- 2018-10-26 04:48:11
- ព័ត៌មាន
កុំឆាប់ជឿ និងចែករំលែកព័ត៌មានលើបណ្តាញសង្គមពេក តិចនាំទុក្ខដាក់ខ្លួន
- 2018-10-26 04:48:11
- ចំនួនមតិ 0 | ចំនួនចែករំលែក 0
កុំឆាប់ជឿ និងចែករំលែកព័ត៌មានលើបណ្តាញសង្គមពេក តិចនាំទុក្ខដាក់ខ្លួន
ចន្លោះមិនឃើញ
អ្នកប្រើប្រាស់បណ្តាញសង្គមមួយចំនួនកាលពីម្សិលមិញបានចែករំលែករូបថតនារីអាក្រាតកាយម្នាក់កំពុងរត់លេងនៅសមុទ្រមួយកន្លែងដោយអ្នកខ្លះអះអាងថានៅសមុទ្រក្រុងកំពង់សោម និងបានរិះគន់ទៅលើវិអាជ្ញាធរទាក់ទងនឹងករណីនេះផងដែរ។
អ្នកប្រើប្រាស់បណ្តាញសង្គមបានចែករំលែកតៗគ្នា អមដោយសំណេរខ្លឹមសារនិយាយដល់ជនជាតិមួយទៀតផង។ ទោះយ៉ាងណារូបភាពនេះត្រូវបានព័ត៌មានវៀតណាមមួយចុះផ្សាយថារូបនេះគឺនៅសមុទ្រ Co Thach នៅខេត្តBinh Thuan ប្រទេសវៀតណាមទៅវិញ។
កាលពីពាក់កណ្តាលឆ្នាំ២០១៧ យ៉ាងហោចណាស់មានមនុស្សពីរនាក់ត្រូវបានចាប់ខ្លួន និងឃុំខ្លួនបណ្ដោះអាសន្នដោយសារតែអ្នកទាំងពីរជាប់សង្ស័យថាបានបង្ហោះព័ត៌មានមិនពិតទាក់ទងនឹងការចាប់ក្មេងនៅតាមបណ្ដាខេត្ត។ បុរសម្នាក់នៅក្នុងខេត្តកំពង់ធំត្រូវចៅក្រមស៊ើបសួរបង្គាប់ឲ្យឃុំខ្លួនបណ្ដោះអាសន្នស្ថិតក្រោមការត្រួតពិនិត្យពីបទ «ក្លែងព័ត៌មាន» តាមក្រមព្រហ្មទណ្ឌមាត្រា ៤២៥។
ហេតុអ្វីបានជាអ្នកប្រើប្រាស់បណ្តាញសង្គមបានចែករំលែកបន្តហើយគិតថាទិដ្ឋភាពនេះកើតឡើងនៅក្រុងព្រះសីហនុទៅវិញ? ការយល់ឃើញបែបនេះទំនងជាអ្នកប្រើប្រាស់បណ្តាញសង្គមមិនបានស្វែងរកប្រភពព័ត៌មានផ្សេងដើម្បីបញ្ជាក់បន្ថែម។
សាកលវិទ្យាល័យ Harvard របស់សហរដ្ឋអាមេរិកបានសរសេរអត្ថបទមួយនិយាយពីព័ត៌មានមិនពិតកំពុងរាលដាលនៅលើបណ្តាញសង្គម។ អ្នកចែករំលែកព័ត៌មានខ្លះ បានចុចចែករំលែកភ្លាមៗដោយមិនបានអាន ពិនិត្យលើខ្លឹមសារនោះទេ ដោយគ្រាន់តែបានឃើញចំណងជើងប៉ុណ្ណោះ។ មួយវិញទៀតការចែករំលែកព័ត៌មានតាមបណ្តាញសង្គមមានកាន់តែច្រើនចំពោះព័ត៌មានណាមួយដែលស្របតាមជំនឿរបស់អ្នកប្រើប្រាស់បណ្តាញសង្គម ជាជាងរកប្រភពបញ្ជាក់។ ប្រភពដដែលបន្ត។
ក្នុងអត្ថបទដដែលបញ្ជាក់ថាព័ត៌មានមិនពិតនឹងអាចនាំឲ្យមានបញ្ហាធ្ងន់ណាមួយកើតឡើង។ ត្រង់ចំណុចនេះកន្លងមកក៏មានដែរករណីគ្រូបង្រៀនម្នាក់នៅទីក្រុងភ្នំពេញបានរងរបួសធ្ងន់ដោយការវាយដំ ខណៈមានការផ្សព្វផ្សាយបន្តគ្នាថាលោកគ្រូម្នាក់នោះបានបើករថយន្តបុកបុរសម្នាក់រងរបួស និងព្យាយាមរត់គេច។
ដើម្បីជៀសវាងធ្លាក់ខ្លួនចាញ់បោក ឬជឿលើព័ត៌មានមិនពិត University of West Florida បានសរសេរដែរថាអ្នកអានត្រូវពិនិត្យលើប្រភពដែលផ្តល់ឲ្យតើអាចទុកចិត្តបានកម្រិតណា ជាប្រភពដែលមានឈ្មោះស្ថាប័នផ្តល់ត្រឹមត្រូវ និងជាស្ថាប័នទុកចិត្តបានឬទេ។
មួយវិញទៀតប្រភពដដែលក៏បានណែនាំអ្នកអានឲ្យចេះមើលប្រភពនៅក្នុងអត្ថបទតើមកពីណា មានមន្ត្រី ឬអ្នកពាក់ព័ន្ធចំពោះហេតុការណ៍ក្នុងអត្ថបទដែរឬយ៉ាងណា និងត្រូវចេះពិនិត្យលើកាលបរិច្ឆេតចេញផ្សាយថាតើជាបច្ចុប្បន្នភាពឬយូរមកហើយ។
ប្រភពខាងលើក៏បង្ហាញឲ្យដឹងទៀតថាសម្រាប់អត្ថបទខ្លះជាអត្ថបទបែបទស្សនៈដែលមានផ្សាយទាំងនៅលើសារព័ត៌មានអនឡាញ និងបោះពុម្ព។ អត្ថបទស្សនៈបែនេះជាភាសារអង់គ្លេសមានសរសេរជាពាក្យ «Editorials, Letters to the Editor, Op-Eds, Opinion» បញ្ជាក់នៅខាងដើមនៃចំណងជើងឬផ្នែកណាមួយនៃអត្ថបទស្រាប់។
បើតាមរបាយការណ៍របស់ការិយាល័យប្រជាសាស្ត្ររបស់សហរដ្ឋអាមេរិក ចេញផ្សាយកាលពីខែមករា ឆ្នាំ២០១៧ កម្ពុជាមានអ្នកប្រើប្រើប្រាស់អ៊ីនធឺណិតប្រមាណជា ៧លាននាក់ និងអ្នកដែលសកម្មប្រើប្រាស់បណ្ដាញសង្គមមានចំនួន ៤,៩លាននាក់ ក្នុងចំណោមប្រជាជនកម្ពុជាជិត ១៦លាននាក់៕
