• 2019-10-11 10:08:10
  • សេដ្ឋកិច្ច

ម៉ាឡេស៊ី បង្កើនមហិច្ឆិតាចង់បានភ្ញៀវទេសចរ ៣០លាននាក់ នៅឆ្នាំ២០២០

  • 2019-10-11 10:08:10
  • ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រទេសម៉ាឡេស៊ី បានដាក់គោលដៅ ដើម្បីស្រូបយកភ្ញៀវទេសចរឲ្យបាន ៣០លាននាក់ ហើយរំពឹងថា នឹងទទួលបានចំណូលប្រមាណជា ២៣ពាន់លានដុល្លារ នៅឆ្នាំ ២០២០។ នេះបើតាមការបញ្ជាក់ពី ឯកអគ្គរដ្ឋទូតម៉ាឡេស៊ីប្រចាំព្រះរាជាណាចក្រកម្ពុជា ឯកឧត្តម Eldeen Husaini Mohd Hashim នៅសណ្ឋាគារសុខាភ្នំពេញ កាលពីថ្ងៃរសៀល ទី១០ តុលា ឆ្នាំ ២០១៩។

ឯកឧត្តមឯកអគ្គរដ្ឋទូតម៉ាឡេស៊ី បានប្រាប់ Sabay ថា ម៉ាឡេស៊ីមើលឃើញពីសារៈសំខាន់នៃវិស័យទេសចរណ៍ ដោយបានផ្ដល់សេដ្ឋកិច្ចដល់ប្រទេសម៉ាឡេស៊ី និងប្រជាជនម៉ាឡេស៊ី។ «ការជួបជុំអ្នកសារព័ត៌មាននៅពេលនេះមានសារៈសំខាន់នៅក្នុងការជួយជំរុញផ្សព្វផ្សាយវិស័យទេសចរម៉ាឡេស៊ី ហើយខាងម៉ាឡេស៊ី នឹងបង្កើតកម្មវិធីនាំ អ្នកសារព័ត៌មាន សិល្បករ-សិល្បការិនី ទៅកាន់ម៉ាឡេស៊ីបន្ថែមទៀត ដើម្បីផ្សព្វផ្សាយអំពីវិស័យទេសចរណ៍ វប្បធម៌ និងម្ហូបអាហាររបស់ម៉ាឡេស៊ី»។

ឯកអគ្គរដ្ឋទូតម៉ាឡេស៊ីប្រចាំព្រះរាជាណាចក្រកម្ពុជា ឯកឧត្តម Eldeen Husaini Mohd

លោក NOR SHAZLY AZMI ជំនួយការនាយកទីផ្សារជាន់ខ្ពស់ប្រចាំទីផ្សារអាស៊ី នៃក្រុមប្រឹក្សាទេសចរណ៍ម៉ាឡេស៊ី បានបញ្ជាក់ផងដែរថា នៅក្នុងស្តង់ក្រុមប្រឹក្សាទេសចរណ៍ម៉ាឡេស៊ីក៏មាន ក្រុមហ៊ុនអាកាសចរណ៍ម៉ាឡេស៊ីអ៊ែរឡាញ និង ៣ក្រុមហ៊ុនទេសចរណ៍ក្នុងស្រុកមានដូចជា ក្រុមហ៊ុនទេសចរណ៍ វើលផបត្រាវែល, ធូរវើលត្រាវែល ខេមូឌា, អ៊ែ-តេ-អ៊ែ ធួរ ក៏បានចូលរួមលក់កញ្ចប់សេវាកម្មទេសចរណ៍ទៅប្រទេសម៉ាឡេស៊ីនូវទីកន្លែងថ្មីៗដល់អតិថិជិនខ្មែរដើម្បីទស្សនាផងដែរ។

យោងតាមសេចក្ដីប្រកាសព័ត៌មានរបស់ម៉ាឡេស៊ី ក៏បានបញ្ជាក់ដែរថា គោលដៅនៃឆ្នាំទស្សនាម៉េឡេស៊ី ២០២០ គឺដើម្បីបង្រួបបង្រួមអ្នកចូលរួមពីគ្រប់ឧស្សាហកម្មសហគ្រាសដើម្បីសម្រេចបាននូវគោលដៅរួមនេះ ស្របពេលដែលការទាក់ទាញភ្ញៀវទេសចរ មកពីពាសពេញពិភពលោក ឲ្យមកទទួលនូវបដិសណ្ឋារកិច្ចកក់ក្ដៅ និងទាក់ទាញជាច្រើន ដែលប្រទេសម៉ាឡេស៊ីមាន។

ការបង្កើនយុទ្ធសាស្រ្ត និងគោលដៅច្បាស់លាស់ នៃការទាក់ទាញទេសចរ គឺប្រទេសម៉ាឡេស៊ីបានជាប់ចំណាត់ថ្នាក់លេខ ២១ ក្នុងចំណោមប្រទេសដែលមានប្រាក់ចំណូលខ្ពស់បំផុតក្នុងវិស័យទេសចរណ៍ដោយនាំមកនូវចំណូលទេសចរ ៨៨,១ពាន់លានរីងហ្គីត (៣០.៩១ពាន់លានដុល្លារ) ក្នុងឆ្នាំ ២០១៨។

យោងតាមរបាយការណ៍ទេសចរណ៍ម៉ាឡេស៊ី បានឲ្យដឹងថា ចន្លោះខែមករាដល់ខែមិថុនា ឆ្នាំ ២០១៩ ចំនួនភ្ញៀវទេសចរសរុបបានកើនឡើង ៤,៩% ជាមួយនឹងចំនួនភ្ញៀវទេសចរ ១៣,៣៥ លាននាក់បើប្រៀបធៀបរយៈពេលដូចគ្នាកាលពីឆ្នាំមានចំនួន ភ្ញៀវទេសចរ ១២,៧៣ លាននាក់។

សម្រាប់តំបន់អាស៊ានក្នុងរយៈពេលដូចគ្នាមានកំណើន ៤.៧ ភាគរយជាមួយចំនួនភ្ញៀវទេសចរណ៍ ៩.៣៥ លាននាក់បើប្រៀបធៀបនឹងចំនួនភ្ញៀវទេសចរណ៍ ៨.៩៣ លាននាក់ក្នុងរយៈពេលដូចគ្នាកាលពីឆ្នាំមុន។ ទីផ្សារកម្ពុជាសម្រាប់យើងបានបង្ហាញពីកំណើនដ៏គួរឱ្យកត់សម្គាល់គឺ ១៨.១% ជាមួយនឹងចំនួនភ្ញៀវទេសចរ ៥១ ០០៥ នាក់បើប្រៀបធៀបទៅនឹងចំនួនភ្ញៀវទេសចរណ៍ ៤៣ ២០៦ នាក់កាលពីឆ្នាំមុន។

នៅឆ្នាំ ២០១៨ ដោយមានភ្ញៀវទេសចរ ២៥.៨ លាននាក់បានមកទស្សនាឆ្នេរសមុទ្ររបស់យើង ដែលប្រទេសម៉ាឡេស៊ីទទួលបានចំណាត់ថ្នាក់ទី ១៥ ក្នុងចំណោមប្រទេសដែលមានចំនួនភ្ញៀវទេសចរណ៍ច្រើនជាងគេ។ ទន្ទឹមនឹងនេះដែរប្រទេសម៉ាឡេស៊ីជាប់ចំណាត់ថ្នាក់លេខ ២១ ក្នុងចំណោមប្រទេសដែលមានប្រាក់ចំណូលខ្ពស់បំផុតក្នុងវិស័យទេសចរណ៍ដោយនាំមកនូវចំណូលទេសចរណ៍ ៨៤,១ ពាន់លានរីងហ្គីតក្នុងឆ្នាំ ២០១៨ ។

នៅអំឡុងដំណើរទស្សនកិច្ចនៅកម្ពុជា នាយករដ្ឋមន្ត្រីឯកឧត្តម Mahathir Mohamad បានចុះហត្ថលេខាលើអនុស្សរណៈយោគយល់គ្នាចំនួន ៦ ចំណុចជាមួយកម្ពុជា ក្នុងនោះ ក៏មានការដោះដូរ និងជំរុញសេដ្ឋកិច្ចតាមរយៈទេសចរណ៍រវាងប្រទេសទាំងពីរដែរ។ ដោយឡែកនៅក្នុងយុទ្ធនាការរួមវិញ អំឡុងពេលនេះ ម៉ាឡេស៊ី បាននិងកំពុងចាប់ផ្ដើមផែនការ យុទ្ធនាការស្រូបទាញទេសចរណ៍អន្តរជាតិទៅប្រទេសរបស់ខ្លួនសម្រាប់ឆ្នាំ ២០២០ ជាមួយពាក្យសោក "Visit truly Asia Malaysia 2020”

អត្ថបទ៖ ប៊ិន ប៊ុណ្ណា

មតិយោបល់
អត្ថបទពេញនិយម