពបែបនេះជាលើកដំបូងក្នុងជីវិតរបស់ខ្លួនប៉ុណ្ណោះ ប៉ុន្តែ អស់រយៈពេលជាង១ឆ្នាំមកហើយ បើគិតចាប់តាំងពីសិង្ហបុរី បានរកឃើញករណីឆ្លងវីរុសកូវីដ ១៩ ជាលើកដំបូងក្នុងប្រទេសរបស់ខ្លួន។
កាលពីថ្ងៃទី២៣ ខែមករា ឆ្នាំ២០២០ ក្រសួងសុខាភិបាលសិង្ហបុរី បានប្រកាសថា ពួកគេបានរកឃើញករណីឆ្លងនាំចូលរបស់ «វីរុសកូរ៉ូណា» ក្នុងប្រទសរបស់ខ្លួន ដែលកាលនោះ វីរុសនេះ មិនទាន់មានឈ្មោះច្បាស់លាស់នៅឡើយទេ។
ករណីឆ្លងនោះបានកើតឡើងលើបុរសវ័យ៦៦ឆ្នាំម្នាក់ មកពីទីក្រុងវ៉ូហាន ក្រោយពីបុរសនោះ បានធ្វើដំណើរទៅដល់សិង្ហបុរីជាមួយនឹងក្រុមគ្រួសាររបស់គេ ក្នុងរយៈពេល២-៣ថ្ងៃ មុនពេលរកឃើញ។
ផលប៉ះពាល់ពីករណីឆ្លងជាលើកទី១ ពិតជាមានកម្រិតខ្លាំងក្លាគួរឲ្យកត់សម្គាល់ ស្របពេលដែលសកម្មភាពធ្វើការងារ វិស័យសេដ្ឋកិច្ច សង្គម និងវិស័យសុខាភិបាល បានផ្លាស់ប្តូរជិត៩០ដឺក្រេ។ ទោះបីជាយ៉ាងណា ការផ្លាស់ប្តូរខ្លះ នឹងកើតឡើងជាបណ្តោះអាសន្នប៉ុណ្ណោះ ស្របពេលដែលអ្វីៗនឹងវិលទៅរកភាពល្អប្រសើរវិញ នៅពេលដែលការឆ្លងរាតត្បាត បញ្ចប់។
បើទោះបីមានការបារម្ភតិចតួចប៉ុណ្ណោះ បន្ទាប់ពីការរកឃើញករណីឆ្លងទី១ ប៉ុន្តែ នៅខែមេសា សិង្ហបុរី បានរកឃើញករណីឆ្លងជាចង្កោមលើកម្មករជាជនអន្តោប្រវេសន៍ នៅកន្លែងស្នាក់នៅរបស់ពួកគេ ដែលនាំឲ្យប្រទេសនេះចាត់វិធានការតឹងរ៉ឹងជាច្រើន ហាមឃាត់លើការប្រមូលផ្តុំគ្នា និងបិទខ្ទប់កន្លែងដែលមានហានិភ័យខ្ពស់។
ក្រោយមក សិង្ហបុរី ក្លាយជាប្រទេសដ៏ស្ងប់ស្ងាត់ មជ្ឈណ្ឌលជាច្រើនដែលធ្លាប់តែមានមនុស្សអ៊ូរអរ ប្រែទៅជាស្ងាត់ជ្រងំ ហើយហាងមិនចាំបាច់ជាច្រើនត្រូវបានបិទទ្វារ ស្របពេលដែលការធ្វើការងារពីផ្ទះបាន ក្លាយជារបត់ជីវិតថ្មីរបស់ពលលើប្រទេសកោះមួយនេះ ហើយការអនុវត្តការបិទប្រទេសបានកើតឡើង ស្របពេលដែលការធ្វើដំណើរចេញក្រៅប្រទេសបានក្លាយជារឿងដ៏លំបាក។
ក្រោយពីករណីឆ្លងបានកើនឡើងយ៉ាងខ្ពស់នៅខែមេសា ឆ្នាំ២០២០ តួលេខនេះ បានថយចុះជាបន្តបន្ទាប់ ចាប់ពីខែកញ្ញា និងស្ទើរតែគ្មានករណីឆ្លងសោះ ចាប់ពីខែតុលា រហូតដល់ដើមឆ្នាំ២០២១។
ការគ្រប់គ្រងស្ថានភាពបានយ៉ាងល្អប្រសើរនេះ គឺដោយសារតែ សិង្ហបុរី បានអនុវត្តវិធានការរិតត្បិតយ៉ាងតឹងរ៉ឹងតាមច្រកព្រំដែន អនុវត្តកម្មវិធីធ្វើចត្តាលីស័ក ដ៏មានប្រសិទ្ធិភាព រួមទាំងវិធីសាស្ត្រជាច្រើនទៀត ដើម្បីទប់ស្កាត់ការឆ្លងរាតត្បាតក្នុងសហគមន៍របស់ខ្លួន។
