មានគេរអ៊ូថា អ្នកជិះឡានថ្លៃខ្លះ គំនិតយ៉ាប់?

2019-07-05 09:36:15
ចរាចរណ៍

2019-07-05 09:36:15
ចំនួនមតិ 0 | ចំនួនចែករំលែក 0

ចន្លោះមិនឃើញ

“គឺនៅ Stop ជលផល កន្លែងហ្នឹងរាល់ម៉ោង ៨ ព្រឹក គឺ មមាញឹកកកស្ទះតែម្តងបង។ ធម្មតាមិនមែនយើងចង់ជិះហួសគំនូសទេ តែពេលចង្អៀតពេកយើងជិះមិនបានត្រូវទាំងស្រុងក៏ហួសបន្តិចបន្តួច ខ្ញុំដឹកម៉ាក់ និង ក្មួយខ្ញុំ ស្រាប់តែឡានមួយនោះម៉ាក Rang បត់មករ៉េវ គេឈប់ង៉ក់មុខម៉ូតូខ្ញុំហើយម្នាក់បើកឡានហ្នឹងក្មេងណាស់ ក្មេងជាងខ្ញុំទៀត ខ្ញុំថាខ្ទង់ ២២ រឺក៏ ២៣ ឆ្នាំ អីយ៉ាងច្រើន គេមិនមែនឈប់ធម្មតាទេ គឺលើកដៃចង្អុលមុខខ្ញុំព្រមានហ្មង មាត់អង្គ្រឺតធ្មេញដាក់ខ្ញុំ គឺរបៀបមើលងាយតែម្ដង ហើយខ្ញុំអត់បានធ្វើអីខុសសោះ គ្រាន់តែខ្ញុំបង្អាក់ដំណើរលឿនរបស់គេ ព្រោះបើយើងជិះឡានថ្លៃប្រហែលគេមិនហ៊ានមើលងាយយើងអញ្ចឹង ផ្លូវវាចង្អៀត ខ្លួនគេមិនឈប់ Stop ប៉ូលិសមិនហ៊ានហៅ បែរជាគេហ៊ានចង្អុលព្រមានខ្ញុំទៀត ខ្ញុំវាហួសចិត្តដែរ អ្នកជិះឡានថ្លៃអ្ហើយ! ផ្លូវលោកឯងបង់ពន្ធម្នាក់ឯងក៏អី?”។ នេះជាការលើកឡើងរបស់យុវជន ទូច កាណាល់ ដែលបានជួបជជែកជាមួយ Sabay។

Cambodia-Car

ដូចគ្នានេះដែរយុវនារីទេព កល្យាណបម្រើការនៅស្ថានីយលក់រថយន្តមួយដែលមានផ្ដល់សេវាលាង និង ជួសជុលផងនិយាយបន្ថែមថា ជាទូទៅអ្នកមានចរិតសុភាពរាបសារមានតិចណាស់ក្នុងចំណោមអ្នកជិះរថយន្តម៉ាកថ្លៃដែលចូលមករកសេវាកម្មលាងសំអាតរឺជួសជុលផ្សេងៗ។

“មិនមែននិយាយបន្ទរទេបង តែឈឺក្បាលមែនពេលខ្លះ ! កម្មករត្រូវគេស្តីអោយរឺមួយធ្វើទៅមិនត្រូវចិត្តយើងត្រូវចុះទៅដោះស្រាយ និយាយទៅបើឡានគេក្បាល៥ម៉ឺនដុល្លារឡើងហើយ គឺខ្ញុំត្រូវប្រយ័ត្នណាស់ពិសេសការនិយាយស្ដី ទោះខាងយើងកម្មករគ្នាត្រូវក៏ដោយ! និយាយទៅមិនមែនម៉ៅរួមទេ មានគេល្អដែរតែតិចណាស់ អ្នកប្រកាន់ច្រើនជាង អីតិចគេតេទៅថៅកែឡូឡាតែម្តងបង យើងត្រឹមបុគ្គលិកអីគេមិនបានចំណាយពេលនិយាយជាមួយរកខុសត្រូវទេ អាហ្នឹងខ្ញុំឈឺក្បាលណាស់អ្នកជិះឡានថ្លៃ ”។

