- 2016-12-16 03:39:12
- ព័ត៌មាន
ចាប់កាដូថ្ងៃណូអែល ក្លាយជាទម្លាប់របស់យុវវ័យកំដរការសប្បាយជិតដាច់ឆ្នាំ
- 2016-12-16 03:39:12
- ចំនួនមតិ 0 | ចំនួនចែករំលែក 0
ចាប់កាដូថ្ងៃណូអែល ក្លាយជាទម្លាប់របស់យុវវ័យកំដរការសប្បាយជិតដាច់ឆ្នាំ
ចន្លោះមិនឃើញ
បុណ្យណូអែល កាន់តែខិតជិតមកដល់នាពេលខាងមុខនេះហើយ ចំណែកយុវវ័យមួយចំនួនបានទន្ទឹងរង់ចាំថ្ងៃនោះមកដល់ ដើម្បីចាប់កាដូជាការសប្បាយជិតដាច់ឆ្នាំចាស់ផ្លាស់ចូលឆ្នាំថ្មី។
តួយ៉ាង យុវតី អ៊ី នាង ជាសិស្សថ្នាក់ទី៩ នៃវិទ្យាល័យបាក់ទូកបានអោយដឹងថា អ្វីដែលសប្បាយជាងគេសម្រាប់កញ្ញាក្នុងពេលបុណ្យណូអែលគឺការលេងចាប់កាដូជាមួយមិត្តភក្តិ។ វាបានរឹតចំណងមិត្តភាពរវាងមិត្តភក្តិក្នុងថ្នាក់ ញ៉ាំអីជុំគ្នាជាដើម ហើយកាដូដែលកញ្ញាចង់បាននោះគឺតុក្កតារូបទា។ កាលពីឆ្នាំមុនកញ្ញាធ្លាប់ចាប់បាន តុក្កតាកូនទាម្ដងហើយ តែចង់អោយវាមានគូរក៏ប្រាថ្នាចង់ចាប់អោយបានម្ដងទៀត។
រីឯ យុវតី រីម៉ា វិញបានរៀបរាប់ថា កាលពីបុណ្យណូអែលឆ្នាំមុន ខ្លួនក៏ធ្លាប់លេងចាប់កាដូផងដែរ ជាមួយមិត្តភក្តិព្រោះមើលទៅសប្បាយរីករាយ ហើយធ្វើអោយមានចិត្តស្រលាញ់គ្នាថែមទៀត។ រីម៉ាបានបន្តថា លើកមុនខ្លួនចាប់កាដូបានកែវទឹក ប៉ុន្តែឆ្នាំនេះគឺប្រាថ្នាចាប់អោយបានសៀវភៅកំណត់ហេតុវិញម្ដង។
ងាកមកយុវជនឈ្មោះបុត្រមកពីសាលា អេ អាយ អេស វិញម្ដង ក៏បានបង្ហាញនូវចំណាប់អារម្មណ៍ផ្ទាល់ថា ខ្លួន និង មិត្តភក្តិក្នុងថ្នាក់តែងលេងចាប់កាដូនេះជានិច្ច នៅថ្ងៃបុណ្យណូអែលម្ដងៗ ដើម្បីការកម្សាន្ត និង ញ៉ាំនំជាមួយគ្នា។ កាលពីឆ្នាំមុនៗ បុត្រ ក៏ធ្លាប់ចាប់បានកាដូជាតុក្កតា និង នាឡិកាដៃផងដែរ។ ចំណែកឆ្នាំនេះគឺបុត្រប្រាថ្នាចង់ចាប់អោយបានកាដូរូប Pokemon មួយ។
ទាក់ទងនឹងការចាប់កាដូនេះដែរ លោក សុង ហុក គ្រូបង្រៀននៅសាលាឯកជនមួយ បានបញ្ចេញមតិថា មិនមែនជាការខុសទាស់អ្វីឡើយ ព្រោះអាចជាការកម្សាន្ត រឹតចំណងមិត្តភាពរវាងគ្នានឹងគ្នាផង។ ទោះបែបនេះក្ដី លោកបានសំណូមពរឲ្យយុវវ័យចាំច្បាស់ពីវប្បធម៌ខ្មែរ កុំឲ្យវប្បធម៌បរទេសគ្របដណ្ដប់បាន។ លោក ហុក បាននិយាយថា៖ "គ្មានទាស់អីទេ លេងក៏លេងទៅ ព្រោះស្រុកណាក៏មានចឹងដែរ តែកុំឲ្យភ្លេចអ្វីដែលខ្លួនមាន"។
