- 2020-05-26 14:45:10
- ព័ត៌មាន
ទម្លាប់ ៧ យ៉ាង ធ្វើឲ្យខួរក្បាលចុះខ្សោយដោយមិនដឹងខ្លួន
- 2020-05-26 14:45:10
- ចំនួនមតិ 0 | ចំនួនចែករំលែក 0
ទម្លាប់ ៧ យ៉ាង ធ្វើឲ្យខួរក្បាលចុះខ្សោយដោយមិនដឹងខ្លួន
ចន្លោះមិនឃើញ
ខួរក្បាលត្រូវបានចាត់ទុកថាជាអវយវៈមួយដែលសំខាន់បំផុតរបស់មនុស្ស ហេតុដូច្នេះហើយទើបយើងគួរថែរក្សាវាឲ្យមានសុខភាពល្អជានិច្ច។ ប៉ុន្តែពេលខ្លះសកម្មភាពមួយចំនួនដែលអ្នកធ្វើញឹកញាប់ អាចនឹងផ្ដល់ផលប៉ះពាល់ និងបំផ្លាញខួរក្បាលអ្នកដោយមិនដឹងខ្លួន។ មកមើលទាំងអស់គ្នាថាសកម្មភាពអ្វីខ្លះដែលអាចធ្វើឲ្យខួរក្បាលរបស់អ្នកមានបញ្ហា៖
១. សម្រាកតិចពេក
ការគេងលក់មិនបានគ្រប់គ្រាន់ មិនត្រឹមតែធ្វើឲ្យអ្នកមានអារម្មណ៍ធីងធោង ងងុយតែគេង ឬមិនស្រស់ថ្លានៅព្រឹកបន្ទាប់ប៉ុណ្ណោះទេ ប៉ុន្តែវាថែមទាំងមានផលប៉ះពាល់ដល់ខួរក្បាលរបស់អ្នកទៀតផង ដោយវាអាចនឹងបន្ថែមហានិភ័យដែលធ្វើឲ្យអ្នកមានជំងឺបាត់បង់ការចងចាំ។
២. ចូលចិត្តសម្ងំលាក់ខ្លួន
ការស្រាវជ្រាវបានបង្ហាញថាមនុស្សដែលចូលចិត្តចូលក្នុងសង្គម និងមានទំនាក់ទំនងជាមួយមនុស្សជុំវិញខ្លួនជាប្រចាំនោះ គឺអាចជួបបញ្ហាខួរក្បាលចុះខ្សោយ និងឱកាសក្នុងការកើតជំងឺបាត់បង់ការចងចាំតិចជាងមនុស្សដែលចូលចិត្តលាក់ខ្លួននៅម្នាក់ឯង។
៣. ចូលចិត្តញ៉ាំអាហារគ្រោះថ្នាក់
មានការស្រាវជ្រាវបង្ហាញថាមនុស្សដែលចូលចិត្តទទួលទានអាហារ Fast Food មិនថាជា ភីហ្សា ដំឡូងបារាំងបំពង ហេមប៊ឺហ្គឺរ ឬភេសជ្ជៈដែលមានជាតិស្ករខ្ពស់ នឹងមានសមត្ថភាពក្នុងការរៀនសូត្រ និងការចងចាំអន់ជាងអ្នកដែលចូលចិត្តញ៉ាំអាហារដែលល្អសម្រាប់សុខភាពខួរក្បាល ដូចជាបន្លែ ផ្លែឈើ ឬធុញ្ញជាតិ។ ដូច្នេះបើចង់មានខួរក្បាលដែលឆ្លាតល្អ អ្នកគួរកាត់បន្ថយការញ៉ាំអាហារមិនល្អទាំងនេះឲ្យនៅសល់តិចតួចបំផុត។
៤. ពាក់កាសបើកសំឡេងឮៗខ្លាំង
សម្រាប់អ្នកដែលចូលចិត្តពាក់កាសត្រចៀកដែលបើកសំឡេងកម្រិតឮបំផុត ក៏គួរតែផ្លាស់ប្ដូរទម្លាប់ចេញហើយ ព្រោះវាមិនត្រឹមតែបំផ្លាញសោតវិញ្ញាណរហូតអាចឈានដល់ការថ្លង់ប៉ុណ្ណោះទេ ប៉ុន្តែវាក៏អាចផ្ដល់ផលប៉ះពាល់ដល់ខួរក្បាលផងដែរ ដោយការស្រាវជ្រាវបានបង្ហាញថាការស្ដាប់លែងឮនៅពេលមានអាយុច្រើនគឺមានទំនាក់ទំនងជាមួយការកើតបញ្ហាខួរក្បាល ដូចជាជំងឺបាត់ការចងចាំ ឬជំងឺសរសៃខួរក្បាល។ល។
៥. មិនធ្វើចលនា ឬហាត់ប្រាណ
អ្នកដែលមិនសូវបានធ្វើចលនារាងកាយ ឬហាត់ប្រាណ មិនត្រឹមតែមានហានិភ័យក្នុងការកើតរោគបេះដូង ទឹកនោមផ្អែម ឬលើសឈាមប៉ុណ្ណោះទេ ប៉ុន្តែក៏នឹងប្រឈមមុខនឹងការកើតរោគខ្សោយខួរក្បាលផងដែរ។
៦. ជក់បារី
ក្រៅពីបំផ្លាញសួត ការជក់បារីក៏ផ្ដល់ផលប៉ះពាល់ដែលខួរក្បាលរបស់យើងដែរ ដោយវានឹងបន្ថែមហានិភ័យចំពោះបញ្ហាខ្សោយការចងចាំ និងអាចឈានទៅដល់ការបាត់បង់ការចងចាំ។ លើសពីនេះ ការជក់បារីក៏អាចបណ្ដាលឲ្យកើតជំងឺកាចសាហាវជាច្រើនទៀតដែរ ដូចជាជំងឺបេះដូង លើសឈាម និងទឹកនោមផ្អែមជាដើម។
៧. នៅទីកន្លែងងងឹតច្រើនពេក
ស្ដាប់ទៅអាចមិនគួរឲ្យជឿ ប៉ុន្តែអ្នកដឹងទេថាការដែលរាងកាយរបស់យើងមិនបានទទួលពន្លឺពីធម្មជាតិគ្រប់គ្រាន់ វាអាចធ្វើឲ្យអ្នកកើតមានអាការតប់ប្រមល់បាន ដែលនេះនឹងអាចជះឥទ្ធិពលធ្វើឲ្យខួរក្បាលរបស់អ្នកធ្វើការយឺត និងមានប្រសិទ្ធិភាពកាន់តែតិច។ ក្រៅពីនេះការស្រាវជ្រាវក៏បានបង្ហាញដែរថា ពន្លឺព្រះអាទិត្យអាចធ្វើឲ្យខួរក្បាលរបស់អ្នកធ្វើការបានកាន់តែល្អ ៕