កញ្ញា កល្យាណ បន្តថា ម្ចាស់រថយន្តទំនើបមានតម្លៃទំាងនោះមានយុវវ័យប្រហែល៦០ភាគរយ។ នាងសង្កត់ធ្ងន់ថា”មើលទៅពួកគេមិនមែនជាអ្នកធ្វើការតែក៏មិនមែនជាសិស្សសាលាដែរ ដូចជាអ្នកដើរលេងតែម្តងហើយមានស្រីមានប្រុសបើកឡានជាក្រុមៗ ម្នាក់មានឡានពីរក៏មាន បើបើក ៥៧០ មក គឺមកជាក្រុម៥៧០បួន រឺប្រាំឡាន ស្លៀកពាក់ Sexyហ៊ឺហានិយាយស្ដីឡូឡាក្អាកក្អាយ តែកុំអោយទាស់ចិត្ត បើទាស់ចិត្តគឺពិបាកដោះស្រាយតែម្ដង”។

ប៉ុន្តែ លោក នឿន ណាន ប៉ូលិសចរាចរណ៍ប្រចាំការនៅគោលដៅមួយក្នុងរាជធានីភ្នំពេញ (សុំមិនអោយបញ្ចេញទីតាំង) លើកឡើងបញ្ច្រាសវិញថា ការមិនគោរពច្បាប់ បានកើតឡើងក្នុងចំណោមអ្នកជិះយានយន្តទាំងថ្លៃ ទំាំងថោក។

“យើងពិបាកនិយាយដែរអូន អារឿងហ្នឹង! មិនគោរពច្បាប់ហ្នឹងមានទាំងម៉ូតូទាំងឡាន! ខ្លះអ្នកជិះឡានថ្លៃហ្នឹងជាស្ទាវឈាមរាវក៏អញ្ចឹងទៅ ខ្លះម៉ូតូឌុបហ្នឹង ក៏ព្រហើនជិះដេញឡានគេកិតៗ មិនគិតថា បើប៉ះពារគ្នាទៅឡានគេថ្លៃ គេទារអោយធ្វើសង យើងមានលទ្ធភាពទេ! សំខាន់ប៉ូលិសចង់អោយតែគោរពច្បាប់ទាំងអស់គ្នាទេ”។

បងប្រុស សុខ សេត អ្នករត់ម៉ូតូឌុបនៅផ្សារបឹងកេងកងលើកឡើងថា ការជិះក្បែររថយន្តទំនើបៗជារឿងត្រូវប្រុងប្រយ័ត្នអោយមែនទែនក្នុងនាមជាអ្នករកស៊ីលើដងផ្លូវ។ បងប្រុសលើកឡើងថា៖ ”ព្រោះយើងនៅលើផ្លូវហ្នឹងវាជាង ១០ ម៉ោង ក្នុងមួយថ្ងៃ! គេថាដើរយប់ច្រើនលែងអីជួបខ្មោច ចឹងត្រូវចេះប្រយ័ត្ន ពិសេសអាឡានថ្លៃៗ ៥៧០ ឡង់រ៉ូវែរ អីបើថា ជៀសបានជៀសឆ្ងាយទៅ ប៉ះម៉ាខ្វោករាប់រយដុល្លារ គេទារអោយសងយើងមានអី? ចឹងខ្ញុំប្រយ្នត័ណាស់ ! ចំណែកថា ចរិតយ៉ាប់មិនយ៉ាប់ខ្ញុំមិនហ៊ានថាដែរ មានគេល្អមានគេអាក្រក់ចឹងទៅ តែក្មេងយុវជនឈាមរាវបានថា យ៉ាប់មែនអាហ្នឹងឃើញហ្នឹងភ្នែកញយមែនខ្ញុំ គឺគេជិះលឿនៗណាស់ផ្លូវមួយតែឯងហើយ!”។

ចុះអ្នកវិញ មានបទពិសោធន៍អ្វីទាក់ទងជាមួយអ្នកជិះរថយន្តថ្លៃៗនៅស្រុកយើងដែរ?

ចុចអានអត្ថបទ៖ ផ្លូវចម្ការដូងធ្លាប់ហុយដូចពពកឥឡូវម៉េចហើយ?

ចុចអានអត្ថបទ៖ ពេលណាទើបជាទីបញ្ចប់នៃការពុះផ្លូវរៀបលូនៅភ្នំពេញ?

អត្ថបទពាក់ព័ន្ធនឹងចរាចរណ៍ច្រើនទៀត ចុចត្រង់នេះ