គ្រោងដើរលេងនៅក្រៅប្រទេស? បើបានទៅសិង្ហបុរីម្តងទៀត មិនត្រូវមើលរំលងកន្លែងទាំងនេះឡើយ

2021-11-27 03:22:18
ព័ត៌មាន

2021-11-27 03:22:18
ចំនួនមតិ 0 | ចំនួនចែករំលែក 0

ចន្លោះមិនឃើញ

ធ្លាប់ទៅសិង្ហបុរីហើយមែនទេ? ប្រាកដណាស់ បើទោះបីលោកអ្នកធ្លាប់បានទៅកម្សាន្តនៅប្រទេសកោះដ៏ស្រស់ស្អាតមួយនេះពីមុនមកក៏ដោយ ប៉ុន្តែ វានៅតែមានរឿងរ៉ាវជាច្រើនដែលអ្នកមិនធ្លាប់បានឃើញ និងមិនធ្លាប់បានធ្វើក្នុងទីក្រុងសិង្ហបុរី។ ចំពោះអ្នកដែលមានគម្រោងធ្វើដំណើរកម្សាន្តជាលើកទី២ គួរតែកត់ត្រាចំណុចខាងក្រោមនេះ ដើម្បីប្រាកដថា អ្នកនឹងទទួលបានបទពិសោធថ្មីៗ នៅលើទឹកដីសិង្ហបុរី។

១. ទទួលយកបទពិសោធថ្មីលើដំណើរកម្សាន្តលើកោះនានា

លោកអ្នកនឹងទទួលបានបទពិសោធថ្មីៗក្នុងពេលធ្វើដំណើរទៅកម្សាន្តនៅកោះមួយក្នុងចំណោមកោះដែលមានការទាក់ទាញបំផុតរបស់សិង្ហបុរី គឺកោះ Coney Island។ ស្ថិតនៅភាគឦសាននៃប្រទេសសិង្ហបុរី លោកអ្នកអាចធ្វើដំណើរដោយថ្មើរជើងបានដោយងាយទៅកាន់កោះមានទំហំ៥០ហិកតាមួយនេះ ពីឧស្យាន Punggol Point Park ខណៈដែលកោះនេះ គឺជាកន្លែងដ៏ល្អឥតខ្ចោះសម្រាប់ការជិះកង់កម្សាន្ត និងទស្សនាសត្វបក្សី។ កោះដ៏គួរឲ្យទាក់ទាញផ្សេងទៀតគឺកោះ Lazarus Island និង Pulau Seringat ស្របពេលដែលលោកអ្នកក៏ធ្វើដំណើរដោយសាឡាងនៅកំពង់ផែ Marina South Pier ដើម្បីធ្វើដំណើរទៅកម្សាន្តនៅឆ្នេដ៏ស្រស់ស្អាតនៃកោះ St John's Island ផងដែរ។

ដើម្បីដឹងកាន់តែច្បាស់ទៀតអំពីកោះដ៏ស្រស់ស្អាត នៅសងិ្ហបុរី ដែលអ្នកមិនអាចមើលរំលងបាន សូមចុច «ត្រង់នេះ»

២. ដើរកម្សាន្ត និងទិញឥវ៉ាន់ម៉ាកល្បីៗរបស់សិង្ហបុរី ជាមួយនឹងតម្លៃពិសេស

ប្រាកដណាស់ សិង្ហបុរី គឺជាកន្លែងប្រមូលផ្តុំដោយទំនិញម៉ាកល្បីៗជាច្រើនទាំងក្នុងស្រុក និងអន្តរជាតិ ខណៈដែលលោកអ្នកអាចរកទិញសម្លៀកបំពាក់ ឬសម្ភារៈប្រើប្រាស់នៅហាងជាច្រើនដូចជា In Good Company នៅផ្សារទំនើប ION Orchard និង SABRINAGOH នៅផ្សារទំនើប Raffles City Shopping Centre ជាដើម។

