- 2017-06-16 02:59:36
- ព័ត៌មាន
បុគ្គលឆ្នើម ៤រូប ទទួលការគោរព និងកោតសរសើរពីពលរដ្ឋខ្មែររាប់ម៉ឺននាក់
- 2017-06-16 02:59:36
- ចំនួនមតិ 0 | ចំនួនចែករំលែក 0
បុគ្គលឆ្នើម ៤រូប ទទួលការគោរព និងកោតសរសើរពីពលរដ្ឋខ្មែររាប់ម៉ឺននាក់
ចន្លោះមិនឃើញ
បុគ្គលឆ្នើម៤ រូប បានទទួលការគោរព និងកោតសរសើរ ពីសំណាក់ប្រជាពលរដ្ឋខ្មែររាប់ម៉ឺននាក់ បន្ទាប់ពីអ្នកទាំង៤រូបនោះ បាននឹងកំពុងលះបង់គ្រប់បែបយ៉ាង ដើម្បីកិច្ចការងារមនុស្សធម៌ជាច្រើន ក្នុងប្រទេសកម្ពុជា។ បុគ្គលឆ្នើមទាំង៤ រូបនេះមាន៖
- លោក Scott Neeson អតីតផលិតករភាពយន្តហូលីវូត
បច្ចុប្បន្នលោកជាស្ថាបនិក មូលនិធិកុមារកម្ពុជា (Cambodian Children's Fund)។ លោកបានលក់អស់ទ្រព្យសម្បត្តិ ផ្ទះសម្បែងមករស់នៅក្នុងប្រទេសកម្ពុជា ដើម្បីជួយដល់កុមារក្រីក្ររស់នៅម្ដុំគំនរសំរាមស្ទឹងមានជ័យ អោយទទួលបានការអប់រំ។ លោកក៏ត្រូវបានព្រះមហាក្សត្រនៃព្រះរាជាណាចក្រកម្ពុជាប្រទានសញ្ជាតិខ្មែរ កាលពីអំឡុងឆ្នាំ ២០១៥ បន្ទាប់ពីបានរស់នៅ និងធ្វើការងារមនុស្សធម៌ក្នុងប្រទេសកម្ពុជាជាង ១០ឆ្នាំ។
- លោកវេជ្ជបណ្ឌិត Beat Richner ស្ថាបនិកមន្ទីរពេទ្យគន្ធបុប្ផា
លោក Beat Richner ស្ថាបនិកមន្ទីរពេទ្យគន្ធបុប្ផាបានចូលមកបម្រើការងារក្នុងប្រទេសកម្ពុជាឱ្យកាកបាទក្រហមស្វីសអំឡុងឆ្នាំ ១៩៧៤ ដល់ ១៩៧៥ តែត្រូវបង្ខំចិត្តចាកចេញពីប្រទេសកម្ពុជាទៅវិញពេលខ្មែរក្រហមកាន់កាប់រាជធានីភ្នំពេញ។
លោកបានវិលមកកម្ពុជាអំឡុងឆ្នាំ ១៩៩១ សាងសង់មន្ទីរពេទ្យគន្ធបុប្ផាឡើងវិញ។ គិតមកដល់ពេលនេះមន្ទីរពេទ្យគន្ធបុប្ផាត្រូវបានបង្កើតឡើងជាង ២៥ ឆ្នាំ។ ឪពុកម្ដាយ និងអាណាព្យាបាលជាច្រើនបានហៅមន្ទីរពេទ្យនេះថា ជាពេទ្យទេវតា។ ទោះលោកបានលាលែងពីតំណែង កាលពីដើមឆ្នាំនេះ ដោយសារបញ្ហាសុខភាពក្ដី ក៏ប្រជាពលរដ្ឋខ្មែរទូទៅនៅតែចងចាំចំពោះទឹកចិត្តសប្បុរសធម៌មិនអាចកាត់ថ្លៃរបស់លោក ក្នុងការជួយសង្គ្រោះដល់អាយុជីវិតកុមារកម្ពុជារាប់ពាន់នាក់ឱ្យរស់រានមានជីវិត។
- លោកស្រី Angelina Jolie
