ការប្រមូល​ផ្តុំ​ដោយ​តំបន់​ទេសចរណ៍​ចម្រុះទាំង​វប្បធម៌ និង​អេកូទេសចរណ៍ ម្ហូប​អាហារឆ្ងាញ់​ៗ​ដ៏សម្បូរ​បែប និងមានអនាម័យ បរិស្ថានស្អាត ​ឆ្នេរខ្សាច់ដ៏​ស្រស់ស្អាត និង​រមណីយដ្ឋាន​​ដ៏​ទាក់​ទាញជាច្រើន កន្លែង​កម្សាន្ត​ទំនើបៗ និង​ស៊ីវីឡៃ សម្រាប់​ទាំង​ក្មេង និង​មនុស្សចាស់ ការ​ប្រមូលផ្តុំ​ផ្សារ​ទំនើប​ដែលមានការ​រចនា​ផ្សេង​ៗ​គ្នា និង​លក្ខខណៈ​ពិសេស​ជាច្រើន​ទៀត សុទ្ធ​សឹង​ជា​សម្រស់​​​ដែល​ទាក់​ទាញ​មនុស្ស​​ជា​ច្រើន​ទូ​ទាំង​ពិភព​​ក្នុងការ​​ធ្វើ​ដំណើរ​ទៅ​កម្សាន្ត​នៅ​សិង្ហ​បុរី ក្នុងនោះ​រាប់​បញ្ចូល​ទាំង​ប្រជាជន​កម្ពុ​ជា ផង​ដែរ​។

ជា​មួយ​គ្នានេះ ភាព​មមា​ញឹក និងភាព​រួស​រាយរាក់​ទាក់​​របស់​ពលរដ្ឋ​នៅសិង្ហ​បុរី ក៏ដូច​ជា ភាពច្នៃ​ប្រឌិត​ខ្ពស់នៃ​ការ​រៀប​​ចំ​សណ្ឋាប់​ធ្នាប់​តាម​ទីសាធារណៈ និងកន្លែង​កម្សាន្ត​នានា ក៏​ជា​ចំណុច​នៃ​ការ​ទាក់​ទាញ​ភ្ញៀវ​ទេសចរ​ក្នុងការ​ធ្វើ​ដំណើរ​កម្សាន្ត​ប្រទេស​កោះ​មួយ​នេះ​ផង​ដែរ​។

លោក​ហេង សុធារិទ្ធិ ដែល​ជា​បុគ្គ​លិក​ផ្នែកសរសេរ​អត្ថ​បទម្នាក់ បាន​ចែក​រំលែកបទពិសោធ​ផ្ទាល់​ខ្លួន​របស់លោក នៅពេល​ដែលលោក​បាន​ធ្វើ​ដំណើរ​ទៅ​ទស្ស​ន​កិច្ច​ក្នុង​ប្រទេស​សិង្ហ​បុរី កាលពីឆ្នាំ​២០១៧ បើ​ទោះ​បី​លោក​បាន​ចំណាយ​​ពេលត្រឹម​តែ​៤​ថ្ងៃ ដើម្បី​បំពេញ​ការ​ងារ​នៅ​ទីនោះ​ក៏ដោយ​។

លោក​បាន​ប្រាប់ Sabay ថា៖ «បាទ​ ខ្ញុំ​ធ្លាប់​ទៅ​ប្រទេស​សិង្ហបុរី។ កាល​នោះ​ខ្ញុំ​ទៅ​បំពេញ​ការងារ រយៈពេល​៣យប់ ៤​ថ្ងៃ​កាល​ពី​ឆ្នាំ​២០១៧។ កន្លែង​ដែល​ខ្ញុំ​បាន​ទៅ​មាន Marina Bay Sands Singapore, Singapore Universal Studios, Orchard Road និង Singapore Indoor Stadium»។