ជាមួយគ្នានេះ លោកអ្នកក៏អាចធ្វើដំណើរទៅកាន់ហាង The Tinsel Rack នៅក្នុងផ្សារទំនើប Orchard Rd និង HollyHoque នៅផ្សារទំនើប Century Square ដើម្បីរកទិញសម្លៀកបំពាក់ស្លៀកប្រចាំថ្ងៃ សម្ភារៈប្រើប្រាស់ ម៉ូតខោអាវទាន់សម័យតាមរដូវកាល ពិសេសសម្លៀកបំពាក់ទាន់សម័យ និងសម្ភារៈសម្រាប់ស្ត្រីជាមួយនឹងការបញ្ចុះតម្លៃជាពិសេស និងទំនិញជាច្រើនប្រភេទទៀត។ ប៉ុន្តែ ប្រសិនបើអ្នកចង់ទួលបានតម្លៃពិសេស លោកអ្នកអាចធ្វើដំណើរទៅកាន់ផ្សារទំនើប Mecca Queensway Shopping Centre ដើម្បីទិញសម្ភារកីឡា និងទៅផ្សារ IMM Jurong ដើម្បីទិញម៉ាកល្បីៗជាច្រើនដូចជា Charles & Keith, Adidas និង COACH ជាដើម។

ដើម្បីស្គាល់ផ្សារទំនើបកាន់តែច្រើនទៀត សូមចុច «ត្រង់នេះ»

៣. សាកល្បងអាហារប្រចាំតំបន់ដ៏ឆ្ងាញ់ពិសារ

លោកអ្នកប្រហែលជាបានទៅកម្សាន្តកន្លែងដ៏មានប្រជាប្រិយភាពដូចជា Maxwell Food Centre និង Newton Food Centre រួចមកហើយ ហេតុនេះ លោកអ្នកគួរតែសាកល្បងភ្លក្សរសជាតិអាហារនៅ Hawker Centres ម្តង។ ជាមួយគ្នានេះ លោកអ្នកក៏អាចធ្វើដំណើរទៅកាន់ហាងលក់អាហារក្បែរនោះជាច្រើនទៀតដូចជា ABC Brickworks Market, Food Centre, Old Airport Road Food Centre, Amoy Street Food Centre, the Tampines Round Market និង Food Centre ដើម្បីញាំអាហារឆ្ងាញ់ៗដូចជា ទាអាំង បាយមាន់ ស៊ុបសាច់ត្រី និងនំការ៉ុតបំពងជាដើម។

៤. ក្រេបរសជាតិកាហ្វេ និងអាហារសម្រន់

សិង្ហបុរី គឺជាទឹកដីដែលប្រមូលផ្តុំដោយហាងកាហ្វេដ៏សម្បូរបែប ខណៈដែលលោកអ្នកអាចសាកល្បងភ្លក្សរសជាតិកាហ្វេងដ៏ឈ្ងុយឆ្ងាញ់ និងប្លែកមាត់នៅហាង Chye Seng Huat Hardware, Symmetry និង Maison Ikkoku។ នៅមិនទាន់អស់ទេ នៅមានជម្រើសជាច្រើនទៀត នៅតំបន់ Bugis និង Lavender ស្របពេលដែលលោកអ្នកក៏អាចសម្រាកផឹកកាហ្វេបែបរ៉ូមែនទិកនៅ Twenttygrammes (twentygrammes.com) ផងដែរ ដែលមានការរចនាជាពិសេស។

