ទីបំផុតរថភ្លើងស៊េរីទំនើបកប់ មកដល់កម្ពុជាហើយ ត្រៀមដឹកអ្នកភ្នំពេញ មិនឲ្យចាញ់ស្រុកគេ

2019-01-09 02:13:04
ចរាចរណ៍

2019-01-09 02:13:04
ចំនួនមតិ 0 | ចំនួនចែករំលែក 0

ចន្លោះមិនឃើញ

រថភ្លើងធន់ស្រាលស៊េរីទំនើបចំនួន៣គ្រឿង របស់ក្រុមហ៊ុន Royal Railway Cambodia របស់អ្នកឧកញ៉ា គិត ម៉េង ដែលដំឡើងនៅប្រទេសម៉ិកស៊ីកូ ត្រូវបានដឹកតាមកប៉ាល់មកដល់កំពង់ផែក្រុងព្រះសីហនុហើយ កាលពីថ្ងៃទី០៨ ខែមករា ឆ្នាំ ២០១៩នេះ។ នេះបើតាមទំព័រហ្វេសប៊ុករបស់លោក Ramady Moun។

រូបភាព៖ Ramady Moun

រថភ្លើងទាំង៣គ្រឿងនោះ គឺសម្រាប់ដឹកជញ្ជូនប្រជាពលរដ្ឋពីស្ថានីយ ឆ្ពោះទៅកាន់ព្រលានយន្តហោះអន្តរជាតិភ្នំពេញ។ តាមប្រសាសន៍របស់ឯកឧត្ដម ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ឲ្យដឹងថា រថភ្លើងទាំង៣គ្រឿងនេះ នឹងជួយកាត់បន្ថយការកកស្ទះចរាចរណ៍ក្នុងរាជធានីភ្នំពេញ កាត់បន្ថយពេលវេលា ចំពោះអ្នកដែលត្រូវធ្វើដំណើរទៅព្រលានយន្តហោះ។ ជាពិសេសនោះ ថែមទាំងជួយលើកស្ទួយមុខមាត់រាជធានីភ្នំពេញ ក៏ដូចជាហេដ្ឋារចនាសម្ព័ន្ធក្នុងរាជធានីឲ្យកាន់តែមានសោភ័ណភាព។

រូបភាព៖ Ramady Moun

រថភ្លើងស៊េរីថ្មីនេះ មានលក្ខណៈពិសេសជាច្រើនដូចជា៖

១. រត់ចំណាយពេលត្រឹមតែ ២៥នាទីប៉ុណ្ណោះពីស្ថានីយ ទៅព្រលានយន្តហោះ

២. ក្បាលម៉ាស៊ីនចំនួនពីរ មុខមួយ និងក្រោយមួយ

៣ . បច្ចេកវិទ្យាចុងក្រោយបំផុត ប្រកបដោយសុវត្ថិភាពខ្ពស់ ដោយមានកៅអីដូចកៅអីក្នុងយន្តហោះ ដែលអាចបត់បែន និងកែតម្រូវទៅតាមចិត្ត

៤. បន្ទប់ទឹក ម៉ាស៊ីនត្រជាក់ ទ្វារស្វ័យប្រវត្តិ និងកន្លែងដាក់ឥវ៉ាន់នៅខាងលើអ្នកដំណើរ

៥. Wifi ទូរទស្សន៍ និងប្រព័ន្ធផ្ដល់ព័ត៌មានតាមវីដេអូ

រូបភាព៖ Ramady Moun

រថភ្លើង Tram ជាប្រភេទរថភ្លើងដែលរត់តែក្នុងក្រុងប៉ុណ្ណោះ នៅបណ្ដាប្រទេសជឿនលឿនមួយចំនួន បានដំណើរការរថភ្លើងប្រភេទនេះ ដើម្បីដឹកជញ្ជូនអ្នកដែលរស់នៅទីក្រុង។ ឥឡូវនេះនៅរាជធានីភ្នំពេញក៏មានផ្លូវរថភ្លើងប្រភេទនេះដែរ ដើម្បីដឹកជញ្ជូនអ្នកដំណើរទាំងឡាយណា ដូចជា៖ សិស្ស និស្សិត ព្រះសង្ឃ និងប្រជាពលរដ្ឋទូទៅ។

គួរឲ្យដឹងដែរថា កាលពីខែតុលា ឆ្នាំ២០១៨ នៅស្ថានីយរថភ្លើងរាជធានីភ្នំពេញ នាយកដ្ឋានផ្លូវដែក នាយកដ្ឋានព័ត៌មានវិទ្យា និងទំនាក់ទំនងសាធារណៈ និងក្រុមហ៊ុន Royal Railway បានជួបពិភាក្សាគ្នាអំពី ការត្រៀមរៀបចំយុទ្ធនាការផ្សព្វផ្សាយអំពីផ្លូវរថភ្លើង Tramway នេះ។

កិច្ចប្រជុំនេះផ្តោតសំខាន់ទៅលើ ការរៀបចំផែនការសកម្មភាព និងបំណែងចែកភារកិច្ចការងារក្នុងការរៀបចំ យុទ្ធនាការផ្សព្វផ្សាយអំពីរថភ្លើងប្រភេទថ្មី Tram រួមមានការរៀបចំលិខិតបទដ្ឋាននិងវិធានសុវត្ថិភាពសម្រាប់អ្នកធ្វើដំណើរឆ្លងកាត់ផ្លូវរថភ្លើង ការផលិតវីដេអូណែនាំ និងវីដេអូផ្សព្វផ្សាយអំពីចក្ខុវិស័យរបស់រាជរដ្ឋាភិបាលក្នុងការដាក់ឲ្យដំណើរការរថភ្លើងប្រភេទ Tram និងការអប់រំផ្សព្វផ្សាយដល់សិស្សានុសិស្ស និងស្ថាប័នពាក់ព័ន្ធ។

រថភ្លើងធុនស្រាលដែលក្រុមហ៊ុន Royal Railway បញ្ជាទិញពីប្រទេសម៉ិចស៊ីកូនេះ គឺមានតម្លៃ ២លានដុល្លារក្នុង១គ្រឿង។ ចំណែកឯខ្សែរថភ្លើងពីស្ថានីយភ្នំពេញ ទៅកាន់ព្រលានយន្តហោះអន្តរជាតិភ្នំពេញ ប្រវែង ១០គីឡូម៉ែត្រ ត្រូវបានដាក់ឲ្យដំណើរការ កាលពីព្រឹកថ្ងៃទី១០ ខែមេសា ឆ្នាំ២០១៨។ ដោយឡែកចំពោះរថភ្លើង Tram ស៊េរីទំនើបទាំង៣គ្រឿងនេះ នឹងដំណើរការនៅក្នុងពេលឆាប់ៗនេះ៕