- 2015-04-13 18:20:28
- សេដ្ឋកិច្ច
តម្លៃសណ្ឋាគារ ផ្ទះសំណាក់ នៅអង្គរសង្ក្រាន្ត
- 2015-04-13 18:20:28
- ចំនួនមតិ 0 | ចំនួនចែករំលែក 0
តម្លៃសណ្ឋាគារ ផ្ទះសំណាក់ នៅអង្គរសង្ក្រាន្ត
ចន្លោះមិនឃើញ
រាប់ចាប់ពីសណ្ឋាគារលំដាប់ផ្កាយប្រាំ ពិសេសផ្ទះសំណាក់ធុនល្មមៗទូទាំងក្រុងសៀមរាប គឺពេញស្ទើរ តែរកបន្ទប់សេសសល់ពុំមាន នៅក្នុងឱកាសព្រឹត្តិការណ៍អង្គរសង្ក្រាន្ត ដែលចាប់ផ្ដើមពីថ្ងៃស្អែកនេះទៅ។
អ្នកផ្ដល់ព័ត៌មានអតិថិជនសណ្ឋាគារសុខា ថាចំណោម២៧៥បន្ទប់នៃសណ្ឋាគារនេះ គឺសេសសល់តិចណាស់។ បន្ទប់ប្រភេទ Deluxe បែរទៅរកផ្លូវមានតម្លៃ ៨៥ដុល្លារក្នុង១យប់ ហើយបន្ទប់បែរទៅ រកអាងទឹកវិញគឺ ៩៥ដុល្លារ។ ទោះជាឱកាសអង្គរសង្ក្រាន្ត ដែលភ្ញៀវជាតិនិងអន្តរជាតិបុកមកពីគ្រប់ទិសទី តែស្ត្រីអ្នកផ្ដល់ព័ត៌មានថាតម្លៃនេះគឺពុំបានឡើងខុសសព្វដងទេ។ ផ្ទុយទៅវិញតម្លៃនេះថោក ព្រោះថាសណ្ឋាគារមាន ប្រូម៉ូសិន ពេញ១ខែមេសា ហើយហួសខែមេសាតម្លៃនឹងឡើងលើសនេះតិចតួច។
ចុះទៅសណ្ឋាគារលំដាប់ផ្កាយ៤វិញ Angkor Villa Hotel ដែលមានទីតាំងធ្វើប្រមាណ១៥នាទីដើម្បីទៅដល់អង្គរនោះ បន្ទប់មានតម្លៃចាប់ពី៧៩ដុល្លារ ដល់ ១៣៥ដុល្លារក្នុងមួយយប់។
ផ្ទះសំណាក់វិញ មួយចំនួនបានបង្កើនតម្លៃខ្លាំង ខ្លះតិចតួច ហើយផ្ទះសំណាក់ខ្លះទៀតពុំបានឡើងថ្លៃឡើយ។
ឆពណ្ណ៍ ម្ចាស់ផ្ទះសំណាក់ Happy ដែលមាន៣០បន្ទប់ ថាបន្ទប់ម៉ាស៊ីនត្រជាក់នៅទីនេះថ្លៃ ១២ដុល្លារក្នុងមួយយប់ តែបន្ទប់កង្ហារ៩ដុល្លារ។ ស្ត្រីរូបនេះថា ៣០បន្ទប់ដែលមាន គឺពេញគ្មានសល់ ដែលភាគច្រើនជាក្រុមភ្ញៀវបរទេស ស្ទើរតែទាំងអស់។ ឆពណ្ណ៍ ថានេះជាតម្លៃទូទៅ គឺមិនបានឡើងនោះទេ ហើយផ្ទះសំណាក់នេះតែងរក្សារក្សាតម្លៃធម្មតាគ្រប់ពេលទាំងអស់។ «ឱកាសអីចឹងៗ គេមកលេងម្ដង បើយើងឡើងថ្លៃវាលំបាកដែរ យើងរកស៊ីយកម៉ូយ»។ ម្ចាស់ផ្ទះសំណាក់វ័យ២៥ឆ្នាំពន្យល់។
រីអ្នកគ្រប់គ្រងផ្ទះសំណាក់ ព្រហ្មរ័តន៍ វិញក៏បានប្រាប់ថាបន្ទប់ផ្ទះសំណាក់១៩បន្ទប់ ត្រូវគេកក់អស់តាំងពីប្រមាណកន្លះខែមុនចូលឆ្នាំ សម្រាប់ប៉ុន្មានថ្ងៃនៃព្រឹត្តិការណ៍វប្បធម៌និងកម្សាន្តដ៏ធំនេះ។ អតិថិជនភាគច្រើនជាប្រជាជនខ្មែរ។ បន្ទប់នីមួយៗមានតម្លៃពី ១៧ទៅ២៥ដុល្លារក្នុងមួយយប់ គឺអាស្រ័យលើទំហំបន្ទប់តូចឬធំ។ លោក មាង អ្នកគ្រប់គ្រងថាតម្លៃនេះគឺថ្លៃជាងថ្ងៃធម្មតាតិចតួច។
ប៉ុន្តែប្រជាពលរដ្ឋខ្លះអះអាងថាផ្ទះសំណាក់មួយចំនួនបានឆ្លៀតឱកាសកាប់តម្លៃខ្ពស់ហួសហេតុ ក្នុងឱកាសដែលមនុស្សម្នាសម្រុកទៅលេងសៀមរាប។ ផ្ទះសំណាក់ខ្លះថ្លៃរហូតដល់ ៤០ទៅ៥០ដុល្លារក្នុងមួយយប់ក៏មានដែរ ហើយភ្ញៀវមួយចំនួនត្រូេះតែបង្ខំចិត្តស្នាក់នៅ ដោយសារពិបាករក៕
អត្ថបទ៖ ប៉ែន សុផាន់ណា
