• 2020-02-17 08:27:43
  • ចរាចរណ៍

​រដ្ឋបាល​រាជ​ធានី​ភ្នំពេញ​​បង្ហាញ​ប្លង់​គម្រោង​កែ​លំអ​ប្រព័ន្ធ​ចរាចរ​នៅ​ស្តុប​ក្តាន់ ​២​​

  • 2020-02-17 08:27:43
  • ចំនួនមតិ 0 | ចំនួនចែករំលែក 0

ចន្លោះមិនឃើញ

រដ្ឋបាល​រាជ​ធានី​ភ្នំពេញ​តាម​រយៈ​មន្ទីរ​សាធារណ​ការ​ និង​ដឹក​ជញ្ជូន​​បាន​បង្ហាញ​ប្លង់​រង្វង់​មូល​​ក្ដាន់​ពីរ ដែល​​នឹង​ចាប់​ដំណើរ​ការ​សាង​សង់​នៅ​​ដើម​​ឆ្នាំ​​២០២០​នេះ។

ការ​បង្កើត​ឲ្យ​មាន​រង្វង់​មូល​មួយ​កន្លែង​ នៅ​តំបន់​ក្តាន់​២ ​នេះ​រដ្ឋបាល​រាជធានី​ភ្នំពេញ​ក៏​នឹង​ការពង្រីក​ទទឹង​ផ្លូវ ប្រវែង​៣​ម៉ែត្រ​កន្លះ​លើ​ផ្លូវ​សហព័ន្ធ​រុស្ស៊ី​បន្ថែម​ទៀត ចាប់​ពីមុខ​ទីស្តីការ​គណៈរដ្ឋមន្ត្រី រហូតដល់​ស្ពាន​អាកាស​តិច​ណូ​ផងដែរ ដើម្បី​រំដោះ​ចរាចរណ៍ នៅ​តំបន់​នេះ​ឲ្យ​កាន់តែ​ប្រសើរ​ឡើង ខណៈ​ដែល​តំបន់​នេះ ក្រោយពី​បង្កើត​ឲ្យមាន​ផ្លូវ​ឆ្លងកាត់​ចេញពី​តំបន់​បឹង​កក់​ បង្កឲ្យ​មាន​ការ​កកស្ទះ​ចរាចរណ៍​រាល់​ថ្ងៃ​នោះ។

ការ​សម្រេច​បែបនេះ ​បាន​បង្ហាញ​ឲ្យ​ឃើញ​ក្នុង​កិច្ចប្រជុំ​មួយ​ ក្រោម​វត្តមាន​លោក ​ឃួ​ង ស្រេង អភិបាល​រាជធានី​ភ្នំពេញ អាជ្ញាធរ​ដែនដី និង​មន្ត្រី​ជំនាញ កាលពី​រសៀល​ថ្ងៃ​ទី​១៩ ខែធ្នូ ២០១៩​ កន្លង​មក​​។

លោក ឃួ​ង ស្រេង បាន​ឲ្យ​ដឹងថា គម្រោង​កែសម្រួល​លំហូរ ចរាចរណ៍​នៅ​តំបន់​ក្តាន់​២​នេះ នឹង​ត្រូវ​ចាប់​ផ្តើម​អនុវត្តន៍​នៅ​ដើមឆ្នាំ​២០២០​នេះ ខណៈ​ដែល​តំបន់​នេះ​ កំពុង​ប្រឈម​ការ​កកស្ទះ​ចរាចរណ៍​ជា​រៀងរាល់ថ្ងៃ ដែល​រំខាន​ដល់​ការ​ធ្វើដំណើរ​របស់​ប្រជាពលរដ្ឋ។

