- 2017-10-16 02:53:32
- សេដ្ឋកិច្ច
កសិដ្ឋានបន្លែធម្មជាតិមួយជ្រើសដាំប្រភេទដំណាំ «ដាំស្រួលដកស្រួល»
- 2017-10-16 02:53:32
- ចំនួនមតិ 0 | ចំនួនចែករំលែក 0
កសិដ្ឋានបន្លែធម្មជាតិមួយជ្រើសដាំប្រភេទដំណាំ «ដាំស្រួលដកស្រួល»
ចន្លោះមិនឃើញ
កសិដ្ឋានបន្លែធម្មជាតិមួយនៅខេត្តាតាកែវបានដាំប្រភេទដំណាំមួយប្រភេទដែលកសិដ្ឋាននេះហៅថាជាប្រភេទដំណាំ «ដាំស្រួល ដកស្រួល»និងថាកសិដ្ឋានមានផែនការពង្រីកប្រភេទដំណាំនេះឲ្យបានច្រើនហិកតាបន្ថែមទៀតក្នុងគោលបំណងបង្កើនឲ្យបានទិន្នផលមួយតោនក្នុងមួយថ្ងៃ។
អ្នកគ្រប់គ្រងកសិដ្ឋានបន្លែធម្មជាតិត្រពាំងក្រញ៉ូង ក្នុងឃុំត្រពាំងក្រញ៉ូង ស្រុកត្រាំកក់ ខេត្តតាកែវ លោក ពៅ សុភា ថ្លែងប្រាប់ Sabay ថាកសិដ្ឋានរបស់លោកបានឲ្យឈ្មោះដំណាំមួយចំនួនថាជាប្រភេទ «ដាំស្រួល ដកស្រួល» ដែលលោកថាសំដៅលើដំណាំស្លឹកគ្រៃ រមៀត និងរំដេងជាដើម។
លោក ពៅ សុភា ពន្យល់ថាៈ «កសិដ្ឋានយើងប្រើពាក្យដំណាំដាំស្រួលដកស្រួលនេះសំដៅលើបន្លែស្លឹកមានស្លឹកគ្រៃ និងបន្លែមើមដូចជារមៀត រំដេងជាដើមព្រោះបន្លែប្រភេទនេះកសិករដាំទៅងាយស្រួលមិនជួបហានីភ័យពីជំងឺផ្សេងៗ»។
ម្យ៉ាងវិញទៀតលោកថា ការប្រើពាក្យនេះគឺក្នុងន័យលើកទឹកចិត្តដល់កសិករឲ្យខិតខំដាំដុះ ដោយថាដំណាំប្រភេទនេះងាយស្រួលដាំ និងមានទីផ្សារទៀតផង។ លោកបន្តថាៈ «ដាំស្រួលដកស្រួលក៏ចង់សំដៅលើកទឹកចិត្តឲ្យកសិករ ខិតខំដាំដំណាំងាយៗដោយមិនចាំបាច់ចេះបច្ចេកទេសអ្វីធំដុំក៏អាចធ្វើបានដែរដោយគ្រាន់តែថែទាំនិងគ្រប់គ្រងស្មៅទៅបានហើយ»។
ចំណែកលោក ពិន កុសល ប្រធានផ្នែកដាំស្លឹកគ្រៃ ឲ្យដឹងដែរថាសព្វថ្ងៃកសិដ្ឋាននេះដាំស្លឹកគ្រៃលើផ្ទៃដីប្រាំហិកតា និងមានស្លឹកគ្រៃបួនម៉ឺនគុម្ព ដែលលោកថាចំនួននេះអាចប្រមូលផលបានជាចន្លោះពី៥០ទៅ១០០គីឡូក្រាមក្នុងមួយថ្ងៃ។
លោកថាស្លឹកគ្រៃនេះលក់តែក្នុងផ្សារជិតៗកសិដ្ឋានរបស់លោកតែប៉ុណ្ណោះ និងថាមិនទាន់អាចបំពេញតម្រូវការទីផ្សារបាននៅឡើយ។ លោកអះអាងថាទៅថ្ងៃខាងមុខកសិដ្ឋានគ្រោងពង្រីការដាំដុះ និងចងក្រងជាមួយកសិករផ្សេងទៀតដើម្បីផលិតឲ្យបានមួយតោនក្នុងមួយថ្ងៃ ឬក៏អាចឈានដល់១០ម៉ឺនគុម្ពលើផ្ទែដីប្រាំពីរហិកតា។ លោកឲ្យដឹថាស្លឹកគ្រៃមួយគីឡូក្រាមអាចលក់បាន ចន្លោះពី៨០០រៀល ទៅ១០០០រៀល។
សម្រាប់ការដាំដុះវិញលោកថាមិនពិបាកអ្វីនោះដែរ ដោយថាគ្រាន់តែភ្ជួរដីឲ្យហ្មត់ និងលើកជារងរួចដាំជាការស្រេច និងត្រូវចំណាយពេលថែទាំរយៈពេលប្រាំមួយខែទើបអាចប្រមូលផលបាន។ ក្រោយប្រាំមួយខែ លោកថាស្លឹកគ្រៃអាចផ្តល់ផលជាបន្តបន្ទាប់អាចរហូតដល់ពីរឆ្នាំ។
លោក ពិន កុសល លើកទឹកចិត្តឲ្យកសិករងាកមកដាំបន្លែ និងដំណាំតាមបែបធ្មជាតិ ដោយថាដើម្បីធានាសុខភាពអ្នកទទួលទាន។ ជាមួយគ្នានេះលោករំពឹងថាប្រជាពលរដ្ឋអ្នកប្រើប្រាស់នឹងងាកមកគាំទ្របន្លែនេះកាន់តែច្រើននៅពេលខាងមុខ។
បើតាមអង្គការ USAID បន្លែដែលប្រើប្រាស់ក្នុងស្រុករាល់ថ្ងៃមានតែមួយភាគបីប៉ុណ្ណោះដែលជាផលិតផលក្នុងស្រុក៕
