• 2019-03-06 03:02:58
  • ចរាចរណ៍

ដឹង​ពិន័យ​ប៉ុន្មាន​អត់ បើ​ម៉ូតូ​កង់​បី ឬ​ទោ​ចក្រ​យានយន្ត​សណ្ដោង​រ៉ឺម៉ក​ បើក​បរ​អត់​មាន​ប័ណ្ណបើកបរ?

  • 2019-03-06 03:02:58
  • ចំនួនមតិ 3 | ចំនួនចែករំលែក 632

ចន្លោះមិនឃើញ

កាល​ពី​ពេល​ថ្មី​ៗ​នេះ សាលា​រាជធានី​ភ្នំពេញ បាន​ចេញ​សេចក្ដី​ជូន​ដំណឹង​ឲ្យ​ម៉ូតូ​កង់​បី ឬ​ទោចក្រ​យានយន្ត​សណ្ដោង​រ៉ឺម៉ក​ ទៅ​ចូលរួម​វគ្គ​បណ្ដុះ​បណ្ដាល​ច្បាប់​ដោយ​ឥត​គិត​ថ្លៃ​រយៈ​ពេល​២ខែ។ បន្ទាប់​ពី​រៀន​ចប់​២ខែ​នេះ សមត្ថកិច្ច​នឹង​ចាប់​រឹត​បន្តឹង​ច្បាប់​លើ​ម៉ូតូ​កង់​បី​ឥណ្ឌា ឬ​ទោ​ចក្រ​យានយន្ត​សណ្ដោង​រ៉ឺម៉ក ដែល​មិន​មាន​បណ្ណ​បើកបរ។ ប្រសិន​បើ​បើកបរ​អត់​មាន​បណ្ណ​បើកបរ​ត្រូវ​ពិន័យ​ប៉ុន្មាន​រៀល?

មាត្រា ៩ នៃ​អនុក្រឹត្យ​ស្ដីពី​ការ​ពិន័យ​អន្តរការណ៍​ចំពោះ​ល្មើស​នឹង​ច្បាប់​ស្ដីពី​ចរាចរណ៍​ផ្លូវ​គោក បាន​ចែក​ថា ត្រូវ​ពិន័យ​អន្តរការណ៍​ចំពោះ​អ្នក​បើកបរ​ទោ​ចក្រ​យានយន្ត​ ឬ​ទោ​ចក្រ​យានយន្ត​សណ្ដោង​រ៉ឺម៉ក​ ឬ​ត្រី​ចក្រ​យានយន្ត​ចំនួន​ទឹក​ប្រាក់ ៣០ ០០០ រៀល ចំពោះ​បទ​ល្មើស​បើកបរ​ដោយ​គ្មាន​បណ្ណ​បើកបរ។

មាត្រា​ដដែល​ ក៏​បាន​កំណត់​លើ​ការ​ផាក​ពិន័យ​ចំពោះ​អ្នក​បើកបរ​អត់​មាន​បណ្ណ​បើកបរ ប្រភេទ​យានយន្ត​ធុន​ស្រាល​ចំនួន​ទឹក​ប្រាក់ ៦០ ០០០ រៀល និង​ អ្នក​បើកបរ​យានយន្ត​ធុន​ធ្ងន់​ចំនួន​ទឹក​ប្រាក់​ ១សែន២ម៉ឺន៥ពាន់​រៀល។

យោង​តាម​សេចក្ដី​ជូន​ដំណឹង​​របស់​រដ្ឋបាល​រាជធានី​ភ្នំពេញ កាល​ពី​ដើម​ខែ​នេះ បាន​ឲ្យ​ដឹង​ថា ដើម្បី​ចូលរួម​កាត់​បន្ថយ​គ្រោះ​ថ្នាក់​ចរាចរណ៍​ធានា​បាន​នូវ​សុវត្ថិភាព​ដល់​អ្នក​ដំណើរ​ និង​ដើម្បី​ឲ្យ​ការ​ធ្វើ​ចរាចរ​ស្រប​តាម​ច្បាប់​ចរាចរណ៍​ផ្លូវ​គោក រដ្ឋបាល​រាជធានី​ភ្នំពេញ​បាន​ចាត់​ឲ្យ​មន្ត្រី​សាធារណការ​ និង​ដឹក​ជញ្ជូន​រាជធានី​ភ្នំពេញ រៀប​ចំ​វគ្គ​បណ្ដុះ​បណ្ដាល​ចរាចរណ៍​ផ្លូវ​គោក ជូន​ដល់​បងប្អូន​ដោយ​ឥត​គិត​ថ្លៃ ជា​រៀង​រាល់​ថ្ងៃ​សៅរ៍ ចាប់​ពី​ម៉ោង ៨ព្រឹក ដល់​ម៉ោង ១៧​ល្ងាច និង​មាន​រយៈពេល​២ខែ គិត​ចាប់​ពី​ថ្ងៃ​សៅរ៍​ទី០២ មីនា ដល់​ថ្ងៃ​ទី ០៤ ខែ​ឧសភា ឆ្នាំ​២០១៩ ស្ថិត​នៅ​អង្គភាព​ផ្ដល់​ប័ណ្ណ​បើកបរ​យានយន្ត​ ផ្លូវ​លេខ​ ៥៩៨ សង្កាត់​ច្រាំង​ចំរេះ​ទី២ ខណ្ឌ​ឫស្សីកែវ​ រាជធានី​ភ្នំពេញ ។ ក្រោយ​វគ្គ​បណ្ដុះបណ្ដាល​អាច​ដាក់​ពាក្យ​ប្រឡង​ទ្រឹស្ដី និង​ប្រឡង​ដៃ​ចង្កូត ដើម្បី​ទទួល​បាន​បណ្ណ​បើកបរ​យានយន្ត​ប្រភេទ (ក) ។

សេចក្ដី​ជូន​ដំណឹង​បាន​បញ្ជាក់​ទៀត​ថា ក្រោយ​បញ្ចប់​វគ្គ​បណ្ដុះ​បណ្ដាល​២ខែ​នេះ អាជ្ញាធរ​មាន​សមត្ថកិច្ច​នឹង​រឹត​បន្តឹង​អនុវត្ត​តាម​ច្បាប់​ចរាចរណ៍​ផ្លូវ​គោក​ជា​ធរមាន ដោយ​មិន​មាន​ការ​លើកលែង​អធ្យាស្រ័យ​ទៀត​ឡើយ៕

សូម​ចុចអាន៖ អាជីពរត់កង់បីមិនអន់ទេ តែបើចង់ធ្វើម្ចាស់របរនេះ ត្រូវគិតឲ្យវែងឆ្ងាយបន្តិច

អត្ថបទ៖ ប៊ិន ប៊ុណ្ណា

មតិយោបល់