ជា​រឿង​គួរ​ឲ្យ​ត្រេក​អរ ខណៈ​ផលិតផល​ខ្មែរ​សុទ្ធ​សាធ​មួយ​ប្រភេទ ផលិត​ក្រោម​ពាណិជ្ជនាម "មិសុតា" កំពុង​មាន​តម្រូវ​ការ​កើនឡើង ក្នុង​នោះ​សង្វាក់​ផលិតកម្ម មានសមត្ថភាពកែច្នៃផ្លែឈើស្រស់ ១០ តោន ​ក្នុង​ ១ថ្ងៃ សម្រាប់​ផ្គត់ផ្គង់​តម្រូវ​ការក្នុងស្រុកនិងនាំចេញទៅបរទេស​ថែម​ទៀត។

តាម​លោក អុល តុលា COO របស់ មិសុតា បាន​បញ្ជាក់​ឲ្យ​ដឹង​ថា បច្ចុប្បន្នភាព រោង​ចក្រ មិសុតា មាន​ផ្គត់ផ្គង់​ផលិតផល​ប្រភេទ​ផ្លែ​ឈើ​សម្ងួត​ ផលិតផល​ជា​ច្រើន​ប្រភេទ ក្នុង​នោះ​មាន​ដូច​ជា៖ ១.ផ្លែឈើសម្ងួតធម្មជាតិ Oja (ស្វាយ ម្នាស់ ចេក) ២.តំណាប់ផ្លែឈើ Misota (ស្វាយ ម្នាស់ ក្រូចពោធិ៍សាត់) ៣.ផ្លែឈើស្រោបដោយជាតិសូកូឡា Misota​ ៤.ផ្លែឈើសម្ងួតចម្រុះ Green charm និង ​៥.សុរា Jatoro។

ផលិតផល​ទាំង​នេះ សុទ្ធ​ជា​ផលិតផល​កែច្នៃ​ពី​ផ្លែឈើ ក៏​ដូច​ជា​កសិផល​ក្នុង​ស្រុក ១០០% ។ លោក​ថា "មិសុតា​ នៅមានអាយុកាល ក្មេងខ្ចី នៅឡើយ ពោលគឺទើបតែដំណើរការបានសម្រាប់​ពាណិជ្ជកម្ម ក្រោយពេលកូវីដបានធូរស្បើយ ប៉ុណ្ណោះ ប៉ុន្តែមានសន្ទុះរីកចម្រើនគួរឲ្យកត់សំគាល់"។

ទោះបីជាមានការលំបាកយ៉ាងណាក្តី លោក​អះអាង​ថា អតិថិជនខ្មែរ ជប៉ុន និងបរទេសជាច្រើនកំពុងគាំទ្រ និងផ្តល់ការទុកចិត្តលើផលិតផលរបស់ មិសុតា។ ស្របជាមួយកំណើនពេញនិយមនេះ មិសុតា ព្យាយាមពង្រីកខ្សែសង្វាក់ផលិតកម្មរបស់ខ្លួនដើម្បីទី១ ឆ្លើយ​តប​តម្រូវ​ការ​ទីផ្សារ និង​ទី២ ជួយសម្រាលទុក្ខលំបាករបស់កសិករខ្មែរឲ្យបានកាន់តែប្រសើរ បង្កើតការងារជូនពលរដ្ឋ ផ្តល់ជូនអតិថិជននូវផលិតផលអាហារមានជីវជាតិ និងគុណភាពល្អសម្រាប់សុខភាព លើកស្ទួយកិត្តិនាមផលិតផលខ្មែរលើឆាកអន្តរជាតិ និងចូលរួមចំណែកកសាងសេដ្ឋកិច្ចសង្គមកម្ពុជា។

មិសុតា​ ជា​រោងចក្រ កែច្នៃផ្លែឈើស្រស់ និងកសិផលដែលប្រមូលពីចំការនានារបស់កសិករខ្មែរដូចជា ស្វាយ ម្នាស់ ចេក ស្រការនាគ ផ្កាម្ជូរល្មម និងទឹកឃ្មុំ ដើម្បីបង្កើតជាផលិតផលដែលមានគុណតំលៃល្អសម្រាប់ទីផ្សារក្នុងស្រុក និងនាំចេញទៅលក់នៅបរទេស។

លោក អុល តុលា លើក​ឡើង​ថា នៅរដូវប្រមូលផល មិសុតា មើល​ឃើញ​ថា ផ្លែឈើស្រស់ដែលកសិករខ្មែរធ្វើបានមានបរិមាណសំបូរហូរហៀរ ហើយផ្លែឈើទាំងនោះពិបាករក្សាទុកបានយូរ ត្រូវការប្រញាប់លក់ចេញបន្ទាន់។ ប្រសិនបើលក់មិនទាន់ វាជាការខាតបង់មួយដ៏ធំ។ ហេតុដូច្នេះហើយបានជា មិសុតា ព្យាយាមតាមលទ្ធភាពដែលខ្លួនមានប្រមូលទិញ និងប្រើប្រាស់ផ្លែឈើក្នុងស្រុកជាវត្ថុធាតុដើមដើម្បីផលិតជាផ្លែឈើសម្ងួតធម្មជាតិ តំណាប់ផ្លែឈើ តែសុខភាព និងភេសជ្ជៈ ដោយអនុលោមតាមស្តង់ដារអន្តរជាតិផ្នែកសុវត្ថិភាពអាហារនិងគុណភាព (HACCP, Halal, ISO 9001: 2015, ISO 22000: 2018)។

បច្ចុប្បន្ន រោងចក្រ មិសុតា មានទីតាំងនៅទីរួមខេត្តបាត់ដំបង​ បំពាក់ដោយឧបករណ៍សំភារៈ​ដែល​មានស្តង់ដារអនាម័យ និងមានក្រុមការងារទាំងអស់ជាជនជាតិខ្មែរដែលបានឆ្លងកាត់ការអប់រំនិងវគ្គបណ្តុះបណ្តាលគ្រប់ជំនាញ ទាំងបច្ចេកវិទ្យាកែច្នៃអាហារ ប្រព័ន្ធគ្រប់គ្រងគុណភាព និងជំនាញធុរកិច្ចផ្សេងៗពីសាកលវិទ្យាល័យនិងស្ថាប័នក្នុងប្រទេសកម្ពុជា​ បារាំង បែលហ្សិក ជប៉ុន និង ថៃ។

ទន្ទឹម​គ្នា​នេះ ស្របតាមតម្រូវការ មិសុតា រៀបចំជាវគ្គបណ្តុះបណ្តាលដល់កសិករ អ្នកផ្គត់ផ្គង់ និងបុគ្គលិកគ្រប់លំដាប់ថ្នាក់ នៅក្នុងរោងចក្រនិងនៅតាមកម្មវិធីដែលឧបត្ថម្ភដោយក្រសួងនិងស្ថាប័នដៃគូអភិវឌ្ឍន៍ជាច្រើនដូចជា USAID, GIZ, CapRed និង CJBI៕