ខែមេសា ខាងមុខនេះ ទឹកដីកម្ពុជាទាំងមូលនឹងរំជើបរំជួលដោយបរិយាកាសសប្បាយរីករាយនៃបុណ្យចូលឆ្នាំថ្មីប្រពៃណីជាតិ។ ក្រសួងទេសចរណ៍បានប្រកាសជាផ្លូវការអំពីការរៀបចំព្រឹត្តិការណ៍សង្ក្រាន្តទ្រង់ទ្រាយធំនៅតាមបណ្តាខេត្តសំខាន់ៗចំនួនបួន ដែលរំពឹងថា​ នឹងទាក់ទាញភ្ញៀវទេសចរជាតិ និងអន្តរជាតិរាប់ម៉ឺននាក់។

អង្គរសង្ក្រាន្ត (Angkor SANKRANTA) ខេត្តសៀមរាប៖ ពីថ្ងៃទី១៤ ដល់ទី១៦ ខែមេសា ទឹកដីអង្គរនឹងក្លាយជាឆាកនៃការសម្តែងសិល្បៈវប្បធម៌ ការលេងល្បែងប្រជាប្រិយ និងការជួបជុំសប្បាយរីករាយ។

សង្ក្រាន្តវត្តភ្នំ (Wat Phnom SANKRANTA) រាជធានីភ្នំពេញ៖ ក្នុងរយៈពេលបីថ្ងៃដូចគ្នា វត្តភ្នំនឹងប្រែក្លាយជាទីកន្លែងនៃការប្រារព្ធពិធីសាសនា និងការកម្សាន្តបែបប្រពៃណី។

សង្ក្រាន្តកំពង់ចាម (Kampongcham SANKRANTA) ខេត្តកំពង់ចាម៖ ខេត្តកំពង់ចាមក៏នឹងរៀបចំកម្មវិធីសង្ក្រាន្តដ៏អធិកអធមដើម្បីអបអរសាទរឆ្នាំថ្មីផងដែរ។

សង្ក្រាន្តតាកែវ (Takeo SANKRANTA) ខេត្តតាកែវ៖ ខេត្តតាកែវក៏នឹងរៀបចំកម្មវិធីសង្ក្រាន្ត ដើម្បីទទួលស្វាគមន៍ភ្ញៀវទេសចរដែលមកលេងកំសាន្តនៅក្នុងខេត្តនេះផងដែរ។

ក្រសួងទេសចរណ៍បានបញ្ជាក់ថា ក្រៅពីខេត្តទាំងបួននេះ នឹងមានព្រឹត្តិការណ៍សង្ក្រាន្តជាច្រើនទៀតដែលនឹងរៀបចំឡើងនៅតាមបណ្តាខេត្តផ្សេងៗទៀត ហើយព័ត៌មានលម្អិតនឹងត្រូវបានផ្សព្វផ្សាយជាបន្តបន្ទាប់។ ដូច្នេះ សូមប្រជាពលរដ្ឋ និងភ្ញៀវទេសចរទាំងអស់ត្រៀមខ្លួនរួចជាស្រេចដើម្បីចូលរួមក្នុងបរិយាកាសសប្បាយរីករាយនៃបុណ្យចូលឆ្នាំថ្មីប្រពៃណីជាតិខ្មែរ!