《ប៊ូឌីញ ស》 ជាឈ្មោះខ្សែភាពយន្តមួយរបស់កម្ពុជា ដែលទទួលបានពានរង្វាន់ មហោស្រពភាពយន្ត Venice លើកទី៧៨ របស់ប្រទេស​អ៉ីតាលី កន្លងទៅថ្មីៗនេះ។ មិនត្រឹមតែប៉ុណ្ណោះ តួសម្តែង នៅក្នុងខ្សែភាពយន្ត លោក ឈុន ពិសិដ្ឋ ក៏ទទួលបានពាន រង្វាន់អ្នកសម្តែងឆ្នើម ផងដែរ។ នេះជាខ្សែភាពយន្ត បង្ហាញពីខ្សែជីវិតមិត្តភក្តិ៣នាក់ ដែលត្រូវបែកគ្នា ក្រោយអគារ ដែលពួកគេស្នាក់នៅ ត្រូវវាយកម្ទេចចោល រីឯពលរដ្ឋក្នុងតំបន់នោះ ត្រូរុះវរើចេញ។ ក្តីស្រមៃរបស់ពួកគេទាំង៣ ត្រូវបានរលាយ ដោយសារតែការបាត់បង់លំនៅដ្ឋានភ្លាមៗ។

យ៉ាងណាមិញ បើទោះបីជាបច្ចុប្បន្ន អគារ ប៊ូឌិញ “ស ” ដ៏ចំណាស់មួយនេះ លែងមានរូបរាងនៅក្នុងប្រទេសកម្ពុជាក៏ដោយ ប៉ុន្តែភាពគួរឲ្យចាប់អារម្មណ៍នៅតែមាន ពេលដែលមនុស្ស នាំគ្នានិយាយឡើងវិញ ពីអគារដែលមានជាច្រើនជាន់ នៅកណ្តាលទីក្រុង ដែលមានទីតាំង នៅតាមដងទន្លេបាសាក់។ អគារនេះ ត្រូវបានរចនាឡើងដោយ ស្ថាបត្យករកម្ពុជា លោក លូ បានហាប់ និងស្ថាបត្យកររុស្ស៊ី លោក ក្លាឌឺបៀបូឌានង្គ័ ត្រូវបានត្រួតពិនិត្យដោយ ឯកឧត្តម វណ្ណ ម៉ូលីវណ្ណ និងដាក់សម្ពោធឲ្យប្រើប្រាស់ នៅឆ្នាំ១៩៦៣។​

នៅចន្លោះឆ្នាំ១៩៥៣ និង ១៩៧០ ចំនួនប្រជាពលរដ្ឋ នៅក្នុងទីក្រុង បានកើនឡើង ដល់ទៅ៣ដង ក្នុងចំនួនពី ៧ម៉ឺន៤ពាន់នាក់ ទៅមួយលាននាក់ ដែលធ្វើឲ្យមានតម្រវការជាបន្ទាន់មួយ សម្រាប់ដំណោះស្រាយលំនៅដ្ឋានសម្រាប់ការរស់នៅរបស់ពលរដ្ឋ។ អគារ ប៊ូឌិញ “ស ” ជាអគារមួយក្នុងចំណោមអគារជាច្រើន ដែលត្រូវបានលេចរូបរាង ដើម្បីដោះស្រាយភាពបន្ទាន់នៃការខ្វះខាតលំនៅឋានរបស់ពលរដ្ឋ។ អគារនេះ មានបន្ទប់ស្នាក់នៅចំនួន៤៦៨ រស់នៅតាមបែបសម័យទំនើប ដែលមានច្រើនជាន់ សម្រាប់ប្រជាជនថ្នាក់កណ្តាល និងថ្នាក់ទាប។

សំណង់ដែលបានសាងសង់នៅក្នងគម្រោងបណ្តោយទន្លេបាសាក់មានដូចជា អគារប៊ូឌិញ “ស ” ,ពហុកីឡដ្ឋាន អូឡាំពិក និងមហោស្រពិព័រណ៍ចតុមុខ និងអគារផ្សេងទៀតដែលត្រូវបានគ្រោងទុក ប៉ុន្តែមិនដែលបានដឹងរួមមាន សារមន្ទីសម្រាប់បូជនីយកិច្ចឯករាជ្យ សាលាសិល្បៈតន្ត្រី​របាំបុរាណ សាលាសាធារណការ ការិយាល័យទេសចរណ៍ វិចិត្រសាល និងសណ្ឋាគារអន្តរជាតិ។

យ៉ាងណាមិញ ដោយសារតែសភាពទ្រុឌទ្រោមនៃសំណង់អគារ អគារចំណាស់មួយនេះ ក៏មិនបានមានវត្តមាននៅក្នុងប្រទេសកម្ពុជាទៀតដែរ អគារនេះត្រូវបានរុះរើ តាំងពីថ្ងៃទី ១៧ ខែ កក្កដា ឆ្នាំ ២០១៧ មកម្ល៉េះ ៕

ប្រភព ៖ opendevelopmentmekong