សហរដ្ឋអាមេរិក បានបង្ហាញពីសុទិដ្ឋិនិយមក្នុងការបន្តជំនួយយោធា និងចារកម្មដល់ប្រទេសអ៊ុយក្រែន បន្ទាប់ពីការផ្អាកមួយរយៈ ដែលត្រូវបានប្រកាសដោយរដ្ឋមន្ត្រីការបរទេសអាមេរិក លោក Marco Rubio។ ការលើកឡើងនេះធ្វើឡើងមុនកិច្ចប្រជុំដ៏សំខាន់មួយនៅថ្ងៃអង្គារ ទី១១ ខែមីនា រវាងមន្ត្រីជាន់ខ្ពស់អាមេរិក និងអ៊ុយក្រែន នៅទីក្រុង Jeddah ប្រទេសអារ៉ាប៊ីសាអូឌីត។ ក្នុងពេលជាមួយគ្នានេះ ប្រធានាធិបតីអ៊ុយក្រែន លោក Volodymyr Zelensky បានទៅដល់ប្រទេសអារ៉ាប៊ីសាអូឌីត កាលពីថ្ងៃច័ន្ទ ដើម្បីជួបពិភាក្សាជាមួយមន្ត្រីជាន់ខ្ពស់ រួមទាំងព្រះអង្គម្ចាស់ Mohammed bin Salman។

លោក Rubio បាននិយាយថា គោលដៅនៃកិច្ចប្រជុំនៅអារ៉ាប៊ីសាអូឌីត គឺដើម្បីស្តាប់ពីជំហររបស់អ៊ុយក្រែន និងវាយតម្លៃពីអ្វីដែលពួកគេអាចធ្វើបានដើម្បីសម្រេចបានសន្តិភាពជាមួយរុស្ស៊ី។ “យើងសង្ឃឹមថា កិច្ចប្រជុំនេះនឹងនាំមកនូវលទ្ធផលវិជ្ជមាន ហើយបញ្ហានៃការផ្អាកជំនួយនឹងអាចដោះស្រាយបាន” លោកបានប្រាប់អ្នកសារព័ត៌មាន ខណៈកំពុងធ្វើដំណើរទៅកាន់ទីក្រុង Jeddah។ លោកបានបន្ថែមថា ប្រសិនបើអ៊ុយក្រែន បង្ហាញឆន្ទៈក្នុងការចរចាដោយស្មោះត្រង់ សហរដ្ឋអាមេរិកអាចពិចារណាបន្តការផ្តល់ជំនួយដែលត្រូវបានផ្អាកតាំងពីខែមុន បន្ទាប់ពីជំនួបដ៏តានតឹងរវាងលោក Zelensky និងប្រធានាធិបតីអាមេរិក Donald Trump នៅសេតវិមាន។

ទន្ទឹមនឹងនេះ លោក Zelensky បានជួបជាមួយព្រះអង្គម្ចាស់ Mohammed bin Salman កាលពីថ្ងៃច័ន្ទ ដើម្បីពិភាក្សាអំពីជំហានចាំបាច់ក្នុងការបញ្ចប់សង្គ្រាមជាមួយរុស្ស៊ី ដែលបានអូសបន្លាយអស់រយៈពេល ជាង៣ឆ្នាំមកហើយ។ លោកបានសរសេរនៅលើបណ្តាញសង្គម X ថា “អ៊ុយក្រែនប្តេជ្ញាចិត្តយ៉ាងពេញទំហឹងចំពោះកិច្ចសន្ទនាប្រកបដោយផ្លែផ្កា ហើយយើងសង្ឃឹមថានឹងមានការសម្រេចចិត្ត និងជំហានចាំបាច់ដើម្បីនាំសន្តិភាពមកវិញ”។ ទោះជាយ៉ាងណា លោក Zelensky មិនត្រូវបានគេរំពឹងថានឹងចូលរួមក្នុងកិច្ចប្រជុំផ្លូវការនៅថ្ងៃអង្គារនោះទេ ដោយប្រតិភូអ៊ុយក្រែនដែលដឹកនាំដោយប្រធានបុគ្គលិករបស់លោក លោក Andriy Yermak នឹងតំណាងឱ្យប្រទេសនេះ។

កិច្ចប្រជុំនេះជាលើកដំបូងរវាងមន្ត្រីអាមេរិក និងអ៊ុយក្រែន ចាប់តាំងពីជម្លោះកើតឡើងក្នុងជំនួបនៅសេតវិមាន ដែលបាននាំឱ្យសហរដ្ឋអាមេរិកផ្អាកការចែករំលែកចារកម្ម និងជំនួយយោធា។ លោក Trump បាននិយាយនៅពេលថ្មីៗនេះថា ការផ្អាកនេះ “ជិតនឹងបញ្ចប់ហើយ” ហើយលោករំពឹងថា កិច្ចប្រជុំនៅអារ៉ាប៊ីសាអូឌីតនឹងនាំមកនូវ “លទ្ធផលល្អ”។ ទោះបីជាយ៉ាងនេះក្តី លោក Rubio បានប្រកាន់ជំហរប្រុងប្រយ័ត្ន ដោយនិយាយថា នៅតែមានព័ត៌មានលម្អិតជាច្រើនដែលត្រូវដោះស្រាយ ជាពិសេសទាក់ទងនឹងកិច្ចព្រមព្រៀងស្តីពីធនធានរ៉ែដ៏កម្ររបស់អ៊ុយក្រែន។

អារ៉ាប៊ីសាអូឌីត បាននឹងកំពុងដើរតួជាវេទិកាអព្យាក្រឹត សម្រាប់កិច្ចចរចាសន្តិភាព ដោយបានរៀបចំកិច្ចប្រជុំរវាងមន្ត្រីអាមេរិក និងរុស្ស៊ីកាលពីខែមុន។ ព្រះអង្គម្ចាស់ Mohammed bin Salman បានសង្កត់ធ្ងន់លើការគាំទ្រ ចំពោះកិច្ចខិតខំប្រឹងប្រែងអន្តរជាតិ ដើម្បីដោះស្រាយវិបត្តិអ៊ុយក្រែន និងសម្រេចបានសន្តិភាពយូរអង្វែង។ កិច្ចប្រជុំនៅថ្ងៃអង្គារនេះត្រូវបានគេមើលឃើញថា ជាឱកាសដ៏សំខាន់មួយដើម្បីស្តារទំនាក់ទំនងរវាងទីក្រុងវ៉ាស៊ីនតោន និងទីក្រុង Kyiv និងជំរុញឱ្យមានការវិវឌ្ឍឆ្ពោះទៅរកការបញ្ចប់សង្គ្រាម៕