៥. ទទួលយកបទពិសោធថ្មី និងប្លែកអារម្មណ៍ជាមួយនឹងកសិដ្ឋាននៅសិង្ហបុរី

ពិតណាស់ សិង្ហបុរី មានភាពល្បាញក្នុងនាមជាទីក្រុងទំនើប និងប្រមូលផ្តុំដោយទីប្រជុំជន ប៉ុន្តែ លោកអ្នកប្រាកដជាភ្ញាក់ផ្អើល នៅពេលដែលបានឃើញកសិដ្ឋានជាច្រើននៅជាយទីក្រុង។ Bollywood Veggies, Lian Wah Hang Quail Farm និង Jurong Frog Farm សុទ្ធសឹងជាកន្លែងដ៏គួរឲ្យទាក់ទាញ ក្នុងការទៅដើរកម្សាន្តក្នុងពេលដ៏ខ្លី ប៉ុន្តែ ប្រសិនបើលោកអ្នកចង់ចំណាយពេលវេលាយូរ លោកអ្នកអាចធ្វើដំណើរទៅកាន់រមណីយដ្ឋានកសិដ្ឋាន D’Kranji Farm Resort ដែលជាកន្លែងសម្រាកលំហែរ មានទីតាំងស្ថិតនៅតំបន់ Lim Chu Kang ដោយនៅទីនេះ មានវីឡាស្រស់ស្អាតជាច្រើន កន្លែងស្ប៉ាញ និងកន្លែងចិញ្ចឹមបង្កង។

បន្ថែមទៅលើនេះ លោកអ្នកក៏អាចធ្វើដំណើរទៅកាន់កសិដ្ឋានដាំបន្លែ Edible Garden City ដើម្បីទៅទស្សនាកន្លែងដាំបន្លែរបស់សិង្ហបុរី ក្នុងភាពច្នៃប្រឌិតខ្ពស់ ជាពិសេសលោកអ្នកនឹងប្លែកភ្នែកជាមួយនឹងទេសភាពបៃតង និងបច្ចេកទេសដាំបន្លែដ៏គួរឲ្យអារម្មណ៍ ខណៈកសិដ្ឋាននេះមានទីតាំងនៅ Jalan Penjara ក្នុងតំបន់ Queenstown។

៦. ធ្វើដំណើរទៅទស្សនកិច្ចនៅសារមន្ទីរ និងវិចិត្រសាលនានា

ក្រៅពីសារមន្ទីរ National Museum of Singapore និងសារមន្ទីរដ៏ល្បីល្បាញទូទាំងពិភពលោកជាច្រើនដូចជា National Gallery Singapore ប្រទេសសិង្ហបុរី ក៏ប្រមូលផ្តុំដោយកន្លែងវប្បធម៌ដ៏ស្រស់ស្អាតផងដែរ។ អ្នកដែលចូចិត្តវប្បធម៌តាមសម័យកាល អាចធ្វើដំណើរទៅទស្សនកិច្ចនៅ MINT Museum of Toys ស្របពេលដែលលោកអ្នកនឹងប្លែកភ្នែក និងប្លែកអារម្មណ៍ ប្រសិនបើទៅទស្សនកិច្ចនៅសារមន្ទីរកាមេរ៉ា Camera Museum ដែលប្រមូលផ្តុំដោយកាមេរ៉ាចាស់ៗ ក៏ដូចជាគ្រឿងទាក់ទងនឹងកាមេរ៉ារហូតដល់ទៅ១០០០។ ជាមួយគ្នានេះ សារមន្ទីរ Baba House Museum ក៏ជាកន្លែងដ៏គួរឲ្យចាប់អារម្មណ៍ផងដែរ ដោយនៅទីនេះ ជាកន្លែងប្រមូលម្តុំដោយគ្រឿងសង្ហារឹម វាយនភណ្ឌ សេរ៉ាមិក អក្សផ្ចង់ គំនូរ រូបថត និងវត្ថុលម្អជាច្រើនផ្សេងទៀត។

