រមណីយដ្ឋានបែបធម្មជាតិថ្មីចែសមួយទៀត រំលេចខ្លួននៅស្រុកកៀនស្វាយ លើផ្ទៃដី ១៤ ហិកតា

2019-04-19 04:00:50
សេដ្ឋកិច្ច

2019-04-19 04:00:50
ចំនួនមតិ 0 | ចំនួនចែករំលែក 0

ចន្លោះមិនឃើញ

រមណីយដ្ឋានបែបធម្មជាតិបៃតង តាមដងទន្លេមេគង្គក្រោម ដែលស្ថិតក្រោមការវិនិយោគពីក្រុមហ៊ុនអចលនទ្រព្យខ្នាតធំ ព្រីនស៍ រៀល អ៊ីស្ទេត គ្រុប លើផ្ទៃដីជាង ១៤ហិកតា ប្រកាសបើកដំណើរការជាផ្លូវការហើយ ក្នុងស្រុកកៀនស្វាយ ខេត្តកណ្ដាល។ លោក លី មីន អគ្គនាយកក្រុមហ៊ុនព្រីនស៍រៀលអ៊ីស្ទេត គ្រុប ថ្លែងនៅក្នុងពិធីបើកដំណើរការផ្លូវការនៃមជ្ឈមណ្ឌលកម្សាន្តបែបធម្មជាតិ ព្រីនស៍ ម៉ាណ័រ ដំណាក់កាលទី១ ថា មជ្ឍមណ្ឌលកម្សាន្តនេះ ជាប្រភេទគោលដៅទេសចរណ៍ បែប អេកូឡូស៊ី ដែលរួមមានទាំង សួនកម្សាន្តកុមារ រមណីយដ្ឋានទេសចរណ៍បែបកសិកម្មទំនើប សួនកម្សាន្ត ក្នុងព្រៃ និងមានបង្ហាញនូវផ្ទាំងសិល្បៈគំនូរលើជញ្ជាំងប្រវែង១គីឡូ ដែលជា គំនូរជញ្ជំង ដ៏វែង ជាងគេ នៅក្នុងតំបន់អាស៊ីផងដែរ។

លោកបន្តថា មជ្ឈមណ្ឌលកម្សាន្តថ្មីនេះ នឹងអាចចូលរួម ចំណែកឆ្លើយតបទៅនឹង តម្រូវការនៃភ្ញៀវទេសចរជាតិ និងអន្តរជាតិ អាចទៅកម្សាន្ត បាននាថ្ងៃឈប់សំរាក ជាពិសេសទេសចរចិន ដែរកំពុងមានការកើនឡើងខ្ពស់នៅកម្ពុជា។

ក្នុងដំណាក់កាលទី ១នេះ មជ្ឈមណ្ឌលកម្សាន្ត ព្រីនស៍ ម៉ាណ័រ បានបើកដំណើរការនូវឧទ្យានធំៗចំនួន៥ ដូចជា សួនកម្សាន្តកុមារ ឧទ្យានលំហែកម្សាន្ត ឧទ្យានកីឡា និងឧទ្យានវីរជន។ មជ្ឈមណ្ឌលកម្សាន្ត ព្រីនស៍ ម៉ាណ័រ នឹងផ្តល់ជូន អតិថិជនជាពិសេសនូវបទពិសោធន៍សេវាកម្មដ៏សម្បូរបែបមានដូចជា ចំណតឧទ្ធម្ភាគចក្រ បន្ទប់ហាត់វាយកូនហ្គោល VR ដ៏ទំនើប បន្ទប់ស្នាក់នៅជាផ្ទះឈើបែបខ្មែរដ៏ពិសេស កំពង់ផែជិះទូកកម្សាន្ត និងបរិក្ខារឧទ្យានកម្សាន្តនានាជាច្រើនផ្សេងទៀត។

លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរកម្ពុជា បានលើកឡើងថា ដើម្បីឆ្លើយតបទៅនឹងតម្រូវការនៃភ្ញៀវទេសចរជាតិ និងអន្តរជាតិ ពិសេស ភ្ញៀវទេសចរចិន ដែលនឹងមកទស្សនានៅកម្ពុជា អាចនឹងកើនរហូតដល់ ២លាននាក់បន្ថែមនោះ ក្រុងភ្នំពេញ និងខេត្តសក្ដានុពលកម្ពុជាផ្សេងទៀត បាននឹងកំពុងរៀបចំ និងអភិវឌ្ឍន៍រមណីដ្ឋាន បែប វប្បធម៌ និងធម្មជាតិ ដើម្បីបម្រើដល់វិស័យទេសចរណ៍ក្នុងស្រុក។

លោកស្រីបន្តថា យើងចង់ឃើញភ្ញៀវទេសចរបរទេស ដែលមកកម្សាន្តនៅកម្ពុជា មិនត្រឹម តែទស្សនាត្រឹមតែប្រាង្គប្រាសាទប៉ុណ្ណោះទេ តែយើងគួររៀបចំយ៉ាងណា ឲ្យមានកន្លែង កម្សាន្តថ្មីៗឲ្យបានច្រើន ដើម្បីអាចទាញចំណូលឲ្យបានច្រើនពីវិស័យទេសចរណ៍ ។

គួរបញ្ជាក់ថា មជ្ឈមណ្ឌលកម្សាន្ត ព្រីនស៍ ម៉ាណ័រ មានទីតាំងជាប់ បណ្ដោយ មាត់ទន្លេ មេគង្គ ក្រោម ស្ថិតក្នុង ឃុំដីឥដ្ឋ ស្រុកកៀនស្វាយ ដោយគម្រោងនេះសាងសង់ ឡើងនៅលើផ្ទៃដី ជាង ១៣ហិចតា៕