ក្រុមហ៊ុនអាកាសចរណ៍ China Eastern Airlines នឹងបើកដំណើរការជើងហោះហើរផ្ទាល់ដ៏វែងបំផុតមិនធ្លាប់មាន ដែលមានរយៈពេល ២៩ ម៉ោង ពីទីក្រុង Buenos Aires ប្រទេសអាហ្សង់ទីន ទៅកាន់ទីក្រុងសៀងហៃ ប្រទេសចិន ដោយចាប់ផ្តើមនៅថ្ងៃទី ៤ ខែធ្នូ ឆ្នាំ២០២៥។ ជើងហោះហើរនេះនឹងធ្វើដំណើរចម្ងាយ ១២,០០០ ម៉ាយ ដោយមានការឈប់សម្រាករយៈពេល ២ ទៅ ២.៥ ម៉ោងនៅទីក្រុង Auckland ប្រទេសនូវែលសេឡង់ មុននឹងបន្តទៅសៀងហៃ។

ជើងហោះហើរនេះនឹងប្រើប្រាស់យន្តហោះ Boeing 777-300ER ដែលជាយន្តហោះដែលមានសមត្ថភាពហោះហើរចម្ងាយឆ្ងាយ។ អ្នកដំណើរនឹងស្ថិតនៅលើយន្តហោះក្នុងអំឡុងពេលឈប់នៅ Auckland ដែលធ្វើឱ្យជើងហោះហើរនេះត្រូវបានចាត់ទុកជា "ផ្ទាល់" ជាជាង "គ្មានឈប់"។ ជើងហោះហើរនេះនឹងបំបែកឯតទគ្គកម្មបច្ចុប្បន្នរបស់ក្រុមហ៊ុន Air China ដែលហោះពីទីក្រុងប៉េកាំងទៅ São Paulo តាមរយៈទីក្រុង Madrid ដែលមានរយៈពេលប្រហែល ២៦ ម៉ោង។

ជើងហោះហើរនេះនឹងក្លាយជាជើងហោះហើរ Direct Flight ដ៏យូរជាងគេបំផុតនៅលើពិភពលោក ដោយវ៉ាដាច់ជើងហោះហើរគ្មានឈប់ដ៏វែងបំផុតរបស់ក្រុមហ៊ុន Singapore Airlines ពីទីក្រុងញូវយ៉កទៅសិង្ហបុរី ដែលមានរយៈពេលជិត ១៩ ម៉ោង។ ក្រុមហ៊ុន Qantas ក៏មានគម្រោងបើកដំណើរការ "Project Sunrise" នៅឆ្នាំ២០២៦ ដែលនឹងភ្ជាប់ទីក្រុងស៊ីដនីជាមួយទីក្រុងឡុងដ៍ និងញូវយ៉ក ដោយហោះគ្មានឈប់ ក្នុងរយៈពេលប្រហែល ២០ ម៉ោង៕