ក្បួនទាញហុងស៊ុយតាមលេខផ្ទះ ដែលគ្រប់គ្នាមិនសូវបានដឹង

2016-10-12 23:17:30
ជំនឿ

2016-10-12 23:17:30
ចំនួនមតិ 0 | ចំនួនចែករំលែក 0

ចន្លោះមិនឃើញ

លេខផ្ទះក៏ជាផ្នែកមួយដែលអាចមើលឃើញនូវហុងស៊ុយ សេចក្ដីសុខសុភមង្គល និងលាភហូរចូលដល់ម្ចាស់ផ្ទះផងដែរ ប្រសិនបើចេះរៀបចំបានល្អតាមក្បួន។ ខាងក្រោមនេះគឺជាក្បួនទាញហុងស៊ុយ តាមមហាសង្ក្រាន្តខ្មែរចិនសកល របស់លោក អ៊ឹម បុរិន្ទ។

ជាដំបូងអ្នកត្រូវយកលេខផ្ទះរបស់អ្នកបូកបញ្ចូលគ្នាជាមុនសិន។ ឧទាហរណ៍៖ លេខផ្ទះរបស់អ្នកគឺ១៦៨។ ដូចនេះគឺ ១+៦+៨= ១៥ រួចបូកបន្តទៀត ១+៥ = ៦។ ដូច្នេះលេខផ្ទះរបស់អ្នកគឺត្រូវនឹងជំពូកផ្ទះទី៦។ សូមផ្ទៀងផ្ទាត់អត្ថន័យតាមជំពូកពីលេខ១ ដល់ លេខ៩ ដូចខាងក្រោម។ ជំពូកលេខ១៖ លេខនៃអ្នកដឹកនាំ ផ្ទះប្រភេទនេះជាផ្ទះនៃអ្នកដឹកនាំ អ្នកដំណើរ និងមនុស្សដែលប្រាស្រ័យល្អក្នុងសង្គម។ លេខ១ នេះគឺជាលេខនៃធាតុពន្លឺរស្មី។ ដូចនេះ វត្ថុដែលចាំបាច់ក្នុងផ្ទះគឺមិនត្រូវទុកអោយងងឹតឈឹងឡើយ ជាពិសេសក្នុងបរិវេណរបង រឺ ទ្វារចូលផ្ទះជាដើម។ ហើយបើផ្ទះមានសួនច្បារផង គឺគួរតែមានទួលតូចមួយដែលតំណាងអោយភាពជាអ្នកដឹកនាំដ៏អស្ចារ្យ និង មានសេចក្ដីសុខ។

ជំពូកលេខ២៖ លេខនៃធាតុទឹក ផ្ទះប្រភេទនេះ គួរតែមានធាតុទឹកនៅជាមួយ ដូចជាទឹកផុតពីដី ប្រភពទឹក ទឹកធ្លាក់ ឬអ្វីក៏ដោយដែលជាទឹកមានចលនា និង ត្រូវអោយស្អាតជានិច្ច ដើម្បីជាការលើកស្ទួយដល់ផ្ទះរស់នៅ។ ជំពូកលេខ៣៖ លេខដែលកៀកនឹងកម្ដៅ ការដាំដើមឈើក្នុងបរិវេណរបង ដើម្បីការពារកម្ដៅសាយភាយមកពីកម្លាំងខាងក្រៅ គឺជាកិច្ចការដែលម្ចាស់ផ្ទះជំពូកនេះគួរតែធ្វើ។

ជំពូកលេខ៤៖ ទាក់ទងនឹងដើមឈើ សម្រាប់ម្ចាស់ផ្ទះប្រភេទនេះ ដែលមានអាជីពជាអ្នកលក់ដូរ អ្នកការទូត ឬអ្នកធ្វើទំនាក់ទំនង គឺចាំបាច់ណាស់ក្នុងការដាំរុក្ខជាតិដែលមានផ្កាចម្រុះពណ៌ និងតុបតែងផ្ទះអោយមានពណ៌ទឹកក្រូច ដើម្បីលើកស្ទួយហុងស៊ុយ និងមិនគូរមានពណ៌ ខៀវតែម្យ៉ាងនោះឡើយ។ ជំពូកលេខ៥ ៖ ភាពគង់វង្ស ផ្ទះប្រភេទនេះគឺទាក់ទងទៅនឹងសីលធម៌ និង គុណធម៌។ ប្រសិនបើអ្នកជាអ្នកមុខអ្នកការ មានចំណេះដឹង ជាគ្រូបាអាចារ្យគឺគួរតែមានតម្កល់ក្បួនតម្រាវិជ្ជា សៀវភៅជាច្រើន និង គួរមានទីតាំងសម្រាប់សូត្រមន្ត សំពះព្រះផងដែរ។

ជំពូកលេខ៦ ៖ ធាតុខ្យល់ដែលទាក់ទងនឹងសំឡេង ម្ចាស់ផ្ទះគួរតែប្រើ ទូរស័ព្ទដែលមានសំឡេងកន្តឹងខ្លាំង ដើម្បីជាការដាស់ និង នាំហុងស៊ុយចូលផ្ទះ។ ជំពូកលេខ៧ ៖ ទាក់ទងនឹងធុរកិច្ច ផ្ទះប្រភេទនេះគឺគួរតែមានការិយាល័យមួយសង់នៅក្នុងខ្នងជាមួយគ្នា ដែលធ្វើលើកិច្ចការជំនួញផង និង ជាផ្ទះដែលមានរបស់របរច្រើនផង។ ចំណែករបស់ចាស់ៗដែលប្រើការមិនកើត ឬមិនចាំបាច់អាចយកទៅបរិច្ចាគជាទាន ដើម្បីអោយមានសំណាងនាំរបស់ថ្មីៗចូលមកផ្ទះជំនួសវិញ។ ជំពូកលេខ៨ ៖ ឥទ្ធិពលរបស់ដួងតារារាហូ ដើម្បីមានលាភចូល ម្ចាស់ផ្ទះមិនត្រូវសង់ថែមថយបន្ទប់ច្រើនពេកទេ ដើម្បីកុំអោយមានស្រមោលនៃជ្រុងបន្ទប់ច្រើនពេក ព្រោះអាចនឹងធ្វើអោយកើត ក្ដីក្ដាំង ឈឺថ្កាត់ និង ការឈ្លោះវិវាទគ្នាក្នុងគ្រួសារ។ ជំពូកលេខ៩ ៖ ភាពស័ក្ដិសិទ្ធិ បុគ្គលដែលជាម្ចាស់ផ្ទះត្រូវឧស្សាហ៍សូត្រមន្ត សំពះព្រះ ថ្វាយម្ចាស់ទឹកម្ចាស់ដី ឬឧស្សាហ៍ធ្វើបុណ្យក្នុងផ្ទះជារឿយៗ ដើម្បីអោយកើតសិរីមង្គលដោយសារផ្ទះលេខ ៩ នេះគឺជាផ្ទះដែលមានឱកាសជួបនឹងវត្ថុស័ក្ដិសិទ្ធិ និង វត្ថុកំបាំងបានយ៉ាងងាយ។