ក្រៅពីនេះ ដើម្បីទប់ស្កាត់ការឆ្លងរាតត្បាតក្នុងសហគមន៍ខ្លួន និងករណីនាំចូល សិង្ហបុរី ក៏បានប្រើប្រាស់ប្រព័ន្ធបច្ចេកវិទ្យាទំនើបៗដ៏សម្បូរបែប ដើម្បីប្រមូលផ្តុំព័ត៌មាននានា តាមដាន និងគ្រប់គ្រងករណីឆ្លងថ្មី ក៏ដូចជាតំបន់ដែលត្រូវបិទខ្ទប់ជាដើម។
ការិយាល័យប្រព័ន្ធឆ្លាតវៃជាតិ និងឌីជីថល និងក្រសួងសុខាភិបាលសិង្ហបុរី បានធ្វើការរួមគ្នា ដើម្បីបង្កើតស្តង់ដារមួយ ដែលមានឈ្មោះថា HealthCerts តាមរយៈការប្រើប្រាស់ប្រព័ន្ធប្រមូលផ្តុំព័ត៌មាន។
កម្មវិធី HealthCerts ត្រូវបានប្រើប្រាស់ជាពិសេសដើម្បីចេញវិញ្ញាបនបត្រតេស្តកូវីដ ១៩ ស្របទៅតាម ស្តង់ដារអន្តរជាតិ និងលក្ខខណ្ឌរបស់រដ្ឋាភិបាលសិង្ហបុរី ហើយមិនត្រមឹតែប៉ុណ្ណោះ កម្មវិធីនេះ ត្រូវបានអវិឌ្ឍ ក្រោមកិច្ចសហប្រតិបត្តិការជាមួយនឹងភ្នាក់ងារបច្ចេកវិទ្យារដ្ឋាភិបាល និងក្រសួងសុខាភិបាលសិង្ហបុរី។
កម្មវិធីបច្ចេកវិទ្យានេះ ត្រូវបានអនុវត្តចាប់ពីខែមីនា ឆ្នាំ២០២១ ដោយរាល់លទ្ធផលធ្វើតេស្តរបស់អ្នកដំណើរ ទាំងអស់នឹងស្ថិតក្នុងទម្រង់ឌីជីថល ក្នុងស្តង់ដារ HealthCerts។
ស្របពេលជាមួយគ្នានេះ សិង្ហបុរីក៏បានអនុវត្តការចាក់វ៉ាក់សាំងដល់ប្រជាពលរដ្ឋរបស់ខ្លួន បានយ៉ាងល្អ និងឆាប់រហ័សទូទាំងប្រភេទផងដែរ ដោយមកទល់ពេលនេះ ប្រជាជនជិត៨០%ហើយនៃអត្រាប្រជាជនសរុប បានទទួលការចាក់វ៉ាក់សាំងពីរដ្ឋាភិបាល។
បើទោះបីស្ថានភាពវិលទៅរកភាពល្អប្រសើរឡើងវិញ និងស្ទើរតែស្ថិតក្នុងសភាពធម្មតាក៏ដោយ ប៉ុន្តែ ប្រជាពលរដ្ឋគ្រប់រូប និងអាជីវកម្មគ្រប់ប្រភេទនៅក្នុងប្រទេសនេះ នៅតែប្រកាន់ភ្ជាប់វិធានការអនាម័យយ៉ាងខ្ជាប់ខ្ជួន រក្សាគម្លាត ពាក់ម៉ាស និងទម្លាប់អនាម័យខ្លួនជាច្រើនទៀត ដើម្បីធានាថា កូវីដ ១៩ នឹងបញ្ចប់ក្នុងប្រទេសសិង្ហបុរី ក្នុងពេលឆាប់ៗខាងមុខនេះ។
អ្វីដែលកាន់តែពិសេសនោះគឺថា បើទោះបីទីក្រុងកោះដ៏ស្រស់ស្អាតមួយនេះ បានរកឃើញករណីឆ្លងសរុបចំនួន៦៦ ៥៧៦នាក់ក៏ដោយ ប៉ុន្តែ ករណីជាសះស្បើយមានរហូតដល់ទៅ៦៥ ៧០០នាក់ ខណៈដែលករណីស្លាប់មានត្រឹមតែ៥០នាក់គត់ គិតត្រឹមថ្ងៃនេះ៕
ប្រភពព័ត៌មាន៖ CNA