- 2016-10-16 23:20:02
- ព័ត៌មាន
ស៊ិន បូណា៖ "ខ្ញុំថតតែរូបតែចំណូលច្រើនជាងអ្នកធ្វើការខ្លះ ដូចជា...”
- 2016-10-16 23:20:02
- ចំនួនមតិ 0 | ចំនួនចែករំលែក 0
ស៊ិន បូណា៖ "ខ្ញុំថតតែរូបតែចំណូលច្រើនជាងអ្នកធ្វើការខ្លះ ដូចជា...”
ចន្លោះមិនឃើញ
“ខ្ញុំអាចរកចំណូលបានចន្លោះពី៣០-៤០ម៉ឺនរៀល ក្នុងមួយថ្ងៃ ហើយការងារនេះស្រួលជាងអ្នកធ្វើការខ្លះ ដូចជា អ្នកចាប់ម៉ូយតាមបេនឡានអីជាដើម"។ នេះជាការលើកឡើងរបស់ ស៊ិន បូណាន អ្នកថតរូបអាជីពប្រចាំនៅភ្នំរាប។
ថ្វីបើរកចំណូលបានស្រួលក៏ដោយ ក៏អ្នកថតរូបដែលមានបទពិសោធន៍ជិត២ ឆ្នាំរូបនេះបានបញ្ជាក់ថា លោកបានចំណាយទុនអស់ប្រមាណជាជាង ៥ពាន់ដុល្លារ ដើម្បីទិញសម្ភារៈមានកាម៉េរ៉ា ម៉ាស៊ីនសម្រាប់ព្រីនរូប និង ឧបករណ៍តុបតែង (ដេក័រ) ផ្សេងៗ ដើម្បីលម្អជាការទាក់ទាញឲ្យមានអ្នកថត។ ក្រៅពីថតនៅភ្នំរាប បូណាន ក៏បើករកស៊ីថតរូបនៅផ្ទះផងដែរ។
ចំពោះការមកថតរូបនៅភ្នំរាប គឺភាគច្រើននៅថ្ងៃចុងសប្ដាហ៍ ដែលមានភ្ញៀវមកលេងរមណីយដ្ឋានកែច្នៃមួយនេះច្រើន។ "អ្នកមកថតអាចថតភ្លាមយកភ្លាម និង អាចជ្រើសបានតាមទំហំដែលចង់បានព្រោះខ្ញុំមានទាំងម៉ាស៊ីនតូច និងធំ។ បើទំហំតូចខ្ញុំយកតាមខ្លួនរហូត តែបើទំហំធំ ត្រូវទៅផ្ទះព្រីន ដោយផ្ទះនៅក្បែរភ្នំរាបនេះ"។ បូណាន និយាយ។
នៅពេលចោទសួរថា ដោយសារយុវវ័យបច្ចុប្បន្នមានទូរសព្ទស្មាតហ្វូន ម៉្លោះហើយពួកគេអាចនឹងថតរូបតាមទូរសព្ទដោយខ្លួនឯង តើកត្តានេះអាចជះឥទ្ធិពលដល់ការរកស៊ីរបស់លោកដែរទេ? មិនប៉ះពាល់នោះទេ ព្រោះមិនមែនអ្នកមានទូរសព្ទទំនើបៗសុទ្ធតែចេះបច្ចេកទេសថតបានស្អាតនោះទេ ដូច្នេះ ពួកគេនៅតែមករកលោកថតរូបឲ្យ ដោយថតបានស្អាតផង និង ថតភ្លាមយកភ្លាម។ បូណាន ឆ្លើយតប។
“ខ្ញុំគិតថា បើយើងចេះថតច្បាស់លាស់កុំខ្លាចថាគេមិនថត យើងថតស្អាតគេនឹងរត់មករកយើង ខ្ញុំមិនបារម្ភពីស្មាតហ្វូនអីហ្នឹងទេ"។ ស៊ិន បូណាន និយាយ៕
ចង់ដឹងព័ត៌មានបន្ថែមចុចវីដេអូខាងក្រោមនេះ៖
អត្ថបទ៖ ប៊ិន ប៊ុណ្ណា
