- 2019-03-09 08:14:11
- ចរាចរណ៍
តិចច្រឡំថាមានបណ្ណបើកបររថយន្ត ហើយអាចទៅបើកយានទាំងនេះបាន
- 2019-03-09 08:14:11
- ចំនួនមតិ 0 | ចំនួនចែករំលែក 0
តិចច្រឡំថាមានបណ្ណបើកបររថយន្ត ហើយអាចទៅបើកយានទាំងនេះបាន
ចន្លោះមិនឃើញ
មន្ទីរសាធារណការរាជធានីភ្នំពេញឲ្យដឹងថានៅថ្ងៃសៅរ៍នេះអ្នកបើកបរត្រីចក្រយាន្ត និងទោចក្រយានសណ្ដោយរ៉ឺម៉កជាង៦០០នាក់បានចូលវគ្គបណ្ដុះបណ្ដាលដើម្បីត្រៀមប្រឡងយកបណ្ណបើកបរប្រភេទ«ក»។
បើតាមមន្ទីរសាធារណការរាធានីភ្នំពេញនៅថ្ងៃនេះមានអ្នកចូលរួមវគ្គបណ្ដុះបណ្ដាលចំនួន៦៣១នាក់។ ដោយឡែកកាលពីថ្ងៃទី៧ ខែមីនា ប្រភពខាងលើបញ្ជាក់ថាមានអ្នកបើកបរត្រីចក្រយានយន្តចំនួន៤០នាក់បានដាក់ពាក្យប្រឡង និងមាន២១នាក់បានប្រឡងជាប់។
ដោយឡែកប្រភពដដែលបានឆ្លើយនឹងសំណួរប្រជាពលរដ្ឋក្នុងComment របស់ខ្លួនដែលសួរថាអ្នកមានបណ្ណបើកបររថយន្តត្រូវទៅរៀនដើម្បីប្រឡងទៀតឬយ៉ាងណាដើម្បីបានបណ្ណប្រភេទ «ក»។ ជាចម្លើយគឺថាអ្នកមានបណ្ណបើកបររថយន្តមិនចាំបាច់ទៅរៀននោះទេ ពោលគឺអាចដាក់ពាក្យប្រឡងយកបណ្ណប្រភេទ «ក« បានតែម្ដង។
វគ្គបណ្ដុះបណ្ដាលនេះនឹងរៀបចំឡើងរយៈពេលពីរខែចាប់ពីថ្ងៃទី២ ខែមីនា ដល់ថ្ងៃទី៤ ខែឧសភា ឆ្នាំ២០១៩ ដោយរៀបចំឡើងរៀងរាល់ថ្ងៃសៅរ៍។ ទីតាំងចូល រួមក្នុងវគ្គបណ្តុះបណ្ដាលនេះមានពីរកន្លែងគឺទី១នៅអង្គភាពផ្តល់ប័ណ្ណបើកបរនៃមន្ទីរសាធារណការ និងដឹកជញ្ជូនរាជធានីភ្នំពេញ ផ្លូវលេខ៥៩៨ សង្កាត់ច្រាំងចំរេះទី២ ខណ្ឌឫស្សីកែវ និងទីពីរនៅមន្ទីរសាធារណការ និងដឹកជញ្ជូនរាជធានីភ្នំពេញ នៅផ្លូវជាតិលេខ៦ សង្កាត់ព្រែកលៀប ខណ្ឌជ្រោយចង្វារ។ នេះបើតាមការផ្សាយនៅលើទំព័រហ្វេសប៊ុករបស់មន្ទីរសាធារការរាជធានីភ្នំពេញនារសៀលនេះ។
សម្រាប់តម្លៃប្រឡងយកបណ្ណបើកបរប្រភេទ «ក» នេះក្នុងតារាងរបស់ក្រសួងមានតម្លៃ ៣ម៉ឺនរៀល។ យានជំនិះដែលស្ថិតក្នុងប្រភេទ «ក« នេះមានទោចក្រយានយន្តមានទំហំស៊ីឡាំងលើសពី១២៥សេសេ ទោចក្រយានយន្តសណ្ដោងរ៉ឺម៉ក និងត្រីចក្រយានយន្ត៕