ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា មានការងាររាប់ម៉ឺនកន្លែងបើកជូនសាធារណជន ជាពិសេសសម្រាប់ពលករខ្មែរដែលទើបត្រឡប់មកពីប្រទេសថៃ។ ក្រុមហ៊ុនធំៗចំនួនបួនកំពុងជ្រើសរើសបុគ្គលិកជាង ៧,០០០ នាក់។

ការប្រកាសនេះធ្វើឡើងនៅក្នុងកម្មវិធី “វេទិកាការងារ” របស់ទីភ្នាក់ងារជាតិមុខរបរ និងការងារ (NEA) ដែលបានបើកដំណើរការនៅឃុំព្រៃឈរ និងឃុំមុខប៉ែន ស្រុកពួក ខេត្តសៀមរាប កាលពីថ្ងៃអាទិត្យ ដោយមានការចូលរួមពីឯកឧត្តម ឌី រ៉ាដូ អភិបាលរងខេត្តសៀមរាប និងមន្ត្រីពាក់ព័ន្ធផ្សេងទៀត។

ឯកឧត្តមរដ្ឋមន្ត្រីបានមានប្រសាសន៍ថា វេទិកានេះមានការចូលរួមពីក្រុមហ៊ុន រោងចក្រ និងសហគ្រាសមកពីបណ្តាខេត្ត និងក្រុងនានាទូទាំងប្រទេស ដែលបានមកសម្ភាសន៍ និងជ្រើសរើសពលករ រួមទាំងរោងចក្រផលិតសម្លៀកបំពាក់ ស្បែកជើង និងទំនិញផ្សេងៗទៀត។

ឯកឧត្តមបានបន្តថា ពលករខ្មែរដែលទទួលបានការងារក្នុងស្រុកអាចរកចំណូលបានចន្លោះពី ២៥០ ទៅ ៣០០ ដុល្លារក្នុងមួយខែ ហើយបើរាប់បញ្ចូលអត្ថប្រយោជន៍បន្ថែម ចំណូលសរុបអាចលើសពី ៣០០ ដុល្លារ។ លើសពីនេះ ពលករដែលធ្វើការនៅក្នុងប្រទេសនឹងទទួលបានការការពារសុខុមាលភាពតាមរយៈមូលនិធិសន្តិសុខសង្គមជាតិ (NSSF) របស់ក្រសួង ដែលរួមមានការធានារ៉ាប់រងនៅពេលឈឺ ឬជួបគ្រោះថ្នាក់ និងទទួលបានប្រាក់សោធននៅពេលចូលនិវត្តន៍។

ឯកឧត្តមបានបន្ថែមថា ស្ត្រីមានផ្ទៃពោះនឹងទទួលបានការពិនិត្យសុខភាពមុន និងក្រោយសម្រាលដោយឥតគិតថ្លៃនៅមន្ទីរពេទ្យដែលជាដៃគូរបស់ NSSF ព្រមទាំងទទួលបានប្រាក់ឧបត្ថម្ភចំនួន ១៤ ដង ដែលក្នុងមួយលើកមានចំនួន ៨០,០០០ រៀល។ ជាពិសេស សេវាសម្រាលកូននឹងផ្តល់ជូនដោយឥតគិតថ្លៃ ហើយម្តាយដែលទើបសម្រាលនឹងទទួលបានប្រាក់ឧបត្ថម្ភបន្ថែមពីរាជរដ្ឋាភិបាល គឺ ៨០០,០០០ រៀលសម្រាប់កូនមួយ មួយលានពីរសែនរៀលសម្រាប់កូនភ្លោះ និងមួយលានប្រាំមួយសែនរៀលសម្រាប់កូនបី ព្រមទាំងឈប់សម្រាកសម្រាល ៩០ ថ្ងៃតាមរយៈ NSSF ក្រោមក្រសួងការងារ និងបណ្តុះបណ្តាលវិជ្ជាជីវៈ។

នៅក្នុងវេទិកានេះ ឯកឧត្តមរដ្ឋមន្ត្រីក៏បានអំពាវនាវដល់ប្រជាពលរដ្ឋ ជាពិសេសពលករខ្មែរដែលទើបត្រឡប់ពីប្រទេសថៃ និងកំពុងស្វែងរកការងារធ្វើ ឲ្យទាក់ទងទៅក្រសួងការងារតាមរយៈលេខទូរស័ព្ទដែលមាននៅក្នុងខិតប័ណ្ណដែលបុគ្គលិកក្រសួងបានចែកជូន ដើម្បីទទួលបានឱកាសការងារភ្លាមៗ និងរកចំណូលដើម្បីទ្រទ្រង់ជីវភាព។