តាមរយៈ​ការសិក្សា​ជា​លក្ខណៈ​វិទ្យាសាស្ត្រ​របស់​ក្រុម​និស្សិត​នៃ​វិទ្យាស្ថាន​បច្ចេកទេស កម្ពុជា​បាន​បង្ហាញ​ថា ក្នុង​មួយ​ថ្ងៃៗ​មាន​យានយន្ត​ប្រមាណ​ជាង​៥​ម៉ឺន​៣​ពាន់​គ្រឿង​បាន​ឆ្លងកាត់​នៅលើ​ផ្លូវ​សហព័ន្ធ​រុស្ស៊ី​ត្រង់ចំណុច​ប្រសព្វ​ក្តាន់​២ ខណៈ​យានយន្ត​ជាង​៥​ម៉ឺន​គ្រឿង​ទៀត ​បាន​ចេញ​ដំណើរ​ពី​ផ្លូវ​បឹង​កក់ ឆ្លងកាត់​ផ្លូវ​សហព័ន្ធ​រុស្ស៊ី ដែល​ធ្វើ​ឲ្យ​ចំណុច​នេះ ប្រឈម​ការ​កកស្ទះ​ជាប្រចាំ​ស្ទើរ​ពេញ​មួយថ្ងៃ។

លោក​អភិបាល​បាន​បញ្ជាក់​ថា ជា​មធ្យោបាយ​ចំពោះ​មុខ​រដ្ឋបាល​រាជធានី​ភ្នំពេញ​ បានសម្រេច​កែ លម្អ​ចរាចរណ៍​នៅ​តំបន់​នេះ ដោយ​ត្រូវ​បង្កើតជា​រង្វង់​មូល​ត្រង់ចំណុច​កា្ត​ន់​២ ដែល​ត្រូវ​ចំណាយ តិច​ហើយ​ស្ថាបនា​លឿន​រហ័ស ដោយ​ពុំ​បាច់​រង់ចាំ​ការធ្វើ​ផ្លូវ​ក្រោម​ដី​បានឡើយ។

លោក​អភិបាល​រាជធានី​ភ្នំពេញ ក៏បាន​ពន្យល់​អំពី​មូលហេតុ​មួយ​ចំនួន​ដែល​ធ្វើ​ឲ្យ​ចរាចរណ៍​នៅ​ត្រង់​ចំណុច​ប្រសព្វ​ក្តាន់​២​នេះ​មានការ​កកស្ទះ​ជាប្រចាំ​ផងដែរ ដោយ​លោក​បញ្ជាក់​ថា​ការធ្វើ​ចរាចរណ៍​ចេញពី​តំបន់​បឹងកក់ មក​សហព័ន្ធ​រុ​ស្ស៊ី​ច្រើន​ដោយសារ ការបិទផ្លូវ​រណប ម្ខាង​នៅមុខ​ទីស្តីការក្រសួង​ការពារជាតិ និង​ប្រព័ន្ធ​ភ្លើងស្តុប​មិនទាន់​ល្អប្រសើរ​ធ្វើ​ឲ្យ​លំហូរ ចរាចរណ៍​ណែនណាន់តាន់តាប់ ស្ទះ​ខ្លាំង រហូត​ហៀ​ទៅដល់​មុខ​គណៈរដ្ឋមន្ត្រី ដូច្នេះ​ត្រូវតែ​ដោះស្រាយ បញ្ហា​នេះ​ជាបន្ទាន់។

ប្រធាន​មន្ទីរ​សាធារណការ និង​ដឹកជញ្ជូន​រាជធានី​ភ្នំពេញ លោក​សាំ ពិសិដ្ឋ បាន​ឲ្យ​ដឹង​ថា គម្រោង​កែ​លម្អ ប្រព័ន្ធ ចរាចរណ៍​ឡើងវិញ​នៅ​ត្រង់​ចំណុច​ប្រសព្វ​ក្តាន់​២​នេះ អាច​ធ្វើ​ឲ្យ​ប្រសើរ​ឡើង​អំពី​លំហូរ​ចរាចរណ៍ នៅ​តំបន់​នេះ​រហូតដល់​ជាង​៤០​ភាគរយ៕

រូបភាព៖ រដ្ឋបាលសាលារាជធានីភ្នំពេញ

មតិយោបល់
អត្ថបទពេញនិយម
អត្ថបទថ្មី