ជាតារាភាពយន្តហូលីវូតដ៏ល្បីល្បាញមួយរូប លោកស្រី Angelina Jolie មានមនោសញ្ចេតនា និងទំនាក់ទំនងដ៏ជ្រាវជ្រៅជាមួយនឹងប្រទេសកម្ពុជា ចាប់តាំងពីលោកស្រី ចូលរួមធ្វើការសប្បុរសធម៌ជាមួយអង្គការសហប្រជាជាតិទទួលទទួលបន្ទុកសិទ្ធជនភៀសខ្លួនកាលពីឆ្នាំ ២០០១ និងបានទទួលយកកូនចិញ្ចឹមពីកម្ពុជាកាលពីឆ្នាំ ២០០២ ឈ្មោះ Maddox ។ បច្ចុប្បន្ននេះ Maddox មានអាយុ១៥ឆ្នាំ។ លោកស្រីក៏បានចូលរួមបង្កើតមូលនិធិ ដើម្បីជួយជំរុញដល់ការអភិវឌ្ឍនៅតំបន់ជនបទដាច់ស្រយាលផងដែរ។
លោកស្រី Jolie បានចាត់ទុកកម្ពុជា ជាផ្ទះទី២របស់គាត់ហើយថា ប្រទេសសំបូរទៅដោយសម្បត្តិវប្បធម៌ល្អគួរឲ្យស្រលាញ់។ កាលពីដើមឆ្នាំ ២០១៧ កន្លងមកនេះ លោកស្រីបានដាក់សម្ពោធនូវខ្សែភាពយន្តមួយ ដែលមានចំណងជើងថា “មុនដំបូងខ្មែរក្រហមសម្លាប់ប៉ារបស់ខ្ញុំ”។ ខ្សែភាពយន្តនេះត្រូវបានលោកស្រីចាត់ទុកថា អំណោយរបស់លោកស្រីចំពោះប្រជាជនកម្ពុជា ដែលជាស្រុកកំណើតរបស់ Maddox កូនចិញ្ចឹមរបស់លោកស្រី។
- លោក Christian des PALLIÈRES ស្ថាបនិករបស់អង្គការដើម្បីភាពញញឹមនៃកុមារ
លោក Christian des PALLIÈRES បានសម្រេចចិត្តចូលមកធ្វើការងារក្នុងប្រទេសកម្ពុជាអំឡុងឆ្នាំ១៩៩៣ ជាមួយនឹងអង្គការ Sipar ដើម្បីលើកកម្ពស់ការអប់រំ និងការអាននៅក្នុងប្រទេសកម្ពុជា។ ពេលធ្វើការងារជាមួយនឹងអង្គការ Sipar លោកបានមើលឃើញពីទុកលំបាករបស់កុមាររស់នៅម្ដុំស្ទឹងមានជ័យ និងមានអារម្មណ៍តក់ស្លុត អាណិតអាសូរនៅពេលដែលឃើញកុមារជាច្រើននាក់រើសអេតចាយនៅលើគំនរសំរាមនៅស្ទឹងមានជ័យ។
លោកបានលាឈប់ពីអង្គការ Sipar និងបានបង្កើតអង្គការដើម្បីភាពញញឹមនៃកុមារ PSE នៅឆ្នាំ១៩៩៥។ មកទល់នឹងពេលនេះ PSE បានជួយកុមារកម្ពុជារាប់ពាន់នាក់ ឲ្យចាកចេញពីគំនរសំរាមស្ទឹងមានជ័យ និងចាកចេញពីទុរគតភាព ហើយកុមារទាំងនោះទទួលបានការសិក្សា អាហារ សំលៀកបំពាក់ និងការស្នាក់នៅសមរម្យ ព្រមទាំងបណ្ដុះបណ្ដាលវិជ្ជាជីវៈថែមទៀតផង។
PSE មានបីសាខា គឺនៅភ្នំពេញ សៀរាម និងក្រុងព្រះសីហនុ។ ប៉ុន្តែជាអកុសលលោកបានទទួលមរណៈភាពដោយជរាពាធ ក្នុងជន្មាយុ ៨២ឆ្នាំ កាលពីអំឡុងខែ កញ្ញា ឆ្នាំ២០១៦ កន្លងមកនេះ។ ធាតុរបស់លោកមួយផ្នែកធំត្រូវបានយកទៅបាចលើគំនរសំរាមស្ទឹងមានជ័យ ជាទីដែលលោកបានជួបកុមាររើសសំរាម។