៧. ទស្សនកិច្ចនៅកន្លែងដ៏ស្រស់ស្អាតជាច្រើន

សិង្ហបុរី គឺជាកន្លែងប្រមូលផ្តុំដោយទីកន្លែងបៃតងដ៏ស្រស់ស្អាតជាច្រើន ក៏ដូចជាគោលដៅទេសចរណ៍ដ៏ទាក់ទាញ។ លោកអ្នកអាចធ្វើដំណើរទៅកម្សាន្តនៅឧស្យា East Coast Park និងដើរកម្សាន្តនៅតាមឆ្នេរ មុននឹងធ្វើដំណើរទៅកម្សាន្តនៅ MacRitchie Reservoir និងដើរលើស្ពានយោលប្រវែង២៥០ម៉ែត្រ HSBC Tree Top Walkហើយបន្តធ្វើដំណើរទៅកាន់ Mandai ឬឧស្យាន Punggol Waterway Park។

៨. បន្តដំណើរកម្សាន្តនៅកន្លែងបេតិកភណ្ឌ

លោកអ្នកអាចស្វែងយល់ពីប្រវត្តិសាស្ត្ររបស់សិង្ហបុរី ជាមួយនឹងការធ្វើដំណើរទៅកាន់កន្លែងបេតិកភណ្ឌនានា ដូចជា Queenstown និង Changi Museum ជាដើម។ នៅសង្កាត់ Dawson និង Alexandra ក្នុងតំបន់ Queenstown ក៏មានការផ្តល់ជូនមគ្គុទ្ទេសទេសចរណ៍ដែលមិនគិតថ្លៃសេវាផងដែរ ប៉ុន្តែ ត្រូវតែធ្វើការចុះឈ្មោះជាមុន ស្របពេលដែលលោកអ្នកក៏ទទួលបានបទពិសោធពីតំបន់ប្រវត្តិសាស្ត្រក្នុងសង្គ្រាមលោកលើកទី២ ជុំវិញតំបន់ Changi ផងដែរ។

៩. ប្លែកអារម្មណ៍តាមរយៈការទៅដើរកម្សាន្តនៅផ្សារត្រី

លោកអ្នកនឹងប្លែកអារម្មណ៍ជាពិសេសនៅពេលដែលធ្វើដំណើរទៅកាន់ផ្សារលក់ត្រី និងសាច់នៅសង្កាត់ជាច្រើនដូចជា Tiong Bahru (ផ្សារ Tiong Bahru Wet Market), Chinatown (ផ្សារ Chinatown Complex) និង Little India (ផ្សារ Tekka Centre) ដោយនៅទីនោះ មានលក់ផលិតផលស្រស់ៗ សាច់កក គ្រឿងទេស អាហារគ្រាម និងទំនិញជាច្រើនទៀត។ មិនត្រឹមតែប៉ុណ្ណោះ លោកអ្នកក៏អាចដឹងកាន់តែច្បាស់ពីការលក់ដូររបស់ប្រជាពលរដ្ឋក្នុងតំបន់ទាំងនោះផងដែរ។

១០. រក្សាភាពសកម្មជានិច្ច

មានសកម្មភាពជាច្រើនដែលលោកអ្នកអាចធ្វើបាន ដើម្បីធ្វើឲ្យអារម្មណ៍របស់លោកអ្នកនៅតែមានភាពស្រស់ស្រាយជានិច្ច។ លោកអ្នកអាចធ្វើដំណើរទៅកាន់កន្លែងហាត់ប្រាណសាធារណៈ AMPED ឬក៏សាកល្បងជាមួយនឹងកីឡាឡើងភ្នំ នៅ Kallang Wave Mall។ ជាមួយគ្នានេះ លោកអ្នកអាចទៅកម្សាន្តនៅកន្លែងលេងកម្សាន្ត Escape Room ដើម្បីជំនួយផ្នែកស្មារតី ក៏ដូចជាសកម្មភាពហាត់ប្រាណជាច្រើនផ្សេងទៀតដែលលោកអ្នកចូលចិត្ត បើទោះបីជាអ្នកជាភ្ញៀវទេសចរក៏ដោយ៕