លោក​បាន​ប្រាប់​បន្ត​ថា៖ «ពេល​ទៅ​ដល់​ទីនោះ ​ខ្ញុំ​បាន​កត់សម្គាល់​ឃើញ​មាន​អគារ​ពាណិជ្ជកម្ម​ខ្ពស់​ៗ​ផ្ដុំ​គ្នា​ចំណុច​តែមួយ ចរាចរណ៍​គោរពច្បាប់​ល្អ ជា​ប្រទេស​ទំនើប គ្មាន​សំរាម សម្បូរ​រថយន្ត​ទំនើប​ៗ និង​មាន​ម្អូបអាហារ​ឆ្ងាញ់​ៗ ប៉ុន្តែ​សម្បូរ​កន្លែង​កម្សាន្ត​បែប​ច្នៃ​ប្រឌិត សុវត្ថិភាព និង​ការ​រស់​នៅ​របស់​ប្រជាជន​មាន​សណ្ដាប់ធ្នាប់ ដែល​ខ្ញុំមិនធ្លាប់​បាន​ឃើញ​ពីមុន​មក​»​។

នៅ​ពេល​ដែល​​ត្រូវ​បាន​ចោត​សួរ​ថា តើ​លោក​ចង់​ទៅដើរលេង​នៅសិង្ហ​បុរីម្តង​ទៀត ដែរ ឬទេ ហើយ​បើង​ចង់​ ហេតុ​អ្វី​? លោក​បាន​ឆ្លើយ​ថា៖ «បាទ ខ្ញុំ​ពិត​ជា​ចង់​ទៅ​ម្ដង​ទៀត ព្រោះ​ខ្ញុំ​ចង់​ដឹងថា​រយៈពេល​៤​ឆ្នាំ​​មក​នេះ ​សិង្ហបុរី​មាន​ការ​ផ្លាស់ប្ដូរ​អ្វី​ខ្លះ។ ដោយ​សារ​តែ​ខ្ញុំ​បាន​ទៅ​​សិង្ហ​បុរីក្នុង​រយៈ​ពេលខ្លី ខ្ញុំ​ចង់​​ទៅម្ដង​ទៀត​នូវ​ទីតាំង​ដែល​ខ្ញុំ​បានរៀបរាប់​ខាង​លើ និង​កន្លែងដែល​ជាច្រើន​ទៀត​ដូច​ជា Jurong Bird Park, Sentosa, Flower Dome និង Supertree Grove ដែល​ជា​កន្លែង​ខ្ញុំ​មិន​ទាន់​បាន​ទៅ»។

ស្រប​ពេល​ជាមួយ​គ្នា​នេះ អ្នក​ស្រីចាន់ សុធារី ដែល​ជា​បុគ្គ​លិក​ឯកជន​ម្នាក់​ បាន​លើក​ឡើង​ដូចគ្នានេះ តាមរយៈ​ការ​បញ្ជាក់​ថា៖ «ខ្ញុំ​ពិត​ជា​ចង់​ទៅ​ដើរ​លេងនៅសិង្ហ​បុរីម្តង​ទៀត ព្រោះ​ថា សិង្ហ​បុរី ជា​ប្រទេស​មានភាព​ទំនើប មាន​កន្លែង​​ដើរ​លេង​ច្រើន​ទាំងសម្រាប់​ក្មេងៗ និង​មនុស្ស​ចាស់​ ហើយ​អ្វី​ដែល​គួរ​ឲ្យ​ចាប់អារម្មណ៍​នោះ​គឺ​ថា សិង្ហ​បុរី​មាន​ភាព​ច្នៃ​ប្រឌិត​ខ្ពស់លើការ​រចនា​រមណីយដ្ឋាននានា​។ ខ្ញុំក៏ចង់ទៅកម្សាន្ត​កន្លែង​ទើប​បង្កើត​ថ្មី​ៗផង​ដែរ ហើយ​ការ​ចំណាយ​លើការ​ចូល​កម្សាន្ត​នៅកន្លែង​នានា ក៏​សម​ហេតុ​ផលផង​ដែរ ពោល​គឺ​ចូល​ហើយ​មិនស្តាយលុយ​»​។

អ្នក​ស្រី បាន​ទៅ​ដើរ​លេង​២លើក​រួច​មកហើយ គឺ​នៅ​ឆ្នាំ ២០១៣ និង ២០១៧ ជាមួយនឹង​ក្រុម​គ្រួ​សារ និ​ងកូន​ៗ​ របស់អ្នក​ស្រី ដោយ​កាល​នោះ​អ្នក​ស្រី​បាន​ទៅ​​​ដើរលេង​កន្លែង​ជាច្រើន​ដូច​ជា Gardens By The Bay​, S.E.A Aquarium, Marina Bay Sands, Singapore Flyer, Universal Studios Theme Park, Merlion Park, National Gallery Singapore ព្រំដែនម៉ា​ឡេ​ស៊ី និង​សិង្ហ​បុរី សារមន្ទីរ Art Science នៅ Marina Bay Sands, បណ្ណាល័យជាតិ Singapore, Fountain of Wealth, Private Street Food Tour និង Mint Museum of Toys។

ក្នុង​ចំណោម​កន្លែង​ទាំង​អស់ អ្នក​ស្រី​ចាប់​អារម្មណ៍​ជាពិសេស ពេល​ទៅ​កម្សាន្តនៅ S.E.A Aquarium ដោយ​សារ​តែ​ទីនេះ ធ្វើ​ឲ្យ​ក្រុម​គ្រួ​សារ​អ្នក​ស្រីប្លែក​អារម្មណ៍ និង​ប្លែក​ភ្នែក ក៏ដូច​ជា កោតសរសើរ​ស្នា​ដៃ​នៃការ​រៀប​ចំ​ដែលមានលក្ខខណៈ​ច្នៃ​ប្រឌិត​ខ្ពស់​។

ជាមួយ​គ្នា​នេះ ពេល​ទៅ​ដើរកម្សាន្ត​នៅ​សិង្ហ​បុរី ស្រីពៅ បាន​កត់សម្គាល់​ឃើញ​ថា ប្រទេស​នេះ ភាពរីកចម្រើនខ្លាំងទាំងក្នុងទីក្រុង និងជាយក្រុង ប្រជាជនភាគច្រើនគឺរវល់ខ្លាំង មាន​កន្លែងគេង អាហារឆ្ងាញ់ៗ មានអនាម័យ តម្លៃសមរម្យ ជា​ចម្រើន​ជម្រើស ឱ្យតែចេះរកកន្លែង ប្រជាជនមានវិន័យល្អ មិន​បារម្ភ​ពី​រឿង​អសន្តិសុខ ជា​ដើម​។

ភ្ញៀវ​ទេស​ចរកម្ពុជា ម្នាក់​ទៀត បានប​ញ្ជាក់​ថា លោកក៏​ធ្លាប់​បាន​ធ្វើ​ដំណើរ​ទៅ​ប្រទេស​សិង្ហ​បុរី ១លើក​ដែរ ប៉ុន្តែ ទៅ​ដើម្បី​​បំពេញការ​ងារ​ និង​បាន​ចំណាយ​ពេលត្រឹម​តែ​២ថ្ងៃ​ប៉ុណ្ណោះ កាលពី​ដើម​ឆ្នាំ​២០១៨​​។ ពេល​ទៅ​ដល់​ភ្លាម លោកហៃ សុខខេង ដែល​សព្វថ្ងៃជាបុគ្គលិកក្រុមហ៊ុនឯកជនមួយ បាន​កត់​សម្គាល់​ឃើញ​ថា៖ «ខ្ញុំ​បានឃើញពីបរិស្ថានស្អាតល្អ មានពោរពេញដោយរុក្ខជាតិបៃតងគ្រប់ទីកន្លែង ​និងសំណង់មួយចំនួនមានភាពទាក់ទាញ​។ ខ្ញុំ​បាន​ឆ្លៀតទៅកម្សាន្ត​តែ​នៅ Merlion Park ដែល​ទីកន្លែងដ៏ពេញនិយម ប៉ុណ្ណោះ​»​។

ដោយ​ហេតុ​ថា លោក​បាន​ចំណាយ​ពេលខ្លី​ពេកនៅ​សិង្ហ​បុរី និង​មិន​បាន​ធ្វើ​ដំណើរ​ទៅដើរ​លេងនៅកន្លែង​ទេសចរណ៍​ឲ្យ​បាន​ច្រើន លោកសុខ​ខេង បាន​បញ្ជាក់​ថា៖ «ខ្ញុំ​ចង់ទៅម្ដងទៀត​​ ជាការដើរលេងកម្សាន្តសុទ្ធសាធ​ មិនមានពាក់ព័ន្ធនឹងការងារ ដោយហេតុថាចង់ដើរលេងឲ្យច្រើនកន្លែងជាងមុន ហើយកន្លែងដែលចង់ទៅបំផុតនោះគឺសួនរុក្ខជាតិ Supertree Grove, Marina Bay Sand និងហាង Apple Store នៅក្នុងព្រលានយន្តហោះ»​៕