រកឃើញម្ចាស់ពាន ក្នុងការប្រកួតវីដេអូខ្លីរបស់ក្រុមហ៊ុន Davitra

2019-09-11 11:34:05
ព័ត៌មាន

2019-09-11 11:34:05
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅថ្ងៃទី ១១ ខែកញ្ញា ឆ្នាំ២០១៩ នេះ ក្រុមហ៊ុន Davitra (Cambodia) Co., Ltd និងក្រុមហ៊ុន Apitor Technology Co., Ltd បានរៀបចំកម្មវិធីប្រគល់រង្វាន់ជ័យលាភីប្រកួតផលិតវីដេអូខ្លីស្ដីពី « កុមារ និងយុវជនកម្ពុជាគួរតែងាកមកលេងរបស់ ដែលបង្កើនចំណេះដឹងផ្នែកវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា» ដែលហៅកាត់ជាភាសាអង់គ្លេសថា STEM។

ការប្រកួតប្រជែងនេះ ធ្វើឡើងក្នុងគោលបំណងលើកកម្ពស់កម្រិតចំណេះដឹង ក៏ដូចជាឆ្លើយតបទៅនឹងភាពចាំបាច់ តម្រូវការ និងតួនាទីយ៉ាងសំខាន់នៃវិស័យបច្ចេកវិទ្យា ដោយមានបេក្ខជនចំនួន ១៤ ក្រុម ចូលរួមប្រកួត។

បន្ទាប់ពីគណៈកម្មាធិការដាក់ពិន្ទុយ៉ាងសុក្រឹត ទៅលើវីដេអូទាំង ១៤ ចំណាត់ថ្នាក់លេខ ១ បានទៅលើក្រុម Sok Sambath ដោយទទួលបានពិន្ទុ ៦៧.៦៦ ចំណាត់ថ្នាក់លេខ ២ បានទៅលើ Media Communication ពិន្ទុ ៥៦.០០ និងលេខ ៣ បានទៅលើក្រុមស្រែអំបិល ពិន្ទុ ៥១.៥៥។

ថ្លែងក្នុងកម្មវិធីប្រគល់រង្វាន់ លោក អ៊ឹម ច័ន្ទបូរ៉ាជាតិ សហស្ថាបនិក Davitra (Cambodia) Co., Ltd បានឲ្យដឹងថា ការប្រកួតវីដេអូខ្នាតខ្លីនេះ ជាការឆ្លុះបញ្ចាំងឲ្យឃើញពីអត្រានៃការចូលរួម និងគាំទ្រ មុខវិជ្ជាវិទ្យា បច្ចេកវិទ្យា វិស្វកម្ម និងគណិតវិទ្យា ជាពិសេសនោះ គឺយុវនារីតែម្ដង។

លោកថា ៖ « ខ្ញុំពីតជារីករាយ និងកោតសរសើរដល់បេក្ខជនចូលរួមទាំង ១៤ ក្រុម សរុបជាសមាជិកមាន ៤២ នាក់ ចំពោះការចូលរួមជ្រោមជ្រែងចំណាយពេល ក្នុងការលើកស្ទុយវិស័យ STEM នៅក្នុងប្រទេសកម្ពុជា»៕