សម្ដេចតេជោ ក្ដៅចុងច្រមុះ ពេលនឹកឃើញដល់ផែនការបង្កើតរោងចក្រវ៉ាក់សាំងនៅកម្ពុជា

2022-05-17 03:32:10
ព័ត៌មាន

2022-05-17 03:32:10
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្លែងចំពោះមុខក្រុមគ្រូពេទ្យជួរមុខប្រយុទ្ធប្រឆាំងនឹងជំងឺកូវីដ១៩ នៅព្រឹកថ្ងៃទី ១៧ ឧសភានេះ សម្ដេចបានតេជោ ហ៊ុន សែន លើកឡើងខ្លាំងៗ ពីផែនការបង្កើតរោងចក្រវ៉ាក់សាំងនៅកម្ពុជា ដោយជំរុញឲ្យក្រុមហ៊ុនទទួលសិទ្ធិអភិវឌ្ឍត្រូវតែដុតដៃដុតជើងធ្វើឲ្យទាល់តែបាន។

សម្ដេចតេជោ ហ៊ុន សែន បានប្រកាសផែនការបង្កើតរោងចក្រផលិតវ៉ាក់សាំងខ្លួនឯងនៅកម្ពុជា ត្រូវបានកាលថ្ងៃទី ៧ កុម្ភៈ ក្នុងពេលដែលសម្ដេចបានអញ្ជើញចូលរួមសម្ពោធដាក់ឱ្យប្រើប្រាស់កំណាត់ផ្លូវជាតិលេខ៧ ប្រវែងជិត១០០គីឡូម៉ែត្រ ក្នុងខេត្តក្រចេះ។ គ្រានោះ សម្ដេចបានជំរុញឲ្យភាគីពាក់ព័ន្ធទាំងកម្ពុជា និងចិន ពន្លឿនការបង្កើតរោងចក្រផលិតវ៉ាក់សាំងបង្ការជំងឺកូវីដ១៩ នៅកម្ពុជាឲ្យបានឆាប់។

ផែនការនេះ ក្រោយពីសម្ដេចបានមើលឃើញពីភាពចាំបាច់នៃការប្រើប្រាស់វ៉ាក់សាំងដើម្បីបង្កើតប្រព័ន្ធភាពសុំាសហគមន៍ទប់ទល់ជំងឺកូវីដ១៩តាំងពីពេលនោះ មកដល់បច្ចុប្បន្ន និងអាចឈានដល់អនាគតថែមទៀត ស្របពេលដែលបច្ចុប្បន្ន កម្ពុជាបានចំណាយធនធានផ្ទាល់ខ្លួនទិញវ៉ាក់សាំងពីបរទេសចំនួនជា ២៨លានដូសរួចមកហើយ។

មួយផ្នែកទៀត ដែលបម្រើឲ្យនយោបាយស្រោចវ៉ាក់សាំងក្នុងសហគមន៍របស់កម្ពុជា ពឹងផ្អែកលើជំនួយពីអន្តរជាតិមានចិន អាមេរិក និងអឺរ៉ុបដែលមានចំនួនប្រមាណជិត ៥០% សម្រាប់វ៉ាក់សាំងដែលកម្ពុជាមានក្នុងដៃ និងបានប្រើប្រាស់រួច។ ស្ថានភាពបែបនេះ សម្ដេច បញ្ជាក់ថា កម្ពុជាចាំបាច់ត្រូវមានរោងចក្រវ៉ាក់សាំងខ្លួនឯង។

ក្រោយពីការប្រកាសពីផែនការខាងលើ មានក្រុមហ៊ុនឯកជនមួយបានទទួលអាជ្ញាប័ណ្ណក្នុងការអភិវឌ្ឍន៍។ ប៉ុន្តែបច្ចុប្បន្ន សម្ដេចមិនទាន់ឃើញមានវឌ្ឍនភាពពីផែនការនោះនៅឡើយ។ ដូច្នេះហើយ សម្ដេចស្នើឲ្យក្រសួងសើរើ និងពិនិត្យមើលសកម្មភាពក្រុមហ៊ុនឯកជនមួយនោះ។ សម្ដេចថា បានទទួលដំណឹងពីករណីនេះពីភាគីចិនមក ថាពួកគេ(ចិន)រង់ចាំការឆ្លើយតបពីភាគីកម្ពុជាវិញ។

“ឥឡូវមើលវិស័យឯកជនរបស់កម្ពុជាដែលបានទទួលសិទ្ធិនៀក ថាធ្វើឬមិនធ្វើ បើមិនធ្វើ ត្រូវប្រគល់ឲ្យអ្នកផ្សេងធ្វើ អត់មានត្រូវឲ្យក្រុមហ៊ុនឯកជនមួយមកវ៉ាងទីទេ ខ្ញុំត្រូវការមានរោងចក្រមួយផលិតវ៉ាក់សាំងមួយ អត់មានលេងសើចទេ ត្រូវធ្វើឲ្យបាន បើមិនធ្វើដកយក Licence មកវិញ!”។ សម្ដេចថ្លែង។

សម្ដេចបានសង្កត់ធ្ងន់ ដោយស្នើឲ្យក្រសួងសុខាភិបាល ឲ្យពិនិត្យមើលករណីនេះ ករណីចាំបាច់ត្រូវដកយកអាជ្ញាប័ណ្ណរបស់ក្រុមហ៊ុនមួយនោះ ហើយស្វែងរកអ្នកថ្មីដែលអាចធ្វើបាន។ ជាមួយគ្នា សម្ដេចតេជោ បានលើកឡើងដែរពីលទ្ធភាព រដ្ឋកាន់គម្រោងនេះខ្លួនឯងតាមរយៈក្រសួងសុខាភិបាល ដោយសម្ដេចសង្កត់ធ្ងន់ថា ត្រូវធ្វើឲ្យមានវត្តមានរោងចក្រផលិតវ៉ាក់សាំងនៅកម្ពុជា ព្រោះកម្ពុជាមានលទ្ធភាពអាចធ្វើបាន។

សម្ដេចតេជោ ហ៊ុន សែន លើកឡើងថា សម្តេចត្រូវការមានអ្វី(សមត្ថភាពផលិតវ៉ាក់សាំងផ្ទាល់ខ្លួន)ជារបស់ខ្លួនឯង ព្រោះគេមិនដឹងថា និន្នាការប្រើប្រាស់វ៉ាក់សាំងប្រឆាំងកូវីដ១៩នឹងបញ្ចប់នៅពេលណានោះទេ។ មួយវិញទៀត កម្ពុជាអាចនឹងប្រើប្រាស់រោងចក្រនោះ ផលិតវ៉ាក់សាំងប្រឆាំងមេរោគផ្សេងៗទៀតដោយខ្លួនឯងទៀតនាពេលអនាគត៕

អត្ថបទ៖ ទារិកា