- 2024-03-20 14:27:40
- ព័ត៌មាន
ប្រធានាធិបតីវៀតណាមលាលែងពីតំណែង ក្រោយកាន់បានតែមួយឆ្នាំ
- 2024-03-20 14:27:40
- ចំនួនមតិ 0 | ចំនួនចែករំលែក 0
ប្រធានាធិបតីវៀតណាមលាលែងពីតំណែង ក្រោយកាន់បានតែមួយឆ្នាំ
ចន្លោះមិនឃើញ
ប្រធានាធិបតីវៀតណាម លោក វ៉ូ វ៉ាន់ធួង (Vo Van Thuong) បានលាលែងពីតំណែង ក្រោយកាន់តំណែងបានតែមួយឆ្នាំ។ នេះបើតាមការចុះផ្សាយរបស់សារព័ត៌មានរដ្ឋវៀតណាមជាភាសាអង់គ្លេស VN Express។
លោក វ៉ូ ត្រូវបានតែងតាំងជាប្រធានាធិបតីកាលពីខែមីនា ឆ្នាំ២០២៣ ក្រោយពេលដែលលោក ង្វៀន សួនហ្វ៊ុក បានចុះចេញពីតំណែងកាលពីខែមករា ឆ្នាំមុន។
យោងតាមប្រភពខាងលើ លោក វ៉ូ បានចេញពីតំណែងដោយសារតែបញ្ហាផ្ទាល់ខ្លួន។ នេះបើតាមសេចក្ដីប្រកាសរបស់គណបក្សកុម្មុយនិស្តវៀតណាមនៅក្នុងថ្ងៃពុធនេះ។
បើយោងតាមរបាយការណ៍គណៈកម្មការអធិការកិច្ចមជ្ឈិមនៃបក្សកុម្មុយនិស្តវៀតណាម លោក វ៉ូ វ៉ាន់ធួង បានល្មើសនឹងបទវិន័យរបស់គណបក្សមួយចំនួន ដែលបង្កឱ្យ «ប៉ះពាល់ជាអវិជ្ជមានដល់សាធារណមតិវៀតណាម»។ ដោយដឹងពីកំហុសរបស់ខ្លួន លោក វ៉ូ បានសម្រេចចិត្តលាលែងពីតំណែង។
មកទល់ពេលនេះ មិនទាន់មានបក្ខជនវៀតណាមណាមួយមកជំនួសតំណែងប្រធានរដ្ឋនេះទេ។
សូមជម្រាបផងដែរថា តំណែងប្រធានាធិបតីជាតំណែងកិត្តិយសមួយនៅក្នុងប្រទេសវៀតណាម។ ក្នុងប្រព័ន្ធដឹកនាំរដ្ឋវៀតណាម មានតំណែង ៤ធំជាងគេរួមមាន អគ្គលេខាធិការគណបក្សកុម្មុយនិស្ត ប្រធានាធិបតី នាយករដ្ឋមន្ត្រី និងប្រធានរដ្ឋសភា៕