- 2018-01-31 03:30:00
- សេដ្ឋកិច្ច
ញាក់សាច់ ពេលដឹងថាការកកស្ទះចរាចរណ៍អាចបណ្តាលឲ្យមានជំងឺកាចសាហាវទាំងនេះ
- 2018-01-31 03:30:00
- ចំនួនមតិ 0 | ចំនួនចែករំលែក 0
ញាក់សាច់ ពេលដឹងថាការកកស្ទះចរាចរណ៍អាចបណ្តាលឲ្យមានជំងឺកាចសាហាវទាំងនេះ
ចន្លោះមិនឃើញ
បញ្ហាកកស្ទះចរាចរណ៍មិនមែនមានតែនៅក្នុងទីក្រុងភ្នំពេញនោះទេ ទីក្រុងមួយចំនួនទៀតរបស់ប្រទេសក្នុងតំបន់ក៏ជួបបញ្ហាប្រហាក់ប្រហែលគ្នានេះដែរ។ល្បឿនបើកបរក្នុងទីក្រុងមួយចំនួននៅតំបន់អាស៊ីមានចន្លោះពី១២ទៅ២០គីឡូម៉ែត្រក្នុងមួយម៉ោងប៉ុណ្ណោះ។
ការសិក្សាមួយរកឃើញថាការកកស្ទះចរាចរនេះ មិនត្រឹមតែធ្វើឲ្យប៉ះពាល់ដល់សេដ្ឋកិច្ច ដោយត្រូវចំណាយថ្លៃប្រេងឥន្ធនៈ និងពេលវេលាច្រើនោះទេ តែក៏បាន ធ្វើឲ្យអ្នកធ្វើដំណើរមានបញ្ហាសុខភាពផងដែរ។
ជាការពិត តាមការសាកសួរពីអ្នកសារព័ត៌មាន Sabay ទៅកាន់អ្នកធ្វើដំណើរជិត១០នាក់ បានលើកឡើងប្រហាក់ប្រហែលគ្នាថា ការកកស្ទះចរាចរណ៍ពិតជាបានធ្វើឲ្យពួកគាត់មួម៉ៅ និងតានតឹងក្នុងចិត្តពិតមែន។ អារម្មណ៍បែបនេះកើតឡើងដោយសារតែពួកគាត់ខាតពេលវេលា ខាតថ្លៃប្រេងឥន្ធនៈ ក្នុងការធ្វើដំណើរ បួករួមជាមួយនឹងការធុំក្លិនផ្សែងដែលបញ្ចេញពីយានជំនិះគ្រប់ប្រភេទ។
អ្វីដែលធ្វើឲ្យពួកគាត់កាន់តែមួម៉ៅទៀតនោះគឺការមិនគោរច្បាប់របស់អ្នកបើកបរដូចគ្នា ដែលថាចូលចិត្ត «ជែងឬរុល»ទៅមុខទាំងបញ្ច្រាសទិសដៅចរាចរណ៍នៅពេលមានស្ថានភាពកកស្ទះម្តងៗ។
ការសិក្សាមួយរបស់នាយកដ្ឋានសុខភាពសាធារណៈនៃរដ្ឋញ៉ូយក សហរដ្ឋអាមេរិក បានវាយតម្លៃទៅលើផលប៉ះពាល់សុខភាពសាធារណៈពីបញ្ហាកកស្ទះចរាចរណ៍។ ការសិក្សានេះបានធ្វើឡើងកាលពីឆ្នាំ២០១០ និងបានរកឃើញថាការកកស្ទះចារាចរណ៍បណ្តាលឲ្យមានការបញ្ចេញឧស្ម័នច្រើនពីយានយន្តបំពុលបរិយាកាស ហើយឧស្ម័នទាំងនេះបានធ្វើឲ្យប៉ះពាល់ដល់សុខភាពអ្នកធ្វើដំណើរ។ ជំងឺដែលកើតចេញពីការបំពុលបរិយាកាសដោយសារផ្សែងយានយន្តនេះ ភាគច្រើនជាជំងឺគាំងបេះដូង និងជំងឺដាច់សរសៃឈាមខួរក្បាល។
ក្រៅពីជំងឺទាំងនេះ ការសិក្សាដដែលក៏រកឃើញថាការបញ្ចេញឧស្ម័នពីយានយន្តនេះក៏បង្កជាជំងឺហឺត និងជំងឺផ្លូវដង្ហើមផ្សេងទៀត។
ការសិក្សាមួយទៀតរបស់IBM Corperation ចេញផ្សាយកាលពីឆ្នាំ២០០៩ រកឃើញប្រហាក់ប្រហែលគ្នានេះដែរថាការកកស្ទះចរាចរណ៍ធ្វើឲ្យអ្នកធ្វើដំណើរមានអារម្មណ៍ធុញថប់ និងមួម៉ៅ ដែលអាចបង្កឲ្យមានហានិភ័យខ្ពស់ចំពោះការឡើងសម្ពាធឈាម។
ទាក់ទងនឹងការកកស្ទះចរាចរណ៍នេះ ទាំងរដ្ឋាភិបាល និងរដ្ឋបាលរាជថានីភ្នំពេញបានរិតបន្តឹងច្បាប់ចរាចរណ៍ និងអប់រំពលរដ្ឋឲ្យគោរពច្បាប់ច្បាប់ ដូចជាមិនជិះបញ្ច្រាស មិនបំពានភ្លើងសញ្ញា និងមិនបំពានសិទ្ធិអាទិភាពជាដើម។ ជាមួយគ្នានេះដែរការកសាងបន្ថែមនូវស្ពានអាកាស នៅតាមផ្លូវប្រសព្វសំខាន់ៗ ការសាសង់ស្ពានថ្មើជើង និងគម្រោងដាក់ឲ្យដំណើរការការដឹងជញ្ជូនតាមផ្លូវទឹកជាដើម ក៏ស្ថិតក្នុងយុទ្ធសាស្រ្តដោះស្រាយការកកស្ទះនេះដែរ។
អ្វីដែលកំពុងអនុវត្តសព្វថ្ងៃដើម្បីកាត់បន្ថយការកស្ទះដែរនោះគឺការដាក់ឲ្យដំណើររថយន្តក្រុងសាធារណៈ និងមានអ្នកជិះប្រចាំថ្ងៃប្រហែល២០ ០០០នាក់។
បើតាមរបាយការណ៍របស់សាលារាជធានីភ្នំពេញ គិតត្រឹមឆ្នាំ២០១៦ ទោចក្រយានយន្តដែលចុះបញ្ជីនៅក្នុងភូមិសាស្រ្តរាជធានីភ្នំពេញមានចំនួនជាង១លាន៦សែនគ្រឿង ចំណែករថយន្តវិញមានចំនួនជាង៤៤ម៉ឺនគ្រឿង៕
