ព្រះអង្គម្ចាស់សង្ហាព្រុយណេធ្លាប់ជាកីឡាករស៊ីហ្គេម និងជាយោធាជើងអាកាស

2022-11-11 12:12:49
ព័ត៌មាន

2022-11-11 12:12:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ព្រះអង្គម្ចាស់ អាប់ឌុល ម៉ាទីន (Abdul Mateen) ត្រូវបានទទួលបានការចាប់អារម្មណ៍ក្នុងចំណោមបណ្ដាញសង្គមនៅក្នុងប្រទេសកម្ពុជា ខណៈពេលដែលព្រះអង្គអមដំណើរជាមួយនឹងព្រះចៅស៊ុលតង់ ហាសាណាល់ ប៊ុលកៀរ មកប្រជុំអាស៊ាននៅរាជធានីភ្នំពេញនៅក្នុងសប្ដាហ៍នេះ។

ប្រសូតក្នុងឆ្នាំ១៩៩១ ព្រះអង្គសង្ហាររូបនេះជាបុត្រាទី៤ និងបុត្រទី១០ ក្នុងចំណោមបុត្រ ១២អង្គ និងបុត្រា ៥អង្គរបស់ស្ដេចព្រុយណេ។ តាមពិតទៅព្រះអង្គមិនមែនជារជ្ជទាយាទព្រុយណេទេ ដោយរជ្ជទាយាទរបស់ស្ដេចស៊ុលតង់គឺ កូនច្បងព្រះនាម Al-Muhtadee Billah។

ព្រះអង្គម្ចាស់ម៉ាទីនមានសញ្ញាប័ត្រអនុបណ្ឌិតពីសាលាសិក្សាអាស៊ី និងអាហ្វ្រិក នៃសាកលវិទ្យាល័យរាជធានីឡុងដុង ជំនាញសិក្សាអន្តរជាតិ និងការទូតកាលពីឆ្នាំ២០១៦។ ព្រះអង្គក៏ធ្លាប់ចូលសាលាទាហាននៅប្រទេសអង់គ្លេសផងដែរ ហើយនៅពេលនេះដែរព្រះអង្គមានសក្ដិជាវរសេនីយ៍ត្រី (ប្រហាក់ប្រហែលនឹងសក្ដិ ៤)។

ដោយសារតែធ្លាប់រៀនផ្នែកការទូតនេះហើយ ទើបប្រហែលជាស្ដេចព្រុយណេយកព្រះអង្គម្ចាស់រូបនេះទៅតាមខ្លួនជាប្រចាំ អំឡុងពេលកិច្ចប្រជុំ និងកម្មវិធីរាជកិច្ចការបរទេសនានា។ ជាក់ស្ដែង ស្ដេចព្រុយណេ បាននាំព្រះអង្គម្ចាស់ម៉ាទីនទៅបុណ្យសពព្រះមហាក្សត្រិយ៍ អេលីហ្សាប៊ែតទី២ កាលពីខែកញ្ញាកន្លងទៅ។

ព្រះអង្គម្ចាស់វ័យ ៣០ឆ្នាំរូបនេះក៏មានចំណូលចិត្តខាងកីឡាជិះសេះវាយកូនបាល់ ឬ កីឡាប៉ូឡូ។ ព្រះអង្គធ្លាប់លេងតំណាងព្រុយណេក្នុងប្រកួតស៊ីហ្គេមនៅប្រទេសម៉ាឡេស៊ីកាលពីឆ្នាំ២០១៧ និងថៃកាលពីឆ្នាំ២០១៩។ រាជវង្សព្រុយណេរូបនេះធ្លាប់ទទួលបានមេដាយសំរឹទ្ធកាលពីឆ្នាំ២០១៧៕

អត្ថបទ៖ ហ៊ីម រស្មី