- 2016-12-05 03:25:03
- សេដ្ឋកិច្ច
ដឹងតម្លៃព្រលិតនៅកន្លែងដាំក្នុងស្រុកស្វាយជ្រំ ទើបដឹងថាថោកប៉ុណ្ណា
- 2016-12-05 03:25:03
- ចំនួនមតិ 0 | ចំនួនចែករំលែក 0
ដឹងតម្លៃព្រលិតនៅកន្លែងដាំក្នុងស្រុកស្វាយជ្រំ ទើបដឹងថាថោកប៉ុណ្ណា
ចន្លោះមិនឃើញ
ព្រលិត ដែលដាក់លក់លើទីផ្សារនៅរាជធានីភ្នំពេញសព្វថ្ងៃ អាចមានប្រភពពីខេត្តនានាដែលសំបូរទឹកសាប ហើយក៏មានដាំនៅខេត្តស្វាយរៀងផងដែរ។ ឃុំព្រៃបាសាក់ ស្រុកស្វាយជ្រំ ខេត្តស្វាយរៀង មានបឹងមួយដែលយកដំណាំព្រលិតជារបរកំដរឆ្នាំងបាយប្រចាំថ្ងៃ ចំណែកតម្លៃដែលឈ្មួញកណ្ដាលទៅទិញ គឺថោកមិននឹកស្មានដល់។
កំពុងញាប់ដៃចងព្រលិតលក់ឲ្យឈ្មួញកណ្ដាលដែលទៅប្រមូលទិញ អ្នកស្រី យាន បានប្រាប់ក្រុមការងារផ្លូវទៅស្រុកថា អ្នកស្រីរករបរដកព្រលិតនេះ អស់រយៈពេលជាយូរឆ្នាំណាស់មកហើយ។ ចំណែកតម្លៃវិញ ១០ដុំ បានត្រឹម ៣ពាន់រៀលប៉ុណ្ណោះ ដែលក្នុង ១០ដុំនោះ មាន ១០០ដុំតូចៗ ហើយក្នុង ១ដុំតូច មានព្រលិតប្រវែងប្រមាណកន្លះម៉ែត្រ ៣ដើម។ បើគិតទៅ គឺ ១០ដុំតូច មានព្រលិត ៣០ដើម តម្លៃត្រឹម ៣០០រៀលប៉ុណ្ណោះ។
អ្នកស្រី យាន បានបញ្ជាក់ថា ពេលដល់រដូវមានទឹក ព្រលិតនេះអាចប្រមូលផលដកបានរាល់ថ្ងៃ ដោយជាមធ្យមដកបាន ១០០ដុំ ស្មើនឹង ៣ម៉ឺនរៀល។ កាលពីមុន ព្រលិតនេះលក់បានតម្លៃ ១០ដុំធំ ៤ពាន់រៀល ប៉ុន្តែបច្ចុប្បន្នបានត្រឹម ៣ពាន់រៀលប៉ុណ្ណោះ ព្រោះឈ្មួញកណ្ដាលប្រាប់គាត់ថាធ្លាក់ថ្លៃ លើទីផ្សារដែរ។ យ៉ាងណាក្ដី អ្នកស្រីបានអះអាងថា របរដកព្រលិតនេះ អាចផ្គត់ផ្គង់ជីវភាពប្រចាំថ្ងៃបាន។
បញ្ជាក់៖ ដំណាំព្រលិតនេះ នៅខេត្តស្វាយរៀង ហៅថា រំចង់ (មានដើមធំៗ ផ្កាពណ៌ក្រហម)។ ចំណែកបណ្ដាខេត្តនានា ហៅថា ព្រលិត។ ចំពោះដំណាំ រំចង់ (មានដើមតូចៗ ផ្កាពណ៌ស ឬស្វាយ) ខាងខេត្តស្វាយរៀងហៅថា ព្រលិត។ ឯនៅភ្នំពេញ និងខេត្តមួយចំនួន ហៅដំណាំទាំង២ ថាជា ព្រលិត ទាំងអស់៕
