- 2018-07-20 08:15:35
- ជំនឿ
ហេតុផលរំជួលចិត្ត៣យ៉ាង ទើបខ្លែងស្រាកយំ តែពលរដ្ឋខ្មែរជឿថាចង្រៃជេរប្រទេចផ្ដាសា
- 2018-07-20 08:15:35
- ចំនួនមតិ 0 | ចំនួនចែករំលែក 0
ហេតុផលរំជួលចិត្ត៣យ៉ាង ទើបខ្លែងស្រាកយំ តែពលរដ្ឋខ្មែរជឿថាចង្រៃជេរប្រទេចផ្ដាសា
ចន្លោះមិនឃើញ
ក្នុងជីវភាពរស់នៅប្រជាជនខ្មែរតាំងពីបុរាណមក រហូតមកដល់បច្ចុប្បន្ននេះ តែងផ្សារភ្ជាប់ជាមួយជំនឿលើអារុក្ខអារក្ខអ្នកតា ជំនឿលើសត្វ ដែលដូនខ្មែរតែងមានជំនឿថា សុទ្ធតែអាចជះឥទ្ធិពលដល់ជីវិតរស់នៅ។ សត្វខ្លែងស្លាក ជាប្រភេទសត្វស្លាបមួយប្រភេទដែលមានវត្តមាននៅកម្ពុជា ចូលចិត្តរស់នៅក្បែរភូមិស្រុកប្រជាជន ត្រូវបានគេជឿថា វាជាសត្វចង្រៃអ៊ុតត្បាត ជាប្រផ្នូលមិនល្អ ដូចជានាំឲ្យមានមនុស្សស្លាប់នៅក្នុងភូមិ។ មូលហេតុនេះព្រោះខ្លែងស្រាកចូលចិត្តបញ្ចេញសំឡេង ស្របពេលដែលមានមនុស្សឈឺធ្ងន់។ ដូច្នេះហើយពេលដែលឮខ្លែងស្រាកយំម្ដងៗ ចាស់ៗក្នុងភូមិតែងនាំគ្នាជេរប្រទេច ដាក់ទំនាយ វាយប៉ោតវាយឆ្នាំងឲ្យវាហើរចេញ ឬសម្លាប់ចោលតែម្ដង។
ដោយឡែកតាមការសិក្សាស្រាវជ្រាវបែបវិទ្យាសាស្ត្រដែលមានចងក្រងក្នុងឯកសារបរទេស ពីលោក ស៊ុយ សេងលីម ដែលជាស្ថាបនិក «គម្រោងការអប់រំ និងអភិរក្សសត្វស្លាបកម្ពុជា» បានឲ្យដឹងថា មូលហេតុដែលខ្លែងស្រាកយំគឺមានហេតុផល៣ចំណុច៖
១. វាស្រែកដើម្បីប្រកូកប្រកាសថាកន្លែងដែលវារស់នៅជាទឹកដីរបស់វា
២. វាយំដើម្បីប្រកូកប្រកាសរកដៃគូស្នេហារបស់វា ដែលមានមនោសញ្ចេតនាក្ដីស្រលាញ់មិនខុសពីមនុស្សឡើយ
៣. គ្រាន់តែជាការច្រៀងលេងកម្សាន្តរបស់វាតាមបែបធម្មជាតិជាសត្វ
អ្នកស្រាវជ្រាវសត្វស្លាប និងសត្វព្រៃកម្ពុជារូបនេះឲ្យដឹងទៀតថា តាមពិតសត្វខ្លែងស្រាក គឺជាសត្វកំពូលស្លូត ហើយថែមទាំងផ្ដល់ជាប្រយោជន៍ដើម្បីកម្ចាត់សត្វចង្រៃដូចជាកណ្ដុរទៀតផង។ សត្វស្លាបចូលចិត្តឆាបកណ្ដុរធ្វើជាអាហាររបស់វាណាស់ ហើយកណ្ដុរនេះហើយជាមេចង្រៃកាត់ស្រូវ កាត់ដំណាំរបស់ប្រជាពលរដ្ឋ។ លោក ស៊ុយ សេងលីម ប្រាប់ទៀតថា វាចូលចិត្តរស់នៅជាមួយមនុស្ស ហើយវាទម្លាប់ស្រែកលេងតាមធម្មជាតិរបស់វាជារៀងរាល់ថ្ងៃ មិនថាមនុស្សឈឺឬជានោះឡើយ។ ពេលដែលវាយំស្របពេលដែលមានមនុស្សឈឺ គឺជារឿងចៃដន្យប៉ុណ្ណោះ ហើយវាក៏មិនមានឥទ្ធិពលអ្វីដល់សេចក្ដីស្លាប់រស់របស់មនុស្សឡើយ។
យ៉ាងណាក្ដី បុរសវ័យ៣៧ឆ្នាំរូបលើកឡើងថា មិនអាចហាមឃាត់ពលរដ្ឋខ្មែរឲ្យឈប់មានជំនឿបានឡើយ ព្រោះជំនឿនេះបានចាក់ស្រេះចូលយ៉ាងស៊ីជម្រៅ ក្នុងជីវភាពរស់នៅរបស់ដូនខ្មែរ តាំងពីបុរាណមក។ ទោះជាយ៉ាងនេះក្ដី ក្នុងនាមលោកជាអ្នកស្រលាញ់សត្វស្លាបមួយរូប លោកពិតជាមានការអាណិតដល់សត្វខ្លែងស្រាក ដែលជាសត្វដ៏ស្លូតតែមិនទទួលបានការអាណិតប្រណី បែរជានាំគ្នាស្អប់ជេរប្រទេចទៅវិញ។ ដូច្នេះហើយលោកសំណូមពរឲ្យប្រជាពលរដ្ឋ ចេះស្រលាញ់សត្វស្លាប ក៏ដូចជាសត្វព្រៃទាំងអស់ មិនថាតែខ្លែងស្រាកនោះទេ គឺត្រូវរួមគ្នាឈប់ទទួលទានសាច់សត្វព្រៃជាអាហារ បណ្ដុះចិត្តស្រលាញ់ ចេះថែរក្សាការពារនូវអ្វីដែលកម្ពុជាមាន កុំឲ្យបាត់បង់បន្តទៀត៕