ព្រឹកមិញ អាណាព្យាបាលខ្លះអរស្ទើរសន្លប់ ជំនួសបេក្ខជន ពេលដឹងលទ្ធផល...

2015-09-13 21:13:01
ព័ត៌មាន

2015-09-13 21:13:01
ចំនួនមតិ 0 | ចំនួនចែករំលែក 0

ចន្លោះមិនឃើញ

អាណាព្យាបាលមួយចំនួន មិនថា ឪពុក ម្ដាយ អុំ មីង ឬ បងប្អូន នោះទេ គឺបានចូលរួមសម្ដែងការត្រេកអរ ពេលដឹងថា កូន ឬ ក្មួយ បានប្រលងជាប់បាក់ឌុប ឆ្នាំ ២០១៥នេះ នៅគ្រាដែលលទ្ធផលប្រលងបាក់ឌុបបើកគម្របផ្លូវការតាមបណ្ដាខេត្តនាថ្ងៃនេះ។

ថ្ងៃនេះ Sabay បានជួបបងស្រី ណៃ ម្លីះ បង្ហើបប្រាប់ថា “យប់មិញបងស្រីសំរានមិនលក់ទេទាំងមីង ទាំងក្មួយ គឺមីងបារម្ភជាងក្មួយទៀត មួយយប់ហើយបន់ឱ្យតែភ្លឺ រួចនាំក្មួយទៅមើលលទ្ធផល” តែលុះព្រឹកឡើងក្មួយបើក Internet មើលក្រសួងបង្ហោះលទ្ធផល បានឃើញឈ្មោះខ្លួន សប្បាយចិត្តចង់ហោះ ខ្ញុំអរអើយអរ! នៅតែមិនអស់ចិត្ត ក៏នាំគ្នាមកមើលលទ្ធផលនៅមណ្ឌលទៀតព្រឹកមិញ"។

បេក្ខជនទៅមើលលទ្ធផលបាក់ឌុបព្រឹកមិញ

ចំណែក សាន មួយលី ជាក្មួយស្រីវិញ និង ជាបេក្ខជនមកពីស្រុកព្រៃឈរបាននិយាយទាំងទឹកមុខញញឹមពោពេញដោយរំភើបថា “ខ្ញុំសប្បាយចិត្តណាស់បង ទោះបីខ្ញុំជាប់និទ្ទេស E ក៏ដោយ ព្រោះការប្រឡងនេះតឹងណាស់ សូម្បីតែងាក ក៏មិនបានដែរ “។

“ខ្ញុំសប្បាយចិត្តពេកចង់យំ តែយំមិនចេញ បងដឹងអត់ មុនពេលចេញលទ្ធផលខ្ញុំដេកយល់សប្តិថា ខ្ញុំប្រឡងធ្លាក់រួចខ្ញុំយំអស់មួយថ្ងៃ” ។ មួយលី បន្ថែម ។

ចំណែកប្អូនស្រី លីម វណ្ណី ប្អូនជាបេក្ខជនម្នាក់នៅមណ្ឌលគរុកោសល្យភូមិភាគកំពង់ចាម ក៏ប្រឡងជាប់ដែរ ហើយបានប្រាប់ Sabay ថា “យប់មិញដេកមិនលក់ រួចព្រឹកឡើងនាំម៉ាក់មកមើលតាំងពីម៉ោង 5 កន្លះ ប្អូនសប្បាយចិត្តចង់ហោះពេលឃើញលទ្ធផល ពេលនេះបាយក៏លេងឃ្លានដែរ” ។

តែទោះជាយ៉ាងណាក៏ដោយ នៅក្នុងបណ្ឌលនីមួយៗនៅតែមានអ្នកធ្លាក់ ហើយពួកគេមានទឹកមុខមិនសប្បាយចិត្ត និង អ្នកខ្លះទៀតយំអោបមិត្តភត